1 Kiŋi 22:11-26

¹¹Kareyaminyi dokopa akali mende Senanana ikinyingi Setekaya lenge dokome baa rangeme ane poraimi mena bulamakaona nenge yale wasiya. Wasapala Ayape lamaiyuo, Kamongo dokome bange dake minyuo Siria wambu dupwa doko kapa pyao ralinyi nembapala kaeyare letamo, leya.

¹²Leyamo dokopa poropeta menge dupwa dokonako palyuo lao, Kamongo dokome porainya renge jeramopa Oramote wambu kararaminyi dokona pao nakama nyuo wini piri, leyami.

¹³Dopa pyuo kareyaminyipa akali mupwa poropeta Maekaya nyela peyamo dokome epo lao, Poropeta menge dupwame kiŋi doko rae mainyi pyambuo pii mendareko lami dopa pyuo emba dokonako ingyuo lape, leya.

¹⁴Leyamo dokopa Maekayame isingi lao, Kamongo lete karenge dokona lao lalu lao lao baame namba dopa laa lao langiramo doko laro, leya.

¹⁵Enakana baa kiŋi peteya dokona peyamo dokopa kiŋi dokome baa piso soo lao, Maekaya, kiŋi Jiosapata nambapame Oramote wambu dupwa pyala bwua panda kaeyambase? leya. Dokopa Maekayame isingi lao, Kapa pupwa. Kamongo dokome embone karenge jeramopa nakambame pyao anda pisirambi, leya.

¹⁶Leyamo dokopa Ayapeme isingi lao, Kamongo dokona kingi lao embame namba pii kinyi dokona iki langi. Yuu akipare nambame emba dopa pii lao langirusi? leya.

¹⁷Maekayame isingi lao, Isaraele ami yanda singi dupwa mena sipisipi rapu pingi kara nalyaminyi ralo karenge dopale ingyuo yuu kyau dupwana wakale wakale ralo pao karaminyi kandeyo. Dokopa Kamongo dokome lao, Wambu dupwana rapu pingi akali mupwa mende kara nange lamoŋo dokona mee mona seramo anda pena lapya, leya.

¹⁸Dokopa Ayapeme Jiosapata lamaiyuo, Baame namba keta keyange piraŋa lao langi napala yuu peparae koo dokonako langingiŋi lao emba langya napu kandapisi? leya.

¹⁹Leyamo dokopa Maekayame deeyako lao, Epapu Kamongo dokome apa letamo lao sepe. Kamongo doko yake panda dokona banya petenge isa dokona pisipyamo banya aŋala dupwa baa pisipyamo wangusa karaminyi kandapu.

²⁰Dokopa Kamongo dokome piso soo, Apimi Ayape baa yuu Oramote dokona papala kumara lao minyako pela parase? leya. Leyamo dokopa aŋala lapome pii mendakinya palyuo leyami dee lapome mendena palyuo leyami.

²¹Lao peteyaminyipa imambu mende epo Kamongo peteyamo dokona papala akali doko nambame minyako pela paro, leya.

²²Leyamo dokopa Kamongome piso soo lao, Apa pyuo pirisi? leya. Dokopa imambu dokome isingi lao, Nambame papala Ayapena poropeta akali dupwa kyambo lena lao kunji pyaro, leya. Dokopa Kamongo dokome lao, Emba wini piriŋi baa minyako pela puu, leya.

²³Dokopa Maekayame lao oto lao dopa leya. Dopa pipya lyakande. Kamongo dokome embena poropeta dapwa kando kyambo lena lao kunji pyapya. Dopa pipyamopape Kamongo baa rangeme emba koo keta palyuo lapya, leya.

²⁴Leyamo dokopa poropeta akali Setekaya doko Maekaya kareya dokona papala Maekayana lenge kambu dokona rakyuo pyao lao, Kamongona Imambu dokome namba yaki nyuo epo apa pyuo emba pii kanda soo langilyase? leya.

²⁵Leyamo dokopa Maekayame isingi lao, Emba panda kuki matarena dokona yalu pela pare dokopa koto kandare, leya.

²⁶Dokopa kiŋi Ayapeme banya akali mupwa dokona mende lamaiyuo, Maekaya minyarapala nyepala yuu taone andake dokona gapomane akali mupwa Amonepa dee kiŋinya ikinyingi kingi Joasepa minyuo pao maipi.