2 ጴፅሮሳ 1

1

2

3

¹ዬሱስ ኪርስቶሳ ኦሳንቻኔ ኢዛን ሃዋሬ ሲሞና ጴፅሮሳፔ፥ ኑ ጎዳፔኔ ኑ ꬋሌ ዬሱስ ኪርስቶሳፔ ቤቲዳ ፂሎቴꬃ ባጋራ ኑ ዴሚዳ ኣማኖ ማላ ቦንቼቲዳ ኣማኖ ዴሚዳይቶ!

²ፆሳኔ ኑ ጎዳ ዬሱሳ ኤሮን ኪያቴꬂኔ ሳሮይ ኢንቴስ ጊዶ።

³ባ ቦንቾኒኔ ባ ኪያቴꬃን ኑና ፄይጊዳይሳ ኑኒ ኢዛ ኤሪዳ ጊሽ ኢዛ ፆሳቴꬃ ዎልቃይ ዴዖሲኔ ፆሴ ጎይናናስ ኑስ ኮሺዛዝ ዉርሲ ኢሚዴስ።

⁴ባ ቦንቾኒኔ ባ ኪያቴꬃን ቦንቾ ዎጋይ ዲዛይሳኔ ኬሂ ጊታ ጊዲዳ ኢዛ ሂዶታ ኑኒ ዴሚዶስ። ሄይታንታ ባጋራ ኢንቴ ኢታ ኣሞ ጋሶን ሃይሳ ሃ ኣላሜዛን ዲዛ ꬋዮፔ ኬሲ ኤኪዲ ፆሳቴꬃ ሃኖዛፔ ኢዛራ ጊሼቲዛዴንታ ጊዲዴታ።

⁵ሄሳ ጌዶን ሃይሳፌ ካሊዛ ሚሻቲ ኢንቴስ ጉጄታና ማላ ኣኔ ሚኒቴ። ኣማኖ ቦላ ኪያቴꬅ፥ ኪያቴꬃ ቦላ ኤራቴꬅ፤

⁶ኤራቴꬃ ቦላ ባና ሃሮ ባና ሃሮ ቦላ ዳንዳያን ሚኔቴꬅ፤ ዳንዳያን ሚኔቴꬃ ቦላ ፆሴ ጎይኖ፥

⁷ፆሴ ጎይኖ ቦላ ኢሻንታ ዶሴቴꬂ፥ ኢሻንታ ዶሴቴꬃ ቦላ ሲቆ ጉጂቴ።

⁸ሃይቲ ኢንቴስ ዳሪ ዲዛዝ ጊዲኮ ሄይቲ ኢንቴና ኢንቴ ጎዳ ዬሱስ ኪርስቶሳ ኤሮን ጎዓይኔ ኣይፌይ ባይንዳይታ ጊዶንታ ማላ ናጋና።

⁹ሃይቲ ሃ ሚሻቲ ባይንዳ ኣሲ ጊዲኮ ሃሆን ዲዛ ሚሽ ዴሞንታ ቆቄ ኣሳ ማላ። ሄሳዴይ ካሴ ኣꬊዳ ባ ናጋራፔ ጌይዳይሳካ ባሌቲዴስ።

¹⁰ታ ኢሻቶ! ሄሳ ጊሽ ኢንቴ ፄይጌቲዳይሳኔ ዶሬቲዳይሳ ሻኪ ኤራናስ ኬሂ ኣሞቲዛይታ ጊዲቴ። ኢንቴ ሄሳꬆ ኦꬂኮ ሙሌካ ꬉጴቴኬታ።

¹¹ኢንቴ ሄሳꬆ ሃኒኮ ሜርናፔ ሜርናስ ዲዛ ኑ ጎዳ ዬሱስ ኪርስቶሳ ካዎቴꬃን ጌላናስ ኢንቴስ ኩሜꬃ ማታይ ኢሜታና።

¹²ኢንቴ ሃይታ ሃ ዮዖታ ኤሪዲኔ ሄ ኢንቴ ኤሪዳ ቱማን ሚኒ ዴዒኮካ ሄይታ ታኒ ኢንቴና ቆፊሳናፔ ጉዬ ጊኬ።

¹³ታኒ ፓፃ ዲዛ ዎዴ ኡባን ኢንቴና ኡባ ዎዴ ዴንꬄꬃናይሲ ቤሲዛዝ ሚሳቲዲ ታስ ቤቴስ።

¹⁴ኑ ጎዳ ዬሱስ ኪርስቶሲ ታስ ቆንጪሲዳ ማላ ታኒ ሃይሳ ኣላሜዛፔ ኤሌላዳ ሃይቃናይሳ ታ ኤራይስ።

¹⁵ታኒ ሃዒ ሚኔቲዛይ ታ ሃይቃዳ ኢንቴፌ ሻኬቲዳፔ ጉዬ ኢንቴ ሃይታ ሃ ዮዖታ ኡባ ዎዴ ቆፓና ማላሳ።

¹⁶ጎዳ ዬሱስ ኪርስቶሳ ዎልቃፌ ኢዛስ ዩሳ ጊሽ ኑ ኢንቴስ ዮቲዳ ዎዴ ኑኒ ኑ ኣይፌራ ኢዛ ቦንቾዛ ቤዪዲ ማርካቶስ ኣቲን ኣሲ ጮ ሜላ ሜꬊ ኤኪዲ ጌኔ ሃሳዪዛ ሃይሲዔ ማላ ጊዴና።

¹⁷“ታኒ ኢዛን ኡፋዬቲዛዴይ ታ ዶሲዛ ታ ናዚ ሃይሳ” ጊዛ ቃላ ጊሪሳይ ጊታ ቦንቾራ ኢዛስ ዪዳ ዎዴ ኢዚ ፆሳ ኣዋፔ ቦንቾኔ ጊታቴꬅ ኤኪዴስ።

¹⁸ኑኒ ኢዛራ ኣንጄቲዳ ዙማ ቦላ ዲሼ ሃይሳ ሃ ሳሎፔ ዪዳ ጊሪሳ ኑኒ ኑ ሃይꬃን ሲዪዶስ።

¹⁹ሄሲ ዉሪካ ካሴ ናቤቲ ዮቲዳይሲ ቱሙ ጊዲዳይሳ ሎዔꬅ ቆንጪሴስ። ሄሳ ጊሽ ኢንቴ ꬉማሶን ፆምፔስ ሎዔꬅ ናጌቲዛይሳ ማላ ካሴ ናቤቲ ዮቲዳይሳ ሎዔꬂ ናጌቲቴ። ኢንቴ ሄሳꬆ ኦꬃናይ ጋዴይ ዎንታናስ፥ ባዞይ ዞዓና ጋካናሲኔ ዎንት ማꬃ ፆሊንቴዚ ኢንቴ ዎዝናን ፖዓና ጋካናሳ።

²⁰ኢንቴ ሃራፔ ኣꬂ ቆፓናስ ቤሲዛይ ጌሻ ማፃፋን ዲዛ ቲንቢቴ ቃላን ዮቴቲዳ ኣይ ሚሺካ ኦኒካ ባስ ሚሳቲዳ ማላ ቢርሻናስ ቤሴና።

²¹ኣይ ቲንቢቴይካ ኣሳ ሼኔ ማላ ሙሌካ ዪቤና። ጊዶ ኣቲን ቲንቢቴይ ዉሪካ ፂሎ ኣያናይ ካሌꬂን ኢዛ ካሊዳ ኣሳቲ ፆሳፌ ኤኪዲ ዮቲዳዛ።