2 ጴፅሮሳ 2

1

2

3

¹ጊዶ ኣቲን ቤኒ ዎዴ ዎርዶ ናቤቲ ዴሬዛ ጊዶን ዲዛይሳ ማላ ሄሳꬆካ ሃዒ ኢንቴ ጊዶን ዎርዶ ኣስታማሬቲ ዴዓንዴቴስ። ሄይታንቲ ኣሳ ꬋይሲዛ ዎርዶ ቲሚርቴ ቆታራ ዲጫና ማላ ኦꬄቴስ። ባና ኣሺዳ ጎዳካ ካዲዲ ባና ኤሶን ꬋይሲዛዝ ባ ቦላ ኤሄቴስ።

²ሄሳ ጌዶን ዳሮ ኣሳይ ዬላቺዛ ኢስታ ኦጌዛ ካሌስ። ሄ ኢስታ ኦሶዛ ጌዶን ቱማ ኦጌይ ጫዬቴስ።

³ሄይቲ ዎርዶ ኣስታማሬቲ ሚሻስ ጋጲጋጲዛ ጊሽ ባርካ ሜꬊ ኤኪዳ ዮዖ ዮቲ ዮቲዲ ኢንቴስ ዲዛዝ ባስ ቦንቂ ኤኬቴስ። ቤኒ ቤኒ ዎዴሶፔ ፒርዳይ ኢስታስ ጊጌቲ ኡቲዴስ። ኣዳፌ ኢስታ ꬋዮይ ናጌስ።

⁴ሃራይ ኣቶ ሺን ናጋራ ኦꬂዳ ኪታንቻታስ ፆሲ ሚሼቶንታ ኢስቲ ጪማ ጊዲዳ ꬉማ ኦላ ጊዶን ዴዒዲ ፒርዳ ጋላስ ጋካናስ ናጌታና ማላ ጌዴ ጋናሜን ዬጊዴስ።

⁵ሄሳꬆካ ፂሎቴꬃ ጊሽ ሳባኬ ጊዲዳ ኖሄ ሃንኮ ላፑን ኣሳታራ ኣሺዲ ፆሳስ ጎይኖንታ ኣሳቲ ዲዛ ኣላሜዛ ቦላ ꬋይሲዛ ሃꬄ ኤሂሼ ቃꬌቲዲ ካሴ ሄ ዎዴ ኣላሜዛ ማሪቤና።

⁶ቃሴካ ፆሴ ጎይኖንታይታ ቃፃያናስ ኡባስ ሌሚሶ ጊዳና ማላ ሶዶሜይኔ ጋሞራ ካታማቲ ቢዲንꬅ ጊዳና ጋካናሲኔ ፁጌቲ ꬋያና ጋካናስ ኢስታ ቦላ ፒርዲዴስ።

⁷ዎጋይ ባይንዳ ዬላቺዛ ኦሶ ኦꬂዛ ኣሳታ ኦሶን ኡባ ዎዴ ሶዑ ጊሼ ዲዛ ፂሎ ሎፄ ጊዲኮ ኣሺ ኤኪዴስ።

⁸ሄ ፂሎ ኣዴዚ ኢስታ ጊዶን ዲሺን ጋላስ ጋላስ ኢዚ ቤዪዛይሳኒኔ ሲዪዛይሳን ሄ ዎጋይ ባይንዳ ኣሳታ ኦሶዛን ኢዛ ሼምፖያ ዋዬታዱስ።

⁹ሂስቲን ሄሲ ዉሪካ ሄሳ ማላ ጊዲኮ ጎዳይ ባስ ጎይኒሼ ዲዛ ኣሳታ ፓጬፔ ኣሻናይሳኔ ናጋራንቻታካ ዎስቲ ቃፃያናኮኔካ ፒርዳ ጋላሳስ ዎስቲ ኢስታ ናጊዲ ጋꬃናኮኔ ሄሳ ኢዚ ኤሬስ ጉሳ።

¹⁰ሃራፔካ ሄይቲ ቱና ጊዲዳ ባ ኣሾ ኣሞ ካሊዛይታኔ ፆሳ ጎዳቴꬅ ካꬊዛይታ ፒርዳ ጋላሳስ ናጊ ዎꬂዴስ። ሄይቲ ዎርዶ ኣስታማሬቲ ኢስቲ ፃላታኔ ኦቶራንቻታ ጊዲዳ ጊሽ ሳሎ ቦላ ኢስታስ ጎዳቴꬂ ዲዛይታ ጫዪሼ ባቤቴና።

¹¹ኪታንቻቲ ኢስታፌ ቦላራ ዎልቃይኔ ጎዳቴꬂ ዲዛይታ ጊዲኮካ ጎዳ ሲንꬃን ኢስታ ቦላ ካꬌ ቃላ ኬሲ ሞቴቴና።

¹²ሄይቲ ዎርዶ ኣስታማሬቲ ቃስ ባስ ኤሬቶንታ ኢፂዳ ሚሽ ዉርሲ ጫሺ ጫዬቴስ። ሄይታንቲ ናርፃን ኦይኬታናሲኔ ሃይቃናስ ዬሌቲዳ። ጮ ሜላ ባ ሼኔን ዲዛይታኔ ቆፋይ ባይንዳ ዶዓታ ማላ። ዶዓቲ ጮ ሜላ ꬋዪዛይሳꬆ ኢስቲካ ሙሌራ ꬋያና።

¹³ቆሆ ኦሶ ኦꬂዳ ጊሽ ኢስቲ ሙሌራ ባ ኦሶ ዋጋ ኤካና። ኢስታ ኡፋይሲ ሴታ ጋላስ ማꬆቴꬂኔ ዎጋይ ባይንዳ ቡራቆ። ኢስቲ ሄሳ ማላ ዎጋይ ባይንዳ ጉፋን ኢንቴናራ ኢሲፌ ፄይጌቲዛ ዎዴ ኣስ ባሌꬂዛ ባ ኣሾ ኦሶዛን ኢስቲ ኢታኔ ዬላቺዛይታ።

¹⁴ኢስታስ ናጋራ ኦሶፔ ናጌቶንታ ኣሞቲዛ ኣይፌይ ዴስ። ኢስታስ ናጋራ ኦሶ ሲቂዛ ኣሞቴꬂ ኣይ ዎዴካ ሲሜና። ኣማኖን ቡሮ ሚኒ ኤቆንታ ኣሳታ ባሌꬄቴስ። ሚሻስ ጋጲጋጴቴስ። ኢስቲ ቃንጌቲዳይታ።

¹⁵ኢስቲ ሱሬ ኦጌዛ ኣጋጊዲ ꬋዪዳ። ኢታ ኦሶ ኦꬂዲ ዴሚዛ ሚሽ ሲቂዳ ቢዖሬ ና ባላዓሜ ኦጌ ቢዲ ባሌቲዳ።

¹⁶ባላዓሜይ ጊዲኮ ባ ኦꬂዳ ናጋራ ጊሽ ሴሬቲዴስ ሺን ሃሳያ ኤሮንታ ሃሬያ ኣሳ ቃላን ኢዛስ ሃሳያዳ ሄ ናቤዛ ባላፔ ሴራ ዛራዱስ።

¹⁷ሄይቲ ሄ ኣሳቲ ሃꬂ ባይንዳ ፑልቶታ። ጎቴ ጫርኮን ቢዛ ሻራ ማላ፤ ኢስታ ሳካና ꬉማይ ናጌስ።

¹⁸ካሴ ባላ ጋርሳን ዲዛ ኣሳታ ጊዶፌ ኬሲ ኤኪ ዪዲ ዳሮ ጋምዖንታ ኣሳታ፥ ጮ ሜላ ሃዳ ጊዲዳ ኦቶሮ ቃላ ሃሳያን፥ ኣሾ ኣሞኒኔ ላይማን ባሌꬄቴስ።

¹⁹“ኢንቴ ዎዜታና” ጊሼ ኢንቴስ ኡፋይስ ኢሜቴስ። ፆኔቲዳ ኣሲ ባና ፆኒዳዴስ ኣይሌ ጊዲ ሃሬቲዛይሳꬆ ኢስቲካ ባስ ናጋራስ ኣይሌ።

²⁰ኑ ጎዳኔ ኑና ኣሺዳ ዬሱስ ኪርስቶሳ ኤሪዲ ሃ ኣላሜዛ ቱናቴꬃፌ ኬሲ ኤኪዳፔ ጉዬ ቃሴካ ጉዬ ሲሚዲ ሄ ካሴ ቱናቴꬃን ፆኔቲዲ ጌሊኮ ኢስታስ ካሴይሳፌ ጉዬይሲ ኣꬎ ኢታ ጊዳና።

²¹ኢስቲ ፂሎቴꬃ ኦጌ ሻኪ ኤሪዳፔ ጉዬ ኢስታስ ኢሜቲዳ ጌሻ ኣዛዞዛፔ ጉዬ ሲማናፔ ኢስቲ ካሴ ሄ ፂሎቴꬃ ኦጌዛ ኤሮንታ ኣጊዳኮ ኢስታስ ሎዖሺን።

²²“ካናይ ባ ጮዪዳ ጮሻ ማናስ ጉዬ ሲሜስ” ሄሳꬆካ “ጉዱንꬂ ሜጬቲዲ ጉዬ ሲሚ ኡርቃን ጌንዴሬቴስ” ጌቴቲዛ ቱሙ ሌሚሶይ ኢስታ ቦላ ጋኪዴስ።