1 Yoane 2:2-12

²I tamwata ipile ne via ku imâte ŋana izavaru nenda kiesaka piti kâ. Andeta i ŋandai iveta mine ŋana ivila kinda simbonda nâ. Iveta mine ŋana ivilanzi tamâta rârâni simo tâno ndoni.

³Ambo kinda ma tapaveta kuku Maro Kindeni ne tukuŋa, ande vetâŋa ŋinde ma itula pwataki pa warakânda tu kinda tasama i kilala sondo ndo.

⁴Ambo tamâta toŋge ma iporo tu, “Naŋa asama Maro Kindeni kilala sondo ndo”, andeta i ŋandai ipaveta kuku Maro Kindeni ne tukuŋa ŋga, ande tamâta ŋinde nde laŋeŋa tamwata, aku ŋgua mao ikeno i ilo kalo, ande tia.

⁵Ambo tamâta toŋge ipaveta kuku Maro Kindeni kawa ŋgua, ande i ne vetâŋa ŋinde itula pwataki tu i ilo ndo ikeno mao nâ pa Maro Kindeni. Mâsi taituni ŋinde uru itula pwataki tu kinda tapaipa kuku Maro Kindeni lâ.

⁶Ambo tamâta toŋge ma iporo tu, “Naŋa apaipa kuku Maro Kindeni lâ”, ande i ne ŋgua ŋinde ma ipâŋga kanaŋo mine; i ma iveta vetâŋa ara, itogo Yesu muŋga iveta mine.

⁷Niŋgu-nambwe wukale, naŋa ma aŋgere ŋgua tukuŋa wasaseki toŋge imâ pami, ande tia. Ŋine nde tukuŋa siŋga, aku miki kakai muŋgani lâ. Miki kaloŋo ŋgua ŋana tukuŋa ŋine kâ marumbu lâ.

⁸Andeta tukuŋa kala ŋine naŋa ma aŋgere pami, ande tukuŋa wasaseki tona. Miki nemi vetâŋa ara tava Yesu ne vetâŋa ara, ande ŋinde itula tukuŋa ŋinde kilala pwataki tu ŋinde nde ŋgua mao. Ŋana tu kondoma ŋga laiti ŋana marumbu kâ, aku sinâla mao ŋinde nde imâ ipâŋga lâ, kala imo isinala nia lâ.

⁹Ambo tamâta toŋge ma iporo tu, “Naŋa amo lâ sinâla ilo”, andeta i uru wisi nâna pa ninambwe kalo-tawana tamâta toŋge, ande i imo lâ kondoma ilo yo.

¹⁰Tamâta ea uru tini mwasa nâ panzi ninambwe kalo-tawana tamâta, ande i imo lâ sinâla ilo, aku kelekele toŋge ŋana iveta i pata ndue kâ, ande tia.

¹¹Aŋga tamâta ea uru wisi nâna pa ninambwe kalo-tawana tamâta, ande i imo kondoma ilo ku iyoka lâ kondoma ilo. Aku izizâla tu i ilâ pa nia ndia, ŋana tu kondoma nde ipono i mata ndo lâ.

¹²Naŋa natuŋgu wukale, miki kalomi tawana Yesu Kirisi, aku ŋana duvi ŋinde kâ Maro Kindeni izavaru nemi kiesaka piti lâ. Mine kala naŋa aŋgere ŋgua ŋine imâ pami.