1A nemi sur mot in longoro i munung anung a longlong na wasiso. A tasmani lena mot in longoro iau.
2A ngara doko un mot, elar nam o God i ngara un mot, sako mot in nan gisen gusun o Karisito. A sa ubek bat tar mot sur mot anun o Karisito, elar nama wakak na toraro ra kabaut i kis tomo nam tu musano.
3Ikut uniri, a ngara, sako din ben raro a nuknuki mot gusun anumot a petutna ra katu dur uni, ma anumot a nurnur mulus un o Karisito, elar namin nusui i toro pas o Iwa.
4Uni mot gas sur mot in longoro taio ra i wanpat torom mot, ma i warawai un ara Iesu gisen, ma awu sur un o Iesu ra met warawai nami. Ma mot gas kut sur din tabor mot nam tu nion gisen, ra awu sur a Tokodos na Nion. Ma mot gas kut sur mot in longoro tu Wakak na Wasiso gisen, ra awu sur a Wakak na Wasiso ra mot sa nurnur uni.
5Awu sur a nuki lena, a natino tandet ra mot watung det a kum lamlabino aposel.
6Surko mot nuki lena, ka ususer pas sur a tene warawai, ikut a tasmani ut a utna ra a warawai nami. Mot ut, mot talapor uni, uni una kum utna rop met pami torom mot, met upuaso a mananos rop ri.
7Pepetlai, a raro uni ka saring mot sur tu mani ra a warawai nama Wakak na Wasiso torom mot? A unatino pas iau nisamot, sur mot, mot in labo.
8A los a mani gusun a taro na lotu una ramano kum tamon gisen, sur in warut iau una nung a pinapam epotor tamot. I elar nami ra a wolong anundet a mani sur an papam torom mot.
9A susut na dino a sibo ra a kis tomo nam mot, ikut ka pitar tu maut torom mot. Uni a kum tistising una nurnur tagisa o Masedonia det wanpat, ra det tabor iau nama utna ra a sibo suri. Ka saring tar mot, ma kan saring tar mot kai sur tu utna.
10I lingmulus, a lingmulusino anun o Karisito kuri un iau, ra a inanos mot nama lingmulus lena, kataio una kudulano papor Akaia, in turbat lar pas iau ra a warango iau una nung a petutna torom mot.
11Pepetlai, ra ka saring mani gusun mot, i upuaso i lena, ka nem mot? Awu. O God i tasmani lena, a nem doko mot!
12An pam liklik a kum utna ri a pami, sur det ra det watung det a kum aposel, det in tasmani lena, anundet a pinapam ke elar nam anumet a pinapam. I mo ra katu kibino sur det in warango det una nundet a pinapam.
13Uni a kum musano ra, a kum torotoro na aposel, a kum torotoro na tene pinapam, ma det pukus pas det sur det in tamtama elar nama kum aposel anun o Karisito.
14Awu sur a utna na ukisin torom dat, uni o Satan utkai i ser pukus pasi, sur in tamtama elar nama ensel tagun a talapor.
15Ma ka dat in kisin kai ra anun a kum tene pinapam, det in pukus pas det, sur det in tamtama elar nama kum tene pinapam anun a tokodos na petutna. Numur det in los anundet a ikul, elar ut nam anundet a sakino pinapam.
16An watung meleti lena, gong mot nuki un iau lena a longlong. Ikut ra mot nuki un iau lenra, mot in madek tar a longlong ri sur in warango pasi ut.
17A lingmulus, ra a warango pas iau ut, ka wasiso elar nama nemnem anun a Labino, i elar kut nama longlong.
18A susut na taro det warango pas det elar nama ngasino anun a rakrakon bual, i mo ra iau kai an warango pas iau ut.
19Mot madek tari kut a kum longlong na taro sur det in ususer mot, uni mot mananos doko.
20I lingmulus, mot gas pas det, ra det ukarabus mot ma det ban laulau mot, ma det urop ru anumot a kum utna ma det ulabo pas det umatamot, ma det pasor a kum masmasari mot.
21A maimai doko ra an watungi lena, met ut kalako dekdeki met sur met in pam a kum petutna ri torom mot! A kum utna ra det warango pas det uni, iau kai, a pet lar pasi sur an warango pas iau ut uni. A wasiso elar nama longlong.
22Det warango pas det lena, det a kum te Ibru, niko? Iau kai a te Ibru. Det a kum te Israel, niko? Iau kai a te Israel. Det a kum nutnutun o Abaram, niko? Iau kai a nutun o Abaram.
23Det a kum tultul anun o Karisito, niko? Iau a wakak na tultul tandet rop. A wasiso elar nama longlong. A papam dekdek bing tandet rop, a sa kis papas una karabus, a kum inaim di pami un iau i dekdek sakit, a susut na dino milau an mat. A kum utna rop ri, ra di pami un iau, i labo taun a utna ra di pami un det.
24A taro Juda det rapus in surung elar nama tulu noino ma lisu na du raprapus. I elar nama limo na dino rop ra det pampami un iau.
25Ara dino di duku iau nama kum watat. Di rapus iau a susut na dino namin nubuku. I elar nama tulu dino rop ra det pami un iau. A tulu dino a iru nama sip tiro utasi. Ara bung na mirum ma ara bung na waspi a salir una epotor na tasi.
26A sa wan una susut na inawan. A elar nama utna na iniru una inawan una kum danim, ma a ramano kum dino kai, milau an iru una laman a kum sakino taro. Milau an barato a iniru tan anung a taro ut, ma tan a kum usiro na taro kai. Milau an barato a iniru una kum tamon, ma una kum nubual kalako taro uni, ma sa utasi. Ma milau kai, an iru ulaman a kum torotoro na tistising una nurnur.
27A dekdek ma a papam dekdek ut. A susut na bung na mirum ka inep. A susut na dino a muruk ma a murak. A susut na dino ka wan tu utna. A ramano kum dino a sibo sur a malu ma a taramo a kotokoto.
28Ara utna kai a etoromi ra i labo doko, i lenri, anung a tamtamabat torom a taro na lotu una kum tamon rop, i maut doko una nung a nilaun una kum bung rop.
29Ra taio tagun det, anun a nurnur i kis pirso, iau kai a pining in ngoro. Ra taio tandet di sa ben tari una sakino, in balang in sungun nami.
30Kan warango pas iau un tu utna gisen, an warango pas iau kut una kum utna ra i upuaso i lena, kalako dekdeking.
31O God, i ra a God anun a Labino o Iesu ma i o Tamano, ra a wasiso na ululabo toromi ken rop ma ken rop, i tasmani ut lena, ka toro.
32Tong o Damaskus, a mugumugu tagun a tamon ra, ra i papam utuntudu ina king Aretas, i utur tar a kum tene tamtamabat una matansako ina in noworo ina tamon, sur det in dat pas iau.
33Ikut, di ukete pirso iau mukut nama rat, una windo na in noworo, ra a laun sikot gusun a laman a mugumugu ra.
