1Horo ogoningi Madadiasa ibu Yarusaleme wahalu Modeini tano pu hene. Madadiasa ibu Yone igini howa Yone ibu Simeono igini hene. Ani bialu Simeono ibu agali loma binigo mo miaga Yahoiaribi aria mbira hene.
2Madadiasa ibu igini duria hene. Igiri mbirago mini Yone henego ibu mini mende Gadi laga hene.
3Igiri mende Saimono henego tigua ibu mini Tasi laga halu
4tebone mini Yudasa henego mini mende Magabeusu laga halu
5manego mini Eleasa henego mini mende Abarana halu dauni mini Yonadana henego mini mende Abusu laga hene.
6Ai Madadiasa ibugua handalu hearia wali agalime Yuda dindi bibahendenibi Yarusalemenibi tigua Ngode Datagaliwabenaga bi mana lo wini ngago bibahendeore puguai halu heago hondowa ibugua lalu,
7Ainde mbirale ko ayu íbu ngaruni hondoliya i̱ ai̱yahanda i̱ aginaga taba henenedabe. Ainde Ngode Datagaliwabenaga tano loma biahe wiago bo gialahole biai hene wialu wali agali i̱ damene bu heneru bibahende homai hayago i̱ni deme hendedogoni. Ai horo tano ogoni waitigi heago mo miyangi wali agalime de hangu handaya ho bereagola agali tara tagira howa ibini biarume Ngode Datagaliwabenaga anda kago ti karulalu handaya ho kagonida.
8Agali mini nawi daga nawi mbira kaligobi Anduane Homogonaga anda biago mo ko halu mo ngubia hene kagonida.
9Mbirale lotunaga biabe biaga wiaru bibahende waitigime mo yu piaiore hayagonida. Waneigini bu hearu tano gibuni wiagoha bo wahai haya. Igiri daliahe hearu wai biagane ayu tibu nene gadele ngagome dabalu bo wahai haya.
10Ainde ayu wali agali dindi tara tara wiaruha howa Isaraelenaga tano wiaruha íbu hai howa tinaga mbirale wiaru mo pagebu yai haragonida.
11Tanonaga yári tara tara wiaru bo gialo yai haya. Ayu ibuha mbirale mbira nawi bameore garabaya biabe bia haga agali hagagobi nga. Ani bialu ibuni hameledago bilo golope hene ndo nga.
12Anduane Homogonaga anda baya taraore kago de handa. Bamba ibu inanaga yári biahe taraore mbira hayago ai ayu agali tara bu hearume ibalu bo gialohole binigo ibuha mbirale bayale lenego mbira nawi bameore ngagoni ndobe.
13Ainde inabi homai holene ngago nahome ibagabu kemago agua buleda, lene.
14Ai Madadiasa halu ibu iginiru tinaga miniha genda timbuni yu howa tinaga aga bu hearu minu lerelai halu dara ho howa karu lagane aga ko wiaru karu lo howa dugu bialu hene.
15Ainde kininaga biabe biaga agali haguane wali agalime Ngode Datagaliwabe erembira mialu helo mo bia haga bu hearume Modeini tanoha wali agali bu hearume mbirale bi pupu wiaga gime wabini wiagohondo bi pupu wilo mo bia hole ibini.
16Isaraele wali agali dewaore agali haguane uruni heba mandagi heagola Madadiasa hangu ibu dameneru heba mandagi gibuniha hene.
17Ani heagola agali haguane kininaga biabe biaga biarume Madadiasahondo hale halu lalu, Í̠ agali tano ogonaga haguane howa ogoha mini lene timbuni mbira í̠ kegoni. Ani kegola í̠ igini bu karubi í̠ damene bu karu tibi nde í̠ talima ibaga kagoni.
18Ai í̠na kininaga bi ledago talialu ho bamba howa bialu ha nabi kego agibe. Wali agali tara tara bu karume Yuda wali agali heba maru Yarusalemeha karubi tigua taluwa bialu kago. Ainde í̠nabi ogonidagua bialu hariyagua nde í̠nibi í̠ iginibi tí mini kininaga nenege laga karu aria dege holeberemi. Ani howa ti mini lene timbuni howa muni silibabi ngolobi yári tara tarabi bame mo turu halu ngulebira, lene.
19Ani layagola Madadiasa ibugua hongo howa bi ladai bialu lalu, Wali agali bibahendeore dindi bibahende kini ibugua handaya ho kagoha bu karume ti mamalinaga bi pupu wiaga mana ngaru wahai halu kininaga mana ngago talialu hai heaguabi i̱na anidagua bulene nawiore.
20I̱nibi igini bu karubi i̱ damene bu karubi ina bibahendeore Ngode Datagaliwabehanda habo nalolene bi inanaga mamaliru baba lo winigo hongo howa yu haabo holeberema.
21Heneneore gi dolalu larogo iname Ngode Datagaliwabenaga bi mo wahalu polenebi mana lo wini ngago pugualu polenebi nawiore.
22Iname kininaga bi hale naholeberema. Ani bialu inanaga lotu laga ngago mo aribia naholeberema ndobe, lene.
23Madadiasa ibugua bi ogoni lai hayagola Yuda agali mbirame wali agalinaga deni heyu howa mbirale dama mitangi bialu bi pupu wiaga gime wabini wiagonaga lomabu delaga dabu wiagoria heyu howa lomabu mule bialu hene.
24Ani biyago Madadiasa ibu de hondowa ibunaga miniha tandaga timbuniore ira hunguale bialu tingini bibahende durula gimbu bini. Ani biyagola abale pogolalu pua agali lomabu delole bialu hayago ayu tibume gaibu dibuwa lomabu delaga dabu ibuni hayagoria ngelene.
25Ani buwa kininaga biabe biaga agali haguane wali agalihondo loma ogoniale bu deladaba lowa bi lalu hayagobi o heagoriani heaore abale tibume burulaki ho ngelene. Ani buwa bi pupu wiaganaga lomabu delaga dabu bu heleagobi bo gialo wahai hene.
26Ainde Madadiasa ibugua o biyadagoni Ngode Datagaliwabenaga bi mana lo wini ngago yu tiga ogobi bido lalu mo walia hene. Bambaore Piniasahanda Salu igini Simiri ogonidagua dege bialu bo wahene.
27Ani bialu Madadiasa ibu hariga pugu biagoha pialu howa bi ladaga halu lalu, Wali agali maru Anduane Homogonaga bi mana lo ngago mitangi bu haabo howa ibunaga habo nalolene bi lo ngago talialu haga kemiru tí ayu ogoni i̱ talima ibidaba, lene.
28Ani lalu Madadiasa halu ibu igini biaru tinaga mbirale wiyadaru bibahende tanoha ngelalu tini hari bare wiagoha ha do hole ibida pene.
29Horo ogoni Isaraele wali agali dewaore Ngode Datagaliwabenaga mana ngago talialu hole hame lene.
30Ai ti genda tandagala dewaore yu henegome ai tinaga walibi waneiginibi tinaga nogo bulumagarubi dabudabu wiarubi mo yai halu dindi ko wali agali nahaga wiagoha hole pene.
31Ani peaha ami haru hagabi ami agalibi Yarusaleme Debidinaga tano wiagoha anda hongohe biagoha hayaru ti hale halu hearia wali agalime kininaga bi mo wahalu tini ha do hole ibida piya layago hale hene.
32Ani hale halu ami agali dewaore wali agali uruni haruru talima pene. Pialu wai Sabada horongi bulenaga ti heago hondowa tinaga deni balai anda abale bini.
33Ami agali haru haga agali haguane bu hearume Isaraele wali agali bu hearuhondo laamu halu lalu, Ayu ogoni tínaga henge emeneore ngagonigo ainde tí ha do harimidagoha howa tagira ibalu kininaga mana ngago talialu harimiyagua nde tí homolene nawulebira, lalu laamu hene.
34Ani layagola wali agali biarume ladai bialu lalu, Ndo ina naibuleberema. Kininaga bi ogoni hale naholeberema. Ani bialu Sabada horo mana ngago napuguleberema, lene.
35Ani laya handala ami agali biarume wai abale tungulope halu pene.
36Anigo ainde Yuda wali agali tigua wai biadai nabini. Tigua ege to̱le̱ wiarume dugualu bolenebi tinaga bira do hagane wiago hagira bulenebi bibahende nabiore bame handaya ho hai hene.
37Ani howa tigua lalu, Karulapego ina homoloma̱ya waha. Inaha ko bini nawi bameore hene kemago bame bo waharamigo mana ko timbuniore beremi. Ai ko birimi lalu latagi holene dindi ngagola dahuliya andagala libu ngagoni ndobe, lene.
38Ainde waitigi biarume Sabada horongi wai bini. Ani buwa tigua wali agalibi waneiginibi bibahende daosini mbira (1,000) homelo bo wahai halu tinaga nogo bulumaga bu hearu heba bo wahai hene.
39Ai te Madadiasa halu ibu damene biaru ti hale howa dara timbuni hene.
40Ani howa ai tini dege bi la la bialu lalu, Ina damene urunime biyadadagua nabimi̱ya. Tigua waitigi baba wai bialu badai nabiyadagome tininaga holenebi mana lo wini ngagobi kirabali yu wahai hayada. Ainde inamebi ogonidagua dege birimayagua nde ina damene lenego mbira dindini nahe hameigini mbirago erebaore holobada, lene.
41Ani lalu horo ogoningi dege tigua bi pongo wialu lalu, Ai waitigime ina baba wai Sabada horongi biyagua nde inamebi wai biadai bimi̱ya. Inabi nde ina damene maru tinaga ha do haga wiagoha homayadagua dege homoligo wai biadai bimi̱ya, lene.
42Ai Isaraeleali agali wai biaga hongohe pari wayali Hasidi hameigini laga heneru ibalu Madadiasa heba hatago hene. Ainde Ngode Datagaliwabenaga mana lo wini ngago baba waitigi ho karu baba wai bulenaga ibini.
43Ani bialu Isaraeleali abale ibida pialu ha do ho heneru ibalu Madadiasanaga ami heagoha hatago hai hene.
44Agali uruni hatago hayagola ami agali hongohe mbira tagira pene. Ani howa tigua Isaraele agali mana pugualu piaga biaru baba keba ndo howa ti baba wai bini. Isaraele agali ko uruni aria maru ibida pora bialu puwa wali agali Anduane Homogo mitangi nahaga bu hearu baba pu hene.
45Ai Madadiasa halu ibu nenege agali biarume dama mitangi bialu gime wabini bi pupu wiaga biarunaga lomabu delaga dabu bu helearu bibahende bo gialo wahai hene. Tigua Isaraele igiri emene ngola haga biyaru minu yania howa
46tinaga dongone abale poda mabu nabi heneyagua tigua podaga bini.
47Tinaga waitigi mine haga biaru bama talima pialu ai wai bayaleore bialu hene.
48Tigua agali haguane bu hearumebi agali kini hearumebi Anduane Homogonaga bi mana Mosesehanda lo wini ngago tigua mo nagalone howa pugualu helo hame nale hene. Ani howa tigua agali mana ko biaga bu hearunaga hongo bope hai hene.
49Ai Madadiasa ibu homole biruwa ibu iginiruhondo lamialu lalu, Mine holene mana hongoheore tagira ibalu ina bibahendeore bahandai haya. Ayu kemagoni genda timbuni bu ngangi kema.
50Anigo tí i̱ igini bu kemiru tígua Anduane Homogonaga bi mana lo ngago hongo howa yu halu tigua Ngode Datagaliwabenaga habo nalolene bi ina mamaliru baba lo wini ngago hongo howa talialu kemigonaga harugo lowa homole manda manda bu haabo halimu.
51Ina mamaliru ti dindi ogoria heangi howa bialu henerubi biabe tigua bialu hene ngarubi baya hangu mitangi bialu halimu. Baya hanguore talialu halimu. Ani bialu kemigola tínaga mini yaragaore hene timbuni howa mani holobadarume tínaga mini manda biaho haiore holebira.
52Abarahama henego mitangi bilimu. Ibugua Ngode Datagaliwabehondo mini mbiraore hongohewi henego ai Ngode Datagaliwabehanda ibu bahandayangi ibu pi nale hene. Ani heagola Ngode Datagaliwabehanda ibu agali tigabiore ka lene.
53Ani bialu Yosebe ibu nde genda ibuha anda ibiyangi ibu Ngode Datagaliwabenaga mana baya hanguore talialu heagome ibu Iyibi dindiha agali haguane hene.
54Inanaga mamali Piniasa ibugua nde lotu mana baya hanguore hongo howa talialu heagola Ngode Datagaliwabehanda ibu damene hangume Anduane Homogonaga loma binigo mo miaga haabobo holebira, lalu lamini.
55Yosua ibugua Mosesenaga mana wiago hongo howa yu heagome ibu Isaraele wali agalinaga agali haguane hene.
56Kalebehanda dindi hondo wialu dai buwa dindi ogobi wia lalu te lama dai biyagome dindi timbuni mbira ibu yolo ale tigua ibu tu wa mini.
57Debidi ibu dindi Ngode Datagaliwabenaga nenegeore heagome Ngode Datagaliwabehanda ibuhondo bi lo wialu lalu ibu damene hangume kini haabo holebira lalu bi lo wini.
58Elayahanda Ngode Datagaliwabenaga bi mana lo wiago hongo howa yu haabo henegome Ngode Datagaliwabehanda ibu mo yalu dahuliya andagaha pene.
59Agali tebirali Hananiabi Asariabi Misaelebi ira timbuni de agoha bo delearia Ngode Datagaliwabehanda tigua ibuhondo mini mbiraore hongohe wua heago hondowa ibugua ti dugu eda halu pelene.
60Daniele ibu agali bayale tigabiore heago hondowa laiono hearume balu nelo Anduane Homogohanda ibu yupe nahene.
61Tígua ina mamalirunaga mana bayale bialu hene uruni baya hangu mitangi bialu mana uruni baya hangu mo yalimu. Mbirali ibu Ngode Datagaliwabehondo mini mbiraore wua haga heagua nde ibu pi nalaga.
62Agali ko karunaga bi hongohe lalu kago hondowa tí gi nahalimu. Tinibi homalu tínaga dabudabu baya tara tara mo ngoaiho kago ereba hai haga ngago manda bilimu. Ani howa mani tinaga tingini dindiha padagola ngoe bedaru tinaga tomo holebira ndobe.
63Heneneore ayu ti mini lene timbuni bu karunigo ainde yawi ti dindi ogoria naholebira. Tinaga tingini dindiha poragola mbirale tigua bule manda bu hayaruni tini heba mandagi ereba hamaga holebira.
64Anigo i̱ igini kemiru tí Ngode Datagaliwabenaga bi mana lo ngagome agali mini lene helaga ngago manda buwa tí Ngode Datagaliwabenaga bi mana ogoniha hongo mialu halimu.
65Tí hamene Saimono kago ibu agali manda timbunibi ka. Ani kago manda bialu ibu tí aba haradagua helo tígua ibunaga bi larago hale halimu.
66Yudasa Magabeusu ibu wene igiri emene heangi howa ibu agali hongohe henego ka. Ani kago manda bialu i̱na ibu tínaga agali haguane helo dabo helarogo ibugua tí haru halu wai bamba holebira.
67Agali Ngode Datagaliwabenaga mana ngago baya hangu talialu haga bu karu olalu tí heba mandagi mo ngoai ho halimu.
68Wali agali tara tara Anduane Homogo mitangi nahaga bu hearume inahondo mana ko biyaru mitangi bialu pani migi bilimu. Ani bialu Anduane Homogonaga bi mana lo wini ngago baya hangu talialu haabo halimu, lene.
69Ai Madadiasa ibugua ibu iginiru Anduane Homogohanda mo bayale helo bi lalu ibu homene.
70Mali handari mbira pira mariani waragoria (146) layagola ibu homene. Homayagola ibunaga tingini ibu mamalirunaga homali Modeini tanoha heagoha hora hene. Ainde Isaraele wali agalime dara timbuni howa dugu bialu howa hora hene.
