1 KING TAUDIA 8:2-9

²Inai hebou be hua namba 7, ena ladana Etanimi, aria badana neganai idia abia.

³Israela tau badadia be unai neganai Solomona dekenai idia ginidae, vadaeni hahelagaia taudia ese Taravatu Maua idia abia isi,

⁴Dubu Helaga dekenai idia huaia lao. Levi taudia bona hahelagaia taudia ese danu Lohiabada ena Palai Dubu, mai ena kohu ibounai danu, be Dubu Helaga dekenai idia abia lao.

⁵Vadaeni king Solomona bona Israela taudia ibounai be Taravatu Maua ena vairanai idia hebou, bona mamoe bona boromakau momo herea, duahia diba lasi, boubou totona idia henia.

⁶Unai neganai hahelagaia taudia ese Lohiabada ena Taravatu Maua idia mailaia, ena gabu momokani dekenai idia atoa, Helaga Herea Gabuna lalonai, kerubi edia hanina henunai.

⁷Kerubi edia hanina ese Taravatu Maua bona iena huaia audia danu idia koua.

⁸Unai huaia audia be lata herea dainai, edia duduna be tau ta ia itaia diba, bema Helaga Herea Gabuna ena vairana dekenai ia gini neganai, to Helaga Herea Gabuna ena murina kahana dekena amo ia itaia diba lasi. Unai audia be unuseni idia noho ia mai bona hari.

⁹Taravatu Maua lalonai be gau ta lasi, unai nadi palaka rua, Sinai dekenai Mose ese ia udaia gaudia sibona. Unai be Lohiabada ese Israela taudia dekenai Taravatu ia henidia, Aigupito tano dekena amo idia raka mai neganai.