2 ጴፅሮሳ 3

1

2

3

¹ታ ሲቆቶ! ታኒ ኢንቴስ ፃፊሺን ሃይሲ ናምዓንꬆ ኪታ። ታኒ ኢንቴስ ናምዑ ኪታታካ ፃፊዳይ ሃይታ ሃ ዮዖታ ኣኬኪ ኤኪዲ ኢንቴ ሱሬ ቆፋ ቆፓና ማላ ኢንቴና ቤጎꬃና ጋዳ።

²ሃይሳፌ ካሴ ጌሻ ናቤቲ ዮቲዳ ቃላኔ ቃስ ኢንቴ ሃዋሬታ ባጋራ ኢንቴ ዴሚዳ ኑ ጎዳኔ ኑና ኣሺዳይሳ ኣዛዞ ኢንቴ ዩሺ ቆፓና ማላ ታ ኮያይስ።

³ሃራ ኡባፌ ካሴቲዲ ሃይሳ ዩሺ ቆፒቴ። ዉርሴꬃ ጋላሳታን ቂꬊዛይቲኔ ባ ኢታ ኣሞ ካሊሼ ኣሳ ካꬊዛይቲ ያና።

⁴ኢስቲ ቃስ “ጎዳ ዬሱሲ ‘ያና’ ጊዛ ሂዶታይ ዮቴቲቤኔ? ሂስቲን ኢዚ ኣዋን ዲዜ? ቤኒ ኑ ኣዋቲ ሃይቆሳፔ ሃ ሲሚን፥ ሃኒዛ ሚሺ ዉሪካ ሜꬌቶሳፔ ሃ ሲሚን ሄኮ ካሴ ባ ዲዛ ማላ ዴስ” ጌቴስ።

⁵ሄይቲ ሄ ኣሳቲ ካሴ ዳሮ ዎዴፔ ካሴ ሳሎይ ፆሳ ቃላን ሜꬌቶይሳኔ ቢታይካ ሃꬃፌኔ ሃꬃን ዲዛይሳ ኤሪሼ ካዴቴስ።

⁶ሄ ዎዴ ዲዛ ኣላሜዚ ሃꬃን ሚቴቲ ꬋዪዴስ።

⁷ሄሳꬆካ ሃዒ ዲዛ ሳሎይኔ ቢታይ ናጋራንቻቲ ꬋያና ዲዛ ፒርዳ ጋላስ ጋካናስ ታማስ ጊጊ ኡቲዳ።

⁸ታ ሲቆቶ! ኢንቴ ጊዲኮ ጎዳ ኣቻን ኢሲ ጋላሲ ሺ ላይꬃ ማላ፥ ቃሴካ ሺ ላይꬂ ኢሲ ጋላሳ ማላ ጊዲዳይሳ ሄሳ ሄ ሃኖዛ ባሎፒቴ።

⁹ኢሲ ኢሲ ኣሳታስ ሚሳቲዛ ማላ ጎዳይ ባ ዮቲዳ ሂዶታ ቃላ ፖላናስ ጋምዔናኮ ሺን ኣሲ ዉሪካ ማሬታና ማላኔ ኣይ ኣሲካ ꬋዮንታ ማላ ኮይዲ ኢዚ ኢንቴ ጊሽ ታኬስ።

¹⁰ጎዳ ጋላሳይ ቃሴ ካይሶ ዬꬃ ማላ ቆፖንታ ዲሺን ጋኪ ዎꬋና። ሄ ጋላስ ሳሎቲ ጊታ ጊሪሳን ኣꬋና። ሜꬌቴꬂ ዉሪካ ታማን ፁጌቲ ꬋያና፤ ቢታይኔ ኢዛ ቦላ ዲዛዚ ዉሪካ ፁጌታና።

¹¹ሄሳ ጊሽ ሄይቲ ዉሪካ ሄሳꬆ ꬋያናዚ ጊዲኮ ሂስቲን ኢንቴ ጌሻቴꬃን ፆሳስ ጎይኒሼ ዳናስ ኢንቴስ ዋኒ ቤሴኔ?

¹²ሄሳ ጊሽ ፆሳ ጋላሳይ ያናይሳ ኢንቴ ላሞቲዛይታኔ ኢዚ ኤሌሊ ያና ማላ ኦꬂዛይታ ጊዲቴ። ሄ ጋላስ ሳሎይ ታማን ፁጌቲ ꬋያና። ሜꬌቴꬃቲካ ታማ ሴላን ሴራና።

¹³ጊዶ ኣቲን ኑኒ ኢዚ ኑስ ኢሚዳ ሂዶታ ማላ ፂሎቴꬃ ኦሶይ ኦሴቲዛሶ ኦራꬃ ሳሎኔ ኦራꬃ ቢታ ናጎስ።

¹⁴ሄሳ ጊሽ ታ ሲቆቶ! ሄሲ ዉሪካ ሃናና ጋላስ ኢንቴ ናጊሼ ዲኮ ጎዳይ ኢንቴና ኢንቴ ቦላ ቦሮይ ባይንዳ ዲሺን ሳሮቴꬃን ዴማና ማላ ሚኒ ዲቴ።

¹⁵ኑ ጎዳ ዳንዳያይ ኢንቴና ኣሻናስ ጊዲዳይሳ ኢንቴ ኤሪቴ። ኑ ሲቆ ኢሻ ጳዉሎሲ ባስ ኢሜቲዳ ኤራቴꬃ ማላ ኢዚ ኢንቴስ ፃፊዳይሲ ሃይሳ።

¹⁶ኢዚ ሃይሳ ሃ ሃኖዛ ጊሽ ባ ኪታታን ኡባን ሃይሳꬆካ ፃፊዴስ። ኢዛ ኪታታ ጊዶን ኤራናስ ዋይሲዛ ኢሲ ኢሲ ሃኖቲ ዴቴስ። ኤራቴꬂ ኢስታስ ፓጪዳይቲኔ ናምዑ ቆፋን ዮቁ ጊዛይቲ ሃራ ጌሻ ማፃፋታ ሚርቂዛይሳꬆካ ሃይታካ ኢስቲ ሚርቃና። ኢስቲ ሄሳꬆ ኦꬂዛይ ባስ ꬋያናሳ።

¹⁷ታ ኢሻቶ! ኢንቴ ቃስ ሄሳ ካሴቲዲ ኤሪዳ ጊሽ ሃንኮ ማካላታ ባላ ጌዶን ጎሼቲ ቢዲ ካሴ ኢንቴ ሚኒ ዲዛሶፔ ኩንዶንታ ማላ ናጌቲቴ።

¹⁸ሄሳፌ ቦላራ ኑ ጎዳኔ ኑ ꬋሌ ዬሱስ ኪርስቶሳ ኪያቴꬃኒኔ ኢዛ ሻኪ ኤሮን ፑዴ ዲጪቴ። ኢዛስ ሃዒካ ሜርናስካ ቦንቾይ ጊዶ። ኣሚን።