Te Israel me Juda Hani Sigo Tuni Bidigo Po Elalubo Buku Deli 22:11-26

¹¹Sedekaia, te Kenango ogwa, aga me deli te bidi sese nogo si, sągągo si, 400 profet dabe tomode bidali bidi. Agai te ain dage selama, te bulmakau gąų tiwai nigali. Te aga toboluba munama asu, te Ahapba te tiwai po wali, “Genuai Bidigo te tiwai po wali, nago te Siria dabe dali boi hwįnama, te augwali aiyaba elalueibao. Te tiwai nago augwali te kau gąų komgo augwali enana pidubadi, te augwali silibo siba mu usu naibao,” te po wai.

¹²Te gasa profet dabego me te tiwai deli po naga wali. Augwaligo te tama po wai, “Nago te Ramotba hwįgi pobaso, te mu tama, nago te taun saibao. Genuai Bidigo nage tau sobaso, te nago augwali aiyaba elalueibao,” wali.

¹³Te ofisa bidi, Ahapgo te Mikaia sigi pomainu tagala palali bidi, agai te Mikaia odasa asali. Augwali si te kingba sabalisiąbadi, ofisago Mikaiaba te tama po wai, “Tigidali profetgo po weyu, kingo hwįbaso, te boi bidi aiyaba elalueibao wali. Tama tialima, nago me nago wiegi yai kolesaga eyu, wiegi yai po naga te kingba mao,” te po wai.

¹⁴Tialima, Mikaiago ofisa bidiba te tama po wai, “Te Sesemane Sogo Bidibo Genuai Bidigo nogide, eno mu po nageba obao, mena po Genuai Bidigo enaba mani, te po naga eno pusaibao,” wali.

¹⁵Te Mikaia pelama, te king Ahapba sabalubo si da, teda Ahapgo agaba te tama po hanalu wali, “Mikaia, te dago Ramot taun ma sainu hwįgi pobaso usu yaibawe, ma meniwe?” Tama Mikaiago te kingba posobo po wabo homu ebo po te tiwai wai, “Magia! Te usu da, nago hwįgi pelama da, te taun nago saibao. Genuai Bidigo nage tau sobaso, te nago augwali aiyaba elalueibao,” wali.

¹⁶Tiali goli, Ahapgo agaba te tama po wali, “Tibo po tagalao. Sesemane sogo eno nagebolo weyu, te nago Genuai Bidigo nogide mu po naga omainogo yai. Nisu sogo nago po odaibawe?” wali.

¹⁷Tialima, Mikaiago Ahapba te tiwai po wali, “Eno suali, te Israel ami bidi dabe te bulu du dabede bidalua pelawali, te kibu sipsip augwa tonalubo bidi wasman meni yai tiwai elaluali. Tama eno odali, Genuai Bidigo te po wai, te bidi dabe augwa tobolu bidi meni yai. Augwa te hwįbo tagalama, te augwa buluba ma pelama, te bugagia bidibaso usu yaibao,” Mikaiago te po wali.

¹⁸King Ahapgo te po odama, agai te king Jehosafatbolo te tiwai po wali, “Tes, te megi da, eno nagebolo walio. Te profetgo enabolo wiegi yai po me wagobeo. Sesemane sogo agai enaba te dwai nai naga pedelabo po naga wabo dao,” wali.

¹⁹Tialima, Mikaiago po wadolama weyu, te tama po wai, “Tialima, megi da, eno homu nago olo bugagia munama, odao, te eno nagebolo te Genuai Bidigo enabolo ola mani nai dabede po waibao. Eno suali, te dagalude Genuai Bidi te aga dugulalubo sia saide dugulaluali, te tigidali mobo bidi ensel dabe aga pąde dolalubo suai dao.

²⁰Te Genuai Bidigo augwaliba te tama po hanalu wai, ‘Dego mu te Ahap te Ramotba pelama, isimainu geanigi paibawe?’ Tama te deli deli mobo bidi enselgo augwa konealubo homude po te Genuai Bidiba pusai.

²¹Augwaligo te tiwai idubadi, te noma bidi mobo me deli Genuai Bidi pąba pelama, te tama po wai, ‘Ena da, ena pelama, aga geanigi paibao,’ te po wai.

²²Te Genuai Bidigo agaba hanalu wai, ‘Nago te Ahap mena tama tųba geanobo po waibawe?’ Tialima, te mobo noma bidigo Genuai Bidiba te tama po wali, ‘Te ena pelama, te Ahap aga profet dabego digi aga tibo po momainogo ilaibao.’ Tama Genuai Bidigo te noma mobo bidibolo te tiwai po wali, ‘Nage pelama, aga geanobo po wagi pao, te agai nago poba homu mueibao,’ Genuai Bidigo te po wai,” Mikaiago te tiwai wali.

²³Tama Mikaiago po dolo tama te Ahapba te tiwai po wali, “Genuai Bidigo homugo nage dolomainu homu elama, tama agai te noma mobo bidi tagala palama, tama naga te profet bidi tigidaligo nage te poba homu dąų omainu, tibo po ola mabo tiwai yali dao,” wali.

²⁴Profet Sedekaia, te Kenango ogwago, Mikaiago Ahapba te pusali po odama, te aga Mikaia pąba pelama, tama aga naboge badu nogo sawaligo eliyu, te tama po wai, “Te Genuai Bidigo Noma Mobo Bidigo ena magi elama tagalama, te nageba solama, tama nagebolo te po maniwe?”

²⁵Te Mikaiago Sedekaiago po te tiwai wei ponani, “Nosali te boi bidi dabe asu, te da Israel aiyaba elalubaso, te naga digi wi peyu, te be me deli habu tomoba geme dula sigi paibao. Te tebo sogo naga nago koneaibao, Genuai Bidigo digi enaba te po mobaso, eno te po pusai yabo, te homu nago yagameo,” Mikaiago te po wali.

²⁶Tialima, king Ahapgo aga ofisa bidi me deliba te tiwai po wali, “Te Mikaia pageabi elama, aga te Emonba sela pao, te polalubo kiap bidi da, me te eno ogwa Joasba pao.