1Ma gbɛ̃nↄ, mádi fↄ̃ mà yã òárɛ lákũ madì o gbɛ̃ kũ Luda Nini dońnɛ arɛnↄnɛ bàro, akũ ma òárɛ lán andunia gbɛ̃nↄ bà, zaakũ nɛ́kpãntɛ̃nↄn á ũ Kirisi gũn.
2Vĩn ma kpàáwa, adi kɛ pↄ́ lomadenlo, zaakũ ádi ká kↄ̀ro. Bee kũ terao ádi káro,
3zaakũ dàdenↄn á ũ ari tera. Lákũ á zãkↄ̃gu nà, akũsↄ̃ á yãkete vĩ, dàdenↄn á ũroo? Á dà mɛ́ à doárɛ arɛ.
4Kũ á gbɛ̃ke pì a zɛ kũ Pↄluo, akũ gbɛ̃ pãnde pì a zɛ kũ Apoloo, á kú kũ á dàaon gweroo?
5Dín Apolo ũu? Dín Pↄlu ũu? Zĩkɛrinↄn ó ũ, akũ a Kirisi náani kɛ̀ ó gãi. Ó baadi tɛn zĩ kũ Dikiri dànɛ kɛmɛ.
6Ma pↄ́ tↄ̃̀, Apolo í kànɛ, akũ Luda tò à gbã̀.
7Lɛmɛ pↄ́tↄ̃ri kũ íkariio de pↄ́ke ũro, sé Luda kũ àdi tó à gbã.
8Pↄ́tↄ̃ri kũ íkariio lɛɛlɛmɛ. Ń baadi ni a àre le a zĩ lɛ́mmɛ.
9Luda zĩkɛri dakenↄn ó ũ. Luda búgbɛɛn á ũ, Luda kpɛ́n á ũ.
10Gba kũ Luda kɛ̀mɛnɛ mɛ́ à tò ma ɛ̃ pɛ̀tɛ lán ɛ̃bori gonide bà, akũ gbɛ̃ pãnde sù àtɛn kpɛ́ pì bo. Baadi laakari kɛ a kpɛ́bonaaa,
11zaakũ gbɛ̃ke ni fↄ̃ à ɛ̃ ke pɛ́tɛ doro, sé ɛ̃ kũ à pɛtɛna Yesu Kirisi ũ baasiro.
12Tó gbɛ̃ kpɛ́ pìi dↄ̀ kũ wuraao ke andurufu ke gbɛ̀ bɛ̀ɛrɛde ke tó à dↄ̀ kũ lío ke lá ke sɛ̃̀ɛ,
13baadi zĩ yãpura ni bo gupuraa. Oni e yãkpatɛkɛgↄrↄ zĩ, zaakũ gu ni dↄ kũ tɛ́omɛ, oni baadi zĩ taka gwa tɛ́ pìi gũn.
14Tó gbɛ̃ zĩ kũ à kɛ̀ɛ bò tɛ́n aafia, ade ni àre le.
15Tó gbɛ̃ zĩ tɛ́ kũ̀, ani kisira le, ade ni bo ↄkori lákũ òdi bo tɛ́n nà.
16Á dↄ̃ kũ Luda kpɛ́n á ũ, Luda Nini kú á gũnloo?
17Tó gbɛ̃ Luda kpɛ́ pìi yàka, Luda ni ade kakatɛ, zaakũ kpɛ́ pì kunna adonamɛ, akũsↄ̃ ákↄ̃nↄmɛ kpɛ́ pì ũ.
18Gbɛ̃ke sún a zĩda sãtɛro. Tó á gbɛ̃ke tɛni a zĩda ditɛ andunia díkĩna ↄ̃ndↄ̃ri ũ, à gↄ̃ńnɛ mìsaride ũ de à le à ↄ̃ndↄ̃ kũ.
19Zaakũ andunia díkĩna ↄ̃ndↄ̃ de Ludanɛ mìsariyã ũmɛ. À kɛ̃na Luda yãn ò pì: Àdi ↄ̃ndↄ̃rinↄ kũ ń wɛ́zɛ̃ gũn.
20À kɛ̃na dↄ: Dikiri dↄ̃ kũ ↄ̃ndↄ̃rinↄ laasun pã.
21Abire yãi gbɛ̃ke sún ĩa dã bisãsiri yã musuro. Pↄ́ sĩnda pínki bi á pↄ́mɛ:
22Pↄlu, Apolo, Pita, andunia, wɛ̃̀ndii, ga, tera pↄ́nↄ, zia pↄ́nↄn yá, ń pínki bi á pↄ́mɛ.
23Ákↄ̃nↄ sↄ̃, Kirisi pↄ́n á ũ, Kirisi sↄ̃ bi Luda pↄ́mɛ.
