1 Jon 2:2-12

²Tuna mani ivere meyei da ivi suwara da ita berabero ivi miiyei na God ina nuwapughu ivi nubai. Ma ke tota kava kubiita ma wawaya dobu ku kudubina kamonai yavata i berabero ivi miiyei.

³Ikikava takova kiimatani da namada God yavata tavi nuwasago? Weni nakanani takovi. Ina sisiya bagibagisi tavotekatekei.

⁴Ma tam iyai kuna vona bo, “Keriso akovi,” ma ina sisiya bagibagisi ke kuta vovotekatekei, tam na viviberom ma vonavaghata gwabimuwai kegha.

⁵Ma tam iyai vonana kevovotekatekei na kuvi debe meyem da God nuwanuwana namada kuviiya. Vonana kevovotekatekei na takovi da tam God yavata koinuwasago.

⁶Iyi tam kevonavona da God yavata koinuwasago na Yesu dobuwai ikikava imakai na tuna yawasina kava kevi bonebonei.

⁷Turaturaku, tami nuwanuwaku. Agirugiruma kurimi na sisiya bagibagina avonavonavinotimi, tuna sisiyina na katamanina, ke vuna, iyamna rorova vitumaghana kovi karei na akovina koviiya. Ma sisiyina bagibagina na weni. “Kovi nuwaviinavivirana.” Tuna namada kovi yanei.

⁸Tuna katamanina ma kegha da Keriso ipisi na sisiyina ivi vuni ma bade taku kurimi agirugirumi. Takovi da nani sisiyina bagibagina na vonavaghata, iyamna namada Keriso ina yawasa ivi debei ma bade ami yawasa idebei. Takitakitai da gwabimiyai didibara berasi na ekovikovi ma yasegana vaghata namada erakarakata.

⁹Meni wawayina evonavona da yasegana kamonai emakamakai ma Keresiyana varesina ibarakamtawei, tuna patana da didibara yawasina kamonai emakamakai.

¹⁰Ma meni wawayina Keresiyana varesina nuwanuwana eviiviiya na yasegana kamonai emakamakai. Ma ke meyani ina bera beroi da varesina ina peku.

¹¹Meni wawayina varesina ibarakamtawei na tuna na didibara yawasina kamonai emakamakai ma ke itakovi da mike enenae, iyamna matana ididibarapotai.

¹²Natunatuku, tami nuwanuwaku. Agirugiruma kurimi, iyamna Keriso avanai na God ami berabero inotatawei.