2 Hadì 12:14-20

¹⁴Kekenà, imbayad heini te menge etew he ebpurung duen te valey wey te menge egkeǥamit kayi.

¹⁵Wazè en tulika is listahan te menge neǥastu su egkeseriǥan sikan is menge etew he midumala te kebpurungi zuen te valey te Nengazen.

¹⁶Is selapì he imbeǥey zuma te menge halad su imbayad te salà wey is menge pemuhat he para idlumpiyu, wazà haazà iahuk duen te kahun diyà te valey te Nengazen, su para zà haazà te menge memumuhat.

¹⁷Dutun he timpu, si Hadì Hazael he hadì te Aram midsurung diyà te Gat ne naaǥew zin heini. Ne midisisyun sikandin he edsurungen din daan is Jerusalem.

¹⁸Midtiǥum ni Hadì Joash is langun he menge azen he inhalad te menge kepuun din diyà te Nengazen, ragkes en is kandin he menge inhalad. (Is menge kepuun ni Joash he midhalad dutun he menge azen iyan si Jehoshafat, si Jehoram, wey si Ahazia, he menge hadì diyà te Juda.) Heini is langun impeuwit ni Joash diyà te ki Hazael, ragkes en is langun he vulawan he ziyà te menge budiga zuen te valey te Nengazen wey is diyà te turuǥan. Umbe wazè en surunga ni Hazael is Jerusalem.

¹⁹Is duma pa he ǥuǥud mehitenged te kedhadì ni Joash, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda.

²⁰Dutun te huziyan he timpu nekidsukulà kandin is menge upisyal zin, ne midhimetayan dan sikandin diyà te Bet Milo, diyà te zalan he pehendiyà te Silla.