A Umana Kakailai 135:7-19

⁷I vatubang ra vual ta ra lavur ngu na rakarakan a gunagunan, I tul tar ra meme upi na palapala ia, ma ba dir a varait ma ra bata, I tul vairop vue ra vuvu kan kana lavur vuvuvung.

⁸Nina i ga ubu doko ra umana luaina bul ta ra gunan Aigipto, A luaina bul kai ra tarai, ma ra luaina nat na vavaguai.

⁹I ga tul tar ra umana vakilang ma ra lavur magit na kinaian livuan tam Aigipto, Pire Parao ma pire kana lavur tultul.

¹⁰I ga ubu vue mangoro na vuna gunan, Ma i ga ubu doko ra ivu ngala na king,

¹¹Sikon ra king kai ra tarai Amor, Ma Og ra king Basan, Ma ra lavur kiki na varkurai par Kanaan;

¹²Ma i ga tul tar kadia gunan upi ra tiniba, A tiniba kai Israel kana tarai.

¹³Luluai, a iangim i tur tukum, Ma di nuk uraure, Luluai, ta ra lavur taun tarai namur.

¹⁴Tago ra Luluai na kure kana tarai, Ma na pukue ra nuknukina ure kana lavur tultul.

¹⁵A umana tabataba kai ra lavur Tematana di ga pait diat ma ra silva ma ra goled., A tarai ka dia ga pait diat.

¹⁶Dia vung ra ngie i diat, ma pa dia tata; A kiau na mata i diat, ma pa dia gigira;

¹⁷A talinga i diat, ma pa dia valavalongor; Ma pa ta vuvu ta ra ngie i diat.

¹⁸Diat dia pait diat diat a varogop boko ma diat, Maia, diat par tikatikai dia nurnur ta diat.

¹⁹Avat ta ra kuba i Israel, avat a pite pa ra Luluai; Avat ta ra kuba i Aron, avat a pite pa ra Luluai;