1 KƆRINTIDENƆ 4

1

2

3

4

5

6

7

8

9

10

11

12

13

14

15

16

¹Abire yãi à ó gwa Kirisi zĩkɛrinↄ ũ, Luda asiriyã gwàrinↄ ũ.

²À kũ̀ gwàrinↄ gↄ̃ náani vĩ.

³Tó ákↄ̃nↄ ke bisãsiri yãkpatɛkɛrinↄ ma taari è, yã pãmɛ ma kĩnaa. Madì ma zĩda manakɛna ke vãnikɛna boro.

⁴Yãke tɛni ma swɛ̃̀ vĩro, ama abirekũ ni ma boro, Dikirin ma yãkpatɛkɛri ũ.

⁵Abire yãi àsun gĩnakɛ à gbɛ̃ke taari le Dikiri sugↄrↄ ãro. Àkũmɛ ani gu pu pↄ́ kũ à utɛna gusiraaa à nɛ̀sɛ yã bo gupuraa. Zĩ kũ̀a baadi ni ma lákũ Luda ni a sáabu kpá nà.

⁶Yã kũ ma òárɛ dínↄ, ma ò makũ kũ Apoloo yã musumɛ de àgↄ̃ yã díkĩna dↄ̃: Òsun vĩ Luda yãlaro. Á gbɛ̃ke sún ĩa dã à zɛ kũ gbɛ̃ doo, à bo gbɛ̃ do kpɛro.

⁷Bↄ́ ń deońlaa? Ń pↄ́ke vĩ n zĩdanɛ, kũ odi n gbaro yá? Ò n gba, akũ ntɛn ĩa dã lákũ odi n gbaro bà yá?

⁸A kãn gwe kↄ̀ yá? A kɛ ↄgↄdenↄ ũn gwe kↄ̀ yá? Átɛn kí ble ó sarin gwe yá? Má ye àgↄ̃ kí ble, ògↄ̃ lɛɛlɛ.

⁹Zaakũ ma è ókↄ̃nↄ Luda zĩ̀rinↄ, Luda ó dítɛ zã lán gbɛ̃ kũ òdi ń dɛ pari wára bàmɛ. Gu sĩnda pínki gbɛ̃nↄ wɛ́ fĩ̀wá, malaikanↄ kũ bisãsirinↄ ń pínki.

¹⁰O gↄ̃ mìsaridenↄ ũ Kirisi yãi, akũ kunna Kirisi pìi gũn á de ↄ̃ndↄ̃rinↄ ũroo? Ó busana akũ á gbãna vĩroo? Ó kpebona akũ á kpetanaroo?

¹¹Ari tera nà kũ ímio tɛni ó dɛ, ó tɛ́ punsi, o gↄ̃ pↄ́gbɛ̃nanↄ ũ, bɛsaridenↄ ũ.

¹²Odì zĩ gbãna kɛ ari ò kpasa. Tó ò ó ká, odì sa mana ońnɛmɛ. Tó ò wari dↄ̀wá, odì mɛna fↄ̃.

¹³Tó ò ó sↄ̃sↄ̃, odì kútɛ kɛńnɛmɛ. Ari tera òtɛni ó ditɛ andunia bↄtↄ pↄ́nↄ ũ, gbɛ̃ sĩnda pínki bìsa ũ.

¹⁴Matɛn yã dí oárɛ wé'idanaáwa yãinlo. Matɛni á gba laakari ma nɛ́ yenyĩdenↄ ũmɛ.

¹⁵Bee tó Kirisi gũn á gwàrinↄ kà gbɛ̃nↄn ũgbangba, á de'ina dasiro. Makũ mɛ́ ma á í kũ Kirisi Yesu baarunnakpanaárɛo, akũ á kú a gũn.

¹⁶Abire yãi matɛn kútɛ kɛárɛ, àgↄ̃ ma kɛna kɛ.

¹⁷Abire yãi ma a nɛ́ yenyĩde Timↄti zĩ̀áwa. Àpi bi náanidemɛ Dikiri gũn, àkũ mɛ́ ani ma kunna Kirisi gũn yãkɛna dↄágu. Yã kũ madì da sↄsi gbɛ̃nↄnɛ wɛ̃tɛ kũ wɛ̃tɛon gwe.

¹⁸Á gbɛ̃kenↄ tɛn ĩa dã, lákũ mani su á gwaro bà.

¹⁹Tó Dikiri wè, mani su á gwa tera, mani ĩadãrii pìnↄ gbãna lɛ́ e, adi kɛ ń yã'onaa adonlo.

²⁰Zaakũ kpata kũ à bò Luda kĩnaa bi yã'ona yãnlo, gbãnamɛ.

²¹Á yei deramɛɛ? Mà suái kũ gòon yá, ke mà su kũ yenyĩo kũ nɛ̀sɛyĩdaomɛ?