1 Jon 2:2-12

²Ya, Krais le badeh, i nyara salom ta sikine ma mani kandriyen ndra-in tataha mari iu. Iy amekes lahou doh badeh, ta aseben taha le bwe, iy amekes ta aseben lau mara-ei badu kon munyak.

³Taha tanan lakou dah: Buku taha a-en hamon tiri batanau tan, taha ndrame ndratanan iy ai.

⁴Buku ari ndramak asehek anya, “Jo ta Kindrei handru ma jo tanan iy,” arile, iy ba-en hamon tiri sahou, nane Kindrei edeu eme tataha ta a-en hamon ta aliy bwai, sebwe iy ndramak doh ta wendreya. Ma sahou ta Kindrei handru badeh, bado ndrinen bwe.

⁵Arile, buku are lau in hamon ta sahou ta Kindrei handru, iy badeh, leheya so-ok ta Kindrei udu bolo kandriyen tan eme lewan. Ta san le doh, taha atanan buku taha a-en hamon ta Kindrei handru.

⁶Ya, buku are lau anya, “Jo ta Kindrei” o “Kindrei udu hawek,” tekedek ma hawe kandriyen tan mara-ei badeh, ki buku le ta Jises.

⁷Wurah lomada aha kawas tek, jo batorou batanau ha-un bawek taha bwe, batanau malen le mene, kabatana aha asahan lau ta Kindrei. Sahou batanau malen doh badeh, aha ndranuhun ndra bwena labai.

⁸Arile, jo badeh, atorou batanau ha-un ewek taha; ma aha anyolom moson ta aliy badeh, udu tan ma aha ale, tasah lulik anya ki-iu ai, ya lomada sun handru ndranya.

⁹Buku ari ndramak anya, iy badu lomada sun, arile iy badeh, baso-ok iri lau ta Kindrei rayah ja bwe, ya iy ndramak doh badeh, udu ndra bolo lulik kahis.

¹⁰Are lau mwan o badih, iy aso-ok nadu tinen iri rayah ja, iy doh badeh, udu bolo lomada sun, ma ari lakou ja winiyan batawi iy ta amekes are lau taku ja bwai.

¹¹Arile, are lau mwan o badih, buku iy baso-ok nadu tinen iri rayah ja bwe, iy badeh, edek ili eme udu ndra bolo lulik kahis; iy bala tanan, ta iy ilih heh bwe, tasah lulik badeh, ndrabwidi madan ndralik.

¹²Ado naduk, jo atorou la-ukei dah ewek tado, tasah Kindrei badeh ndramani kandriyen ndra-in taha ndra-au na gok ta Krais mene ndramesekei.