A Umana Kakailai 119:65-167

⁶⁵U tar pait ra varmari tadav kaum tultul, Luluai, vardada ma kaum tinata.

⁶⁶Una tovo tar ra kabinana tagu ma ra minatoto bula, Tago iau tar kapupi kaum lavur vartuluai.

⁶⁷Lua, ba pa ta magit i monong iau, iau ga vana rara; Ma go iau tar torom ta kaum tinata.

⁶⁸U a boina, ma u pait ra boina, Una tovo tar kaum lavur togotogo tagu.

⁶⁹Diat i kolakolo ra nuknuk i diat dia takun vavaongo pa iau, Ma iau, ina torom ta kaum umana vartuluai ma ra balagu par.

⁷⁰I bira ka ra bala i diat, Ma iau, iau gugu ka ta kaum vartovo.

⁷¹I boina piragu, tago ra kaina mangamangana i ga tup iau; Upi ina vartovo ure kaum lavur togotogo.

⁷²A vartovo na ngiem i topa iau, Ma ra arip na marmar na goled ba ra silva pata.

⁷³A limam i tar mal iau, ma i tar vaki iau; Una tul tar ra minatoto tagu, upi ina vartovo ure kaum lavur vartuluai.

⁷⁴Diat dia ru u diat a gire iau ma diat a gugu, Tago iau tar nurnur ta kaum tinata.

⁷⁵Luluai, iau nunure ba i takodo kaum lavur varkurai; Ma u tar virit iau, tago i dovot ra maukuam.

⁷⁶Boina ba kaum varmari na vamaram iau, Vardada ma kaum tinata tadav kaum tultul.

⁷⁷Boina ba kaum bala na varmari na tadav iau, upi ina laun, Tago iau gugu ta kaum vartovo.

⁷⁸Boina ba diat i kolakolo ra nuknuk i diat diat a vavirvir, tago dia vakaina iau, ma pa ta vuna. Ma iau, ina nununuk ta kaum lavur vartuluai.

⁷⁹Boina ba diat dia ru u diat a tadav iau, Ma diat a nunure boko kaum lavur varvai.

⁸⁰Boina ba ra balagu na mur vakakit kaum lavur togotogo, Upi koko ina vavirvir.

⁸¹A balagu i malari upi kaum valavalaun; Ma go ina nurnur uka ta kaum tinata.

⁸²A matagu i kaina upi kaum tinata, Ba iau biti: Vingaia una vamaram iau?

⁸³Tago iau da ra paura i taba ta ra mi, Ma a dovotina pa iau valubane kaum lavur togotogo.

⁸⁴Aivia ra bung boko na tup kaum tultul? Vingaia una kure diat dia vakavakaina iau?

⁸⁵Diat i kolakolo ra nuknuk i diat dia ga kal ra tung ure iau, Diat ba pa dia varogopane mule diat ma kaum tinata na vartovo.

⁸⁶Kaum lavur vartuluai par dia dovot; Dia takun vavaongo iau; una maravut iau.

⁸⁷I maravai ba diat a vamutue iau ati ra pia, Ma ga iau, pa ina ga vung vue kaum umana vartuluai.

⁸⁸Una valagar iau vardada ma kaum varmari; Damana ina torom ta ra varvai na ngiem.

⁸⁹Luluai, kaum tinata i tur tukum, I tur padikat arama ra bala na bakut.

⁹⁰Kaum dovot na mangamangana i tur pire ra umana taun tarai par, U tar vaki ra rakarakan a gunagunan ma i tur vatikai.

⁹¹Varogop ma kaum lavur varkurai dir tur gori, Tago ra lavur magit diat kaum umana tultul.

⁹²Gala kaum tinata pa i ga vagagane iau, Gala ina ga virua ta ra mangana i monong iau.

⁹³Pa ina valubane tuna kaum lavur vartuluai; Tago u tar valagar iau. me.

⁹⁴Iau kaum, una valaun iau; Tago iau tar tikan upi kaum lavur vartuluai.

⁹⁵A umana tena varpiam dia kiki uai upi diat a vamutue iau, Ma iau, ina nuk pa kaum lavur varvai.

⁹⁶Iau tar gire ba ra lavur magit ati ra pia a komkomuna ka, Ia kaka kaum vartuluai i tababa na kaia.

⁹⁷Iau ti manane tuna kaum tinata na vartovo! Iau nununuk tana vatikai.

⁹⁸Iau lia ta kaugu umana ebar ma ra kabinana, ure kaum umana vartuluai; Tago dia ki vatikai piragu.

⁹⁹Iau lia ta kaugu umana tena vartovo par ma ra minatoto; Tago iau nununuk ta kaum lavur varvai.

¹⁰⁰Iau lia ta ra umana patuana ma ra kabinana; Tago iau tar torom ta kaum lavur vartuluai.

¹⁰¹Iau tigal bat ra kaugu ta ra lavur kaina nga par, Upi ina torom ta kaum tinata.

¹⁰²Pa iau vana kan kaum lavur varkurai Tago u tar tovo iau.

¹⁰³Kaum lavur tinata dia kalakalami tuna piragu! Maia, dia manga kalami ta ra ngiegu, ma ra polo na livur pata.

¹⁰⁴Kaum lavur vartuluai dia vaminana iau; Kari iau milmilikuane ra lavur kaina nga par.

¹⁰⁵Kaum tinata ia ra lamp ure ra kaugu, Ma i da ra kapa ure kaugu nga.

¹⁰⁶Iau tar vavalima, ma ina pait ot pa ia bula, Ba ina torom ta kaum lavur takodo na varkurai.

¹⁰⁷I tup iau tuna, Una valagar pa iau, Luluai, vardada ma kaum tinata.

¹⁰⁸Luluai, iau lul u ba una alube pa kaugu vartabar na pite varpa, Ma una tovo tar kaum lavur varkurai tagu.

¹⁰⁹Iau to na virua ra bungbung par; Ma pa iau valubane kaum tinata na vartovo.

¹¹⁰A umana tena varpiam dia kapi kun ure iau, Ma pa iau vana rara kan kaum lavur vartuluai.

¹¹¹Iau vatur vatikene pa kaum lavur varvai, Tago ra balagu i gugu ure diat.

¹¹²Iau tar kure ra balagu ba na pait ot pa kaum umana togotogo, Pa na mutu, tuk tar ta ra mutuaina.

¹¹³Iau milmilikuane diat i a urua ra nuknuk i diat; Ma iau mainge ke kaum tinata na vartovo.

¹¹⁴U kaugu rivarivan ma kaugu bakbakit; Iau nurnur ta kaum tinata.

¹¹⁵Avat a vana kan iau, avat a umana tena pait ra kaina, Upi ina torom ta ra lavur vartuluai kai kaugu God.

¹¹⁶Una maravut iau varogop ma kaum tinata, upi ina laun; Ma koko ina vavirvir ure ra magit iau ki nunur upi ia.

¹¹⁷Una vapadikat iau, ma ina ki bulu, Ma ina ru vatikene pa kaum lavur togotogo.

¹¹⁸U okole vue diat par dia vana rara kan kaum lavur togotogo, Tago kadia mangamangana i vavaongo.

¹¹⁹U vamutue ra umana tena varpiam par ati ra pia da ra dur; Kari iau mainge kaum lavur varvai.

¹²⁰A pal a pakagu i dadadar tago iau burut i tam; Ma iau burut bula ta kaum lavur varkurai.

¹²¹Iau tar pait ra magit u ga kure tar ia, ma ra magit i takodo bula; Koko una nur tar iau ta diat dia ki taun iau.

¹²²Una maravut kaum tultul upi na ki bulu; Koko diat i kolakolo ra nuknuk i diat diat a ki taun iau.

¹²³A matagu i kaina tuna upi na gire kaum valavalaun, Ma upi kaum takodo na tinata.

¹²⁴Una pait nam ra magit pire kaum tultul ba na varogop ma kaum varmari, Ma una tovo tar kaum lavur togotogo tagu.

¹²⁵Iau kaum tultul, una tabar iau ma ra minatoto, Upi ina nunure kaum lavur varvai.

¹²⁶I topa ia ba ra Luluai na varkurai; Dia tar nuk vakuku vue kaum tinata na vartovo.

¹²⁷Kari iau manga mainge kaum lavur vartuluai ta dir Ma ra goled, maia, ma ra goled i ngatngat tuna.

¹²⁸Kari iau biti ba kaum lavur vartuluai dia takodo, Ma iau milikuane ra lavur nga par ba dia rara.

¹²⁹Kaum lavur varvai dia enana tuna, Kari iau toratorom ta diat.

¹³⁰Ba di pala kaum tinata, i varvakapa; I vaminana diat dia tuptup.

¹³¹Iau manga panganga, ma iau tungatunga, Tago iau bala upi kaum umana vartuluai.

¹³²Una lingan upi iau, ma una mari iau, Tago dari kaum mangamangana pire diat dia manane ra iangim.

¹³³Una vateten ra kaugu pi na vanavana vada kaum tinata, Ma koko ta bilak na mangamangana na kure iau.

¹³⁴Una valaun iau kan ra tarai dia ki taun iau, Upi ina mur kaum lavur vartuluai.

¹³⁵Boina ba ra matam na pupua taun kaum tultul, Ma una tovo tar kaum lavur togotogo tagu.

¹³⁶A matagu i lulur na kaia, Tago pa dia torom ta kaum tinata na vartovo.

¹³⁷Luluai, u a tena takodo, Ma kaum lavur varkurai dia dovot.

¹³⁸Kaum lavur varvai, nina u ga tul tar diat, dia takodo, Ma dia dovot muka.

¹³⁹Kaum niongor i tar vaimur iau, Tago kaugu umana ebar dia tar valubane kaum tinata.

¹⁴⁰Kaum tinata i gomgom tuna, Kari kaum tultul i manamanane.

¹⁴¹Iau da ra bul vakuku ka, ma di milmilikuane iau, Ma pa iau nuk vue kaum lavur vartuluai.

¹⁴²Kaum mangamangana takodo i tur tukum, Ma kaum tinata na vartovo ia ra dovotina.

¹⁴³A purpuruan ma ra bunurut dir tabe vake iau, Ma ina gugu ka ta kaum lavur vartuluai.

¹⁴⁴Kaum lavur varvai dia takodo pa na mutu, Una vakabinana iau, ma ina laun uka.

¹⁴⁵Iau kail ma ra balagu par; Luluai, una torom tagu; Ina torom ta kaum lavur togotogo.

¹⁴⁶Iau tar kail tadav u; una valaun iau, Ma ina torom ta kaum lavur varvai.

¹⁴⁷Ba pa i ga lar boko, iau ga kail up u; Iau nurnur ta kaum tinata.

¹⁴⁸Ba pa di kia vue boko ra monamono na marum, iau tavangun Upi ina nununuk ta kaum tinata.

¹⁴⁹Una valongore ra nilaigu vardada ma kaum varmari; Una valagar pa iau, Luluai, vardada ma kaum varkurai.

¹⁵⁰Diat dia vakavakaina iau ma ra bilak na mangamangana dia maravai, Dia tar vana vavailik kan kaum tinata na vartovo.

¹⁵¹Luluai, u ti ki maravai, Ma kaum lavur vartuluai dia dovot.

¹⁵²Papa amana tana iau tar nunure ure kaum lavur varvai, Ba u ga vatur diat upi diat a tur tukum.

¹⁵³Una nuk pa ra mangana i tup iau, ma una valaun iau; Tago pa ina valubane kaum tinata na vartovo.

¹⁵⁴Una tata maravut iau, ma una valaun iau, Una valagar pa iau vardada ma kaum tinata.

¹⁵⁵A valavalaun i ki vailik kan ra umana tena varpiam, Tago pa dia tikan upi kaum lavur togotogo.

¹⁵⁶Kaum bala na varmari, Luluai, i ngala muka; Una valagar pa iau vardada ma kaum lavur varkurai.

¹⁵⁷Mangoro dia vakavakaina iau, ma dia ebar ure iau, Ma pa iau vana irai kan kaum lavur varvai.

¹⁵⁸Iau ga gire ra umana tena vavagu, ma ra balagu i ga ligur, Tago pa dia torom ta kaum tinata.

¹⁵⁹Una nuk pa kaugu varmananai tadav kaum lavur vartuluai; Una valagar pa iau, Luluai, varogop ma kaum varmari.

¹⁶⁰Kaum lavur tinata parika dia dovot, Ma diat par kaum lavur takodo na varkurai dia tur pa na mutu.

¹⁶¹A umana luluai dia tar vakaina vakuku iau; Ma ra balagu i manga ru ka kaum tinata.

¹⁶²Iau gugu ure kaum tinata, Da ta tikai ba i gire tadav ra ngala na tabarikik.

¹⁶³Iau pidimuane ra mangamangana vaongo, iau manga milikuane, Ma iau manamanane ke kaum vartovo.

¹⁶⁴Iau valavurua ma ra pite varpa tadav U ta ra bungbung par, Tago i takodo kaum lavur varkurai.

¹⁶⁵I ngala ra malmal pire diat dia mamainge kaum tinata, Ma pa ta tukatukai pire diat.

¹⁶⁶Luluai, iau tar ki nunur upi kaum valavalaun, Ma iau tar pait ot pa kaum lavur vartuluai.

¹⁶⁷A balagu i tar torom ta kaum lavur varvai, Ma iau manga manane diat.