1Ra an warango pas iau ut, anung a wasiso ke gas un tu utna, ikut an warango pas iau ut una ramano kum tamtama ma a kum ririon ra a Labino ut i sa utamtama tar iau uni.
2A tasman ara musano, a te Karisito, numugu tan a noino ma wat na kilalo, o God i ben pasi usapat una mantul na langit. Ka tasmani ra i los tito pasi, tomo nama pinino, o a niono kut. O God kut i tasmani.
3An watung meleti, a tasmani lena a musano ri o God i los tito pasi usapat una Paradais, ikut ka tasmani ra i los tito pasi, tomo nama pinino o a niono kut. O God kut i tasmani. Sapat netes, i longoro a kum utna ra kataio in pet lari sur in watungi, ma i tabu kai sur taio in inanos nami.
5An warango pas a musano ri, ikut, ra an warango iau, an warango pas iau una kum utna kut ra i upuaso i lena kalako dekdeking.
6Gunuk ra an warango pas iau una kum utna ri, ka longlong, uni a watungi ut a lingmulus. Ikut ka nem na wasiso bing una nung a kum tamtama, uni ka nemi sur taio in ulabo pas a nuknukino un iau, sako a nuknukino un iau ken elar nama utna ra a pami ma a watungi.
7A kum utna ra o God i sa utamtama tar iau uni i labo sakit, ikut di pitar tar ara utna i suksuk ra i ser so a pining, sur gong a nuk ulabo pas iau ut una kum tamtama ri. A suksuk ra, a ensel anun o Satan ra i ban laulau a pining.
8A sa mantulu saring a Labino, sur in rakon ru i gusun iau.
9Ikut i watungi lenri tang, “Anung a marmaris torom ui sa sot, ma kon sibo sur tu utna gisen. Uni din tama pupuaso a dekdeking un ui ra kalako dekdekim.” I mo ra a gas doko sur an warango pas iau lena, kalako dekdeking, sur a dekdekin o Karisito in kis un iau.
10I mo ra a gas doko ra kalako dekdeking, ma di watung laulau iau, ma a taramo a kum mamaut, ma a taro det ukadik iau, ma a taramo a dekdek na tupunuk, uni a nurnur un o Karisito. A gas, uni a tasmani lena, ra kalako dekdeking an dekdek.
11A sa watung tar a kum longlong na wasiso ri, uni ka mot nuki lena iau a aposel mulus. I lingmulus ut, iau a musano oros kut, ikut i tokodos sur mot in tama lele iau lena iau a aposel mulus, uni ka natino tandet ra mot watung det a kum lamlabino aposel.
12Ra a kis nisamot, a ulingmulus pas iau umatamot lena, iau a aposel mulus. A pam a kum utna na ukisin, a kum dekdek na pinapam, ma a kum ukinalong, ma pining ke ngoro sur an pam a kum utna ri, ra a taramo a kum maut.
13Asau a kibino ra mot nuki lena ka pam a wakakino torom mot, elar nami ra a pami torom a taro na lotu una ramano kum tamon gisen? Kutiro ra ka saring mot sur tu utna? Mot in dumano ru anung a sakino petutna ra ka saring mot sur tu utna!
14Tama i, uniri a sa waninar sur a mantul na inawan torom mot. Ma kan saring tu utna gusun mot, uni ka nem anumot a mani, a nem mot ut. Uni ke tokodos sur a kum nat liklik det in tabor a kum tamandet ma a kum nandet. I wakak sur a kum tamandet ma a kum nandet ut det in ubek a utna sur det in tabor a kum nutnutun det nami.
15A gas kut sur an pitar tar anung a kum utna rop, ma anung a nilaun kai, sur u warut mot. A nem doko mot, ma pepetlai, anumot a marmaris torom iau in natino kut?
16Mot sa tasmani lena ka saring pas tu mani gusun mot. Ikut, sako taio tagun mot in watungi lena, iau a tene mananos ma a sa toro pas tu utna gusun mot.
17Pepetlai, surko a sa los pas tu utna tamot, tan a taro ra a tulu ru det torom mot?
18A saring pas o Taitus sur in nan torom mot, der nam ara tisimet kai. Pepetlai, o Taitus i sa los pas tu utna gusun mot? Awu. Met muri kut ara nuknuk, ma ara kisapi kut ra met muri.
19Pepetlai, mot nuki lena met wasiso bat met kut gusun mot? Awu. Met wasiso nama lingmulus umatan o God elar nama kum tultul anun o Karisito. A kum wakak na paspasa met, a kum utna rop ra met pami, met pami sur in warut mot.
20A ngara, sako ra an nanpat torom mot, kan tama torom a kum petutna ra a nemi sur an tama i. Ma mot kai, ka mot in gas una petutna ra an nanpat nami. A ngara, sako an etorom pas a ngas na kinkinis lenri: mot wasiso na engaras, mot nuknuk laulau, mot kankan, mot kis susuaro, mot emang, mot wasiso eno, mot ulabo pas mot ut, ma anumot a kinkinis i purpuruon.
21A ngara, sako ra an nanpat tiro, anung a God in unatino pas iau umatamot. Ma an tupunuk una susut tagun mot, ra det pam sakino tagun numugu utmakai ma ka det nukpukus gusun anundet a kum dur na petutna, a kum pamuk na petutna ma a kum nemnem sur a sakino petutna ra det ser muri.
