1Ai Yonadana ibugua handalu hearia ibunaga biabe biyago bayale hai hayago hondowa agali maru ibunaga bi yalu Lomo tano timbuni ngagoha pudaba lene. Tigua habo nalolene bi ala lo wiyago lone mo hongo holenaga bi yalu pelene.
2Ani bialu bi mbiraore dege gili bialu Sabarada tanohabi tano hongohe wiaruhabi pelai hene.
3Agali bi yalu pene biaru Lomo pialu gabumane anda timbuni mana lagane anda heagoria anda pene. Anda puwa tigua lalu, Inanaga agali haguane Yonadana halu Yudiaha wali agali hearume tí baba habo nalolene bi ala lo wirimago mo hongo halu lone lo wule pudaba laya handala ibirima, lalu latagi hene.
4Ani layagola Lomonaga gabumane agali haguane hearume beba gili buwa agali biaru ti giha ya hene. Beba uruni ti harigani Yudia dai bialu karia agali haguane dindi tara tarani bu karume ti harigani baya hangu handaya ho helonaga gilibu mini.
5Yonadanahanda Sabarada dindiha gilibu pelenedagoni ogodagua lene.
6Agali Anduane Homogonaga loma binigo mo miaga agali haguane timbuni Yonadana halu gabumane agali haguane bu karubi agali loma binigo mo miaga maru karubi Yudiaha wali agali bu karubi tigua ti hamene Sabarada dindiha karuhondo bi lo wia hara.
7Bamba tínaga Kini Ariusuhanda beba mbira gili buwa inanaga Anduane Homogonaga loma binigo mo miaga agali haguane timbuni Oniasa hearia ibilaya. Ibugua lalu ina bibahende hamene hamene dege lo hami̱ya lalu langiya. Ayu iname bi ibunaga ogoni heba gilibu maga halu tí kemiria ibilaramago ai Ariusunaga bi ogoni heba inanaga bi heba tí handalimulo ibilarama.
8Oniasahanda agali tínaga bi yalu ibiyadago bayuwa ibirida lalu turu howa beba ogoni yamini. Beba ogoniha howa ina mandagi nenegeore ho hami̱ya lalu bi wáleore lo wia heneya.
9Heneneore ina dindi mende karu baba nenege naheha howa ina hongo Anduane Homogonaga mbuga ngagoha hongo miadai beremali.
10Anigo ainde iname tí baba habo nalolene bi lo wirimago lone mo hongo ina nenegeore halu mandagi hami̱ya manda bialu gilibu wia haramago irane iname tíore wanahole manda buwa larama. Anigo ai beba tigua gilibu ibilene mbira nami dege hemaria mali mbira pu bolangua hayada.
11Iname lotu lagane horo timbuni tagira ibirangibi inanaga horo timbuni maru tagira ibirangibi iname Anduane Homogohondo loma mialu howabi ina ibuhondo bi lalu howabi bibahendengi tí embeda nahe mitangi bu haabo haramali. Anidagua beremadago irane ina hamene mitangi holene duniniore mbira ngago manda bialu anidagua beremali.
12Ani bialu tíore mini yaraga hene timbuni kemigonaga ina turu timbuni ho kema.
13Anigo ina bayale nahe wai biabe bialu genda yu haabo haga kemago irane kini bu karume inahondo genda mo ngialu haabo halu kagome ina genda yu kema.
14Ina wai beremago bialu howa tíbi ina baba nenege hene maru karubi tí genda mo mulene hame nalaramali.
15Ina Ngode Datagaliwabe ibunime baya hangu handaya ho haga kagome ani beremali. Anidagua biaga kemagome inanaga waitigi ibira halu ina wayali hene kema.
16Ani howa iname agali kirali Andiogusu igini Numeniusu Yasono igini Andibadela Lomo dindiha bi lo yu pialu ina baba nenego halu mandagi holenaga habo nalolene bi ala lo wirimago lone mo hongo halu lo wima lama piribi.
17Ani bialu libugua tí kemiria puwa tí mo biala halu beba habo nalolene bi ala lo winigo mo hongo halu gili bini ogoni milibu larima.
18Ainde ayu inanaga beba gilibu wia haramago ladai bilimulo hame ledema, lalu pelene.
19Ai abale Sabaradali tigua Anduane Homogonaga loma binigo mo miaga agali haguane timbuni Oniasa hearia beba gilibu ibilenego ogo
20Ai nde Ariusu Sabaradali kini kagome loma binigo mo miaga agali haguane timbuni Oniasa bayale kebe, lara.
21Tigua bi mbira gilibu winiyago ogodagua leneya. Ai Sabarada wali agalibi Yuda wali agalibi ti hamenelaore ka. Libunaga mamali mbiraore Abarahama hene.
22Ayu iname mbirale ogoni handa walia halu ayu ai ti bayale dege kabe hako kabe manda nabi howa bame hale dege harama.
23Ainde tígua inahondo beba gili bialu bi ladai birimiyagua nde iname beba gilibu dai bilalu nogo bulumagaru dindiru maru nde tí talebu nguleberema. Tígua nde anidagua bulene manda birimiyagua agali inanaga beba yalu ibirago tigua bi uruni baya hangu ogobi hea lalu lama dai bulebirago hale holeberema, lalu beba gilibu wia hene.
24Yonadana ibu hale ho hearia Demidiriasanaga ami haru haga agali haguane hearume ami agali ala haru emene lowa ami agali dewaore haru halu wai bule manda buwa íbu ka layane hale hene.
25Ani hale halu Yonadanahanda waitigi ibu daluha anda ibilo hame nale howa ibugua abale Yarusaleme wahalu harigani ngola hole Hamada tano wiagoria pene.
26Agali o penedaru tigua hondo wule penego ai tigua handalu dai buwa lalu, Waitigime wai ayu mbiraga bule mandabu hea, lalu lamini.
27Ani hale howa Yonadana ibugua ami agali biaruhondo lamialu lalu, Ami agali karu lamialu ayu mbiraga u napale halimu lalu bibahende lamiai halimu. U napale wai biaganeale gime yai howa wai bule manda manda bu halimu lalu lamilimu, lene. Ani lowa agali mbira mamage hai helo dabalu delaga bini.
28Ani bialu heago waitigi ti handa walia howa waitigi agali hearu ti gi hai ho hene. Tinaga ira delearu wene dalu helalu ti ibida piai hene.
29Ainde mbiraga Yonadana halu ibunaga ami agali biarume agali biaru warahanda howa handalu hearia ira hangu dalu heago dalu helalu tini piai hayayago hendene. Egabi lalu
30ai gao layagola Yonadana halu ibunaga ami agali biarume waitigi talia minabe nahe iba Eluderusu domalu pu waore hayago hendene.
31Ani piyaya handala Yonadanahanda uruni ti pelo wahalu puwa Sabarada tanoha Arebia hameigini hearu baba wai bialu hene. Wai bialu ibugua ti bo podahana howa tinaga mbirale wiaru ti aribia howa mo pagebu yai halu pene.
32Ani bialu mani Damasagasa tano wiagoria tagira pene. Ani puwa dindi ogoniha wiaru baya hangu de handama ibaga biaiore hene.
33Ogoningi dege Saimono ibubi nde Asagelono tanoha dindi emene wiaru handama ibaga biai halu bini. Ani bialu lone beregedalu Yoba tano wiagoha puwa ibugua ami agali maru tano ogoni handaya ho helo dabo hene.
34Ani dabo helenedagoni irane Yoba wali agalime tinaga tano hongohe ogoni Kini Demidiriasa mule ka layago hale howa ami dabo helene.
35Ai Yonadana ibugua gabumane agali haguane bu hearu olo mogo bialu tigua Yudiaha wai pabeanda hongohe maru bu helole mitangi bini.
36Ani bialu tigua Yarusaleme tanoha wai pabe daligaore helo biadaga halu wai pabe hongohe timbuni mbira tanola wai pabeanda kagola hengeneha bu hobaki ho bule manda bini. Anidagua biragome tigua mbirale yolo bulenebi mbirale tagulenebi nabilo manda bialu pabe ogonime bu tu wiaki hene.
37Wali agali bibahendeme tanoha biabe bulene wiago bulenaga mo hilombira howa bialu hene. Ani binidago wai pabe amu ni tagira ibiragohayagi heago ko halu gialapaya bu wiago hondowa ani bialu hene. Ani bialu mendebi mini Kabenada laga heagobi dindini podo ibira ho wiago de hondowa ogonibi bule manda bialu hene.
38Ani bialu heagola Saimono ibugua nde dindi abene amu ni paliragohayagi hari bare wiagoha tano wiaru mo hongo halu wai pabe hearunaga wai pabe panga payaga aeaneme bengena hongohe helaga bini.
39Ainde Tiribo ibuni Sirianaga kini holenaga ibugua Kini Andiogusu homelo bo wahale manda bu hene.
40Anigo ainde Yonadanahanda ibunaga mini wu kago hame nale howa ibu baba wai bulino gi ho hene. Ani manda buwa Tiribo ibugua ibunaga ami agaliru haru halu Bedesana wiago pole pene. Ibugua Yonadana minalu homelo bo wahole manda bialu pene.
41Anigo Yonadana ibuguabi nde ami agali wai baya hangu biaga pari wayaliru daosini dege pira maria (40,000) haru halu Bedesana tano pene.
42Ani piyagola Tiribo ibugua Yonadananaga ami agali dewaore haru heago hondowa ibugua Yonadana hamelo bole piyago gi halu wahene.
43Wahalu ibunaga agali ho bamba hene haguane bu hearunaga deni howa ibugua Yonadana ibirida lalu mo bila halu hene. Ani bialu ibugua Yonadana mo turu howa mbiraleru bame mialu howa lalu, Wali agali bibahendeme kini ibuninaga mini yaraga haremilidagua Yonadananaga mini yaraga halu halimu, lene.
44Ani lowa ibugua Yonadanahondo lalu, Iyaore keba holene mbira nawiore kebagoni. Ani kebagodago irane aginaga í̠naga ami agali dewaore haru kebe.
45Ti maru tini daluha hama dai bidaba la. Í̠ni heba polene maru dege haru halu Tolemese tano ma. I̱na tano ogonibi wai pabeanda hongohe maru ngarubi ami agali marubi ami agali haru haga haguane marubi tale bialu maru í̠ ngulebero. Ani ngialu maha nde beregedalu i̱ni dalu dai bulebero. Ainde i̱ mbirale uruni dege bule ibinigo kogoni, lalu lamini.
46Ani laya handala Yonadana ibugua Tiribonaga bi ogoni henene laya lo manda buwa ibunaga ami agali dewaore Yudia hole dai bidaba lene.
47Ami agali daosini tebira (3,000) hangu ibuni heba hene. Ani howa lone mo tale bialu ami agali daosini kira (2,000) Galili helalu daosini mbira (1,000) ibuni heba pene.
48Pialu Yonadana halu ibunaga ami agali biaru Tolemese tanoha anda piyagola agali tanoha hearume wai pabe panga payatagi howa Yonadana minu garabaya bialu ibunaga ami agali biaru homelo bo wahai halu tinaga wai biaga ayu tibu yu hearu tigua gingila miai hene.
49Ani bialu Tiribohanda ibunaga ami agali maru geni piaga hearubi maru nogo hosini biruwa wai biaga hearu Galili dindihabi dindi tigabi wiagohabi pialu Yonadananaga ami agali maru hearu bo wahai hole pudaba lene.
50Ainde Yuda ami agali maru biaru tigua manda bu handalu hearia Yonadana halu ibunaga ami agali maru piyaru bo wahayada lo manda bu hene. Ani manda buwa ainde tini degedege mo hongo haga haga bialu wai bule tidi yalu pene.
51Waitigi biaru tigua handalu hearia Yudali biarume homolene gi nahe tigua wai bule hongo ho heago handalu ti ibida dai bini.
52Ani biya handala Isaraele ami agali ti bayale dai bialu Yudia dindi anda pene. Ani bialu Yuda wali agalime Yonadana halu ibunaga ami agali homayagonaga dara timbuni howa dugu bialu duguanda luore hene. Tigua gi timbuniore ho howa dugu timbuni bialu hene.
53Ai dindi bibahendeha hameigini tara tara palearume Yuda wali agali lenego mbiraore hangubi nahelo bo helo wahaiore manda bini. Tigua lo manda bialu, Ayu tinaga agali haguane ti haru bamba haga mbira nahebi agali ti biamogo bulenebi mbira naheore nga. Ani ngago ai mani howa Yuda wali agali dindi hene lalu tinaga te nalelo iname ti aria lenego balu bo amo lami̱ya, lene.
