1A kum tistising, met nemi sur mot in talapor una marmaris ra o God i pitar tari torom a taro na lotu tong una papor Masedonia.
2Det taramo a susut na mamaut, ikut anundet a gasgas i bukus. Ma una nundet a labino gasgas ma anundet a kinkinis na sibo, det gas ut sur det in etabor.
3A inanos mot nama lingmulus, anundet a etabor, i elar ut nama dekdekin det, ikut det pitar wot meleti. Anundet a nemnem ut sur det in pami lenra.
4Ra det saring met sur det kai det in pitar anundet a mani na etabor torom a taro anun o God sapat o Jerusalem.
5Ma awu sur det pitar tari kut a mani ra met nuki lena det in pitari, det pitar mugu tar anundet a nilaun ut torom a Labino, ma torom met kai, elar nama nemnem anun o God.
6I mo ra met saring o Taitus sur in warut mot sur mot in pam sot pas a pinapam na etabor ri, uni i ut i warut mot ra mot turpas a pinapam na etabor ri.
7Una kum utna rop, mot ser pam soti taun a taro rop: Anumot a nurnur, ma anumot a warawai, anumot a mananos, anumot a dekdek, ma anumot a labino marmaris torom met. Ra i wakak sur mot in pam sot pasi kai a pinapam na etabor ri.
8Ka watung a utna ri sur in elar nama warkurai torom mot. Ikut, a inanos mot una taro Masedonia, ma una nundet a labino gasgas sur det in etabor, sur an lar anumot a marmaris lena, i lingmulus o awu.
9Uni mot tasman a marmaris anun anundat a Labino o Iesu Karisito. I ut i tadaru sakit nama susut na utna, ikut i wan gusun anun a wakak na kinkinis sapat netes una langit, uni i maris mot, ma i kis na sibo nin una rakrakon bual, sur mot, mot in tadaru nama wakak na nilaun.
10An inanos mot nama nuknuking una utna ri: I wakak sur mot in pam rop ru a pinapam na etabor ra mot turpasi una kilalo ra i rop. Mot a mugano taro ra mot nemi sur mot in etabor, ma mot a mugano taro kai ra mot turpas a etabor.
11I wakak sur uniri anumot a nemnem sur mot in pam rop ru i, in elar nama labino nemnem ra mot taramo i ra mot turpasi. Mot in etabor elar nama dekdeki mot.
12Ra mot gasgas sur mot in etabor, o God in gas uni. O God i nemi sur mot in etabor tagun a utna ra mot utur ukai i, awu sur tagun a utna ra ka mot utur ukai i.
13Ka watungi lena mot in warut a taro gisen, ma mot, mot in sibo, awu. A nemi sur mot in elar rop kut.
14Uniri, mot sa utur ukai a labino, sur mot in warut a taro gisen nami. Ra mot in sibo, det bulung det in warut mot, sur mot rop mot in warut etetalai mot, sur mot in elar rop kut.
15I elar nami ra di sa tumus tari una Buk Tabu lena, “Osi ra i ubek tomo a labino utna, i utur ukai i kut a utna ra i topasi. Ma osi ra ke ubek tomo tu labino utna, i kai i utur ukai a utna ra i topasi.”
16A watung wakak torom o God ra i unuk tar o Taitus sur in warut mot. I nem mot elar nam iau kai a nem mot.
17I gas doko ra met saringi sur in warut mot, ma una nun a nemnem ut, in nan melet torom mot nama labino gasgas.
18Met in tulu ru i tomo nam ara tisimet kai, ra a kum taro na lotu una kum tamon rop det watung ulabo pasi una nun a wakak na pinapam ra i warawai nama Wakak na Wasiso.
19Det ut, det pilok tari sur met in nan tomo usapat o Jerusalem, sur met in los ru a mani na etabor. Met in pam a pinapam ri, sur met in ulabo pas a Labino, ma sur met in ese i lena, met nem na warut a taro na lotu sapat o Jerusalem.
20Ka met nemi sur taio in takun met una numet a pinapam ra met in nan nama labino etabor ri.
21I mo ra met dekdek sur met in pam asau ra i tokodos, awu sur umatan a Labino kut, umatan a taro utkai.
22Ma met in tulu ru i kai ara tisimet una nurnur tomo nam der. Met sa lar tari a susut na dino, ma met tasmani lena, i ser gas sur a pinapam. Ra uniri, i nem doko i sur in warut una pinapam ri, uni i nurnur un mot.
23Ma o Taitus i papam tomo nam iau, sur mir in warut mot. Ma aru tistisi mot kai, ra detul nam o Taitus detul in nan tomo, der tur ukinalong a taro na lotu una kum tamon, ma nunder a nilaun, i pitar a urur torom o Karisito.
24I mo ra mot in ese anumot a marmaris torom detul, sur a taro na lotu una kum tamon gisen det in tama lele a kibino ra met warango mot.
