1 ፂምቶሳ 5

1

2

3

4

5

6

¹ጪማ ኣሳ ኔ ኣዋ ማላ ቦንቾራ ዞራ ኣቲን ዶምዖፋ። ናቴꬃ ኣቱማ ናይታ ኔ ኢሻታ ማላ ፄላ።

²ሄሳꬆካ ጪማ ማጫሳታ፥ ኔ ኣይ ማላ፥ ናቴꬃ ማጫሳታ ቃሴ ኔ ሚቼታ ማላ ሱሬ ዎዝናፔ ፄላ።

³ኣዳፌ ሜቶቴቲዳ ኣምዔታ ሎዔꬃ ናጋ።

⁴ኢሲ ኣምዔይስ ናይ ዎይኮ ና ናይ ዲዛ ጊዲኮ፥ ሄ ናይቲ ባሶ ኣሳታ ማዳናሲኔ ባና ዬሊዳይታስ ካሴ ኢስቲ ኦꬂዳይሳ ኩሼ ዛሮን ሃራፔ ካሴቲዲ ባ ኣማኖ ኦሶን ቤሳናሲኔ ታማራናስ ቤሴስ። ሄሲካ ፆሳ ኡፋይሲዛይሳ።

⁵ቃሴ ቱማፔ ማዶይ ባይንዳ፥ ባርካ ዲዛ ኣምዔያ ፆሴ ፃላ ፄላዉስ። ዎሳሲኔ ፆሳፌ ማዶ ዴማናስ ጋላሲኔ ቃማ ሚኔታዉስ።

⁶ሃ ቢታ ሎዖ ዱሲ ፃላ ኮዪዛ ኣምዔያ ጊዲኮ ኢዛ ፓፃ ዳሼ ሃይቂዳሮ።

⁷ኦና ቦላካ ዎሶይ ዶንታ ማላ ሃይሳ ኣዛዞዛ ኣሳስ ኣꬃ።

⁸ኢሲ ኣሲ ባ ዳቦታ ሃራፔካ ባሶ ኣሳ ማዶንታይሳ ጊዲኮ ኢዚ ኣማኖ ካዲዳዴኔ ኣማኖንታ ኣሳፔካ ኣꬊ ኢታ ኣሳ።

⁹ኢዚስ ላይꬃይ ኡሱፑን ታሙ ላይꬃፌ ጋርሳን ዲዛ ኣምዔይ ሱንꬅ፥ ኣምዔታ ማዝጋባን ፃፎፓ። ቃሴካ ኢዛ ካሴ ኢሳዴ ፃላ ጌልዳሮ ጊዳናስ ቤሴስ።

¹⁰ናይታ ዲቾኒኔ ኢማꬃ ሞኮን፥ ኣማኒዛይታ ቶሆ ሜቻን፥ ሜቶቲዳይታ ማዶኒኔ ሎዖ ኦሶን ኡባን ባና ኣꬃ ኢማዳ ሎዖ ኦሶንካ ኬሃ ኤሬቲዳሮ ጊዳናስ ቤሴስ።

¹¹ናቴꬃ ኣምዔታ ጊዲኮ ሄሳ ማላ ማዝጋባን ፃፎፓ። ጋሶይካ ኢስታስ ዲዛ ኣዚናራ ዳና ኣሞይ ኢስቲ ኪርስቶሳስ ኦꬃና ጊ ጌሊዳ ቃላፔ ቦላራ ኣꬊዛ ዎዴ ኣዴ ጌላና ኮዬቴስ።

¹²ኢስቲ ካሴ ጫቂዳ ቃላ ሚዛ ጊሽ ሄ ዮዖዛን ባ ቦላ ፒርዳ ኤሄቴስ።

¹³ሄሳፌካ ኦሶ ኦꬃናፔ ዩዪ ዩዪ ኣሳ ኬꬄ ጌላና ዶሴቴስ። ኦሶ ኢፆ ፃላ ጊዶንታ ሃሳያናስ ቤሶንታይሳ ሃሳዪሼ ዚጊርዛይታኔ ኮሾንታ ኣሳ ዮዖ ጊዶ ጮ ዎፂ ጌሊዛይታ ጊዴቴስ።

¹⁴ሄሳ ጊሽ ኣዚናቲ ሃይቂዳ ናቴꬃ ማጫሳቲ ኣዴ ጌላና ማላ፥ ናይታ ዬላና ማላኔ ባሶ ኣስ ኣይሳና ማላ፥ ሞርኬይካ ኢስታ ቦላ ዎꬂዛ ሚሼ ዴሞንታ ማላ ታ ዞራይስ።

¹⁵ኣዳካ ሃይሳፌ ካሴ ኢሲ ኢሲ ኣሳቲ ፃላዔ ካላና ጉዬ ሼርዒ ጊዳ።

¹⁶ኣማኒዛ ማጫሲ ኦኒካ ባሶ ኣሳ ጊዶን ኣምዔቲ ዲዛ ጊዲኮ ዎሳ ኬꬂ ቱሙ ኣምዔታ ፃላ ማዳና ማላ ኢዛካ ባ ባጋራ ባ ኣምዔታ ማዱ ኣቲን ዎሳ ኬꬃስ ቶሆ ጊዳና ማላ ኣጋጉፑ።

¹⁷ዎሳ ኬꬃ ሎዔꬂ ኣይሲዛይቲ ሃራፔካ ሳባኮኒኔ ታማርሶን ሚኒዛ ጪማቲ ጊዲኮ ዳኮ ማዶ ማዴታናስ ቤሴስ።

¹⁸ማፃፋን “ካꬅ ቡኪዛ ቦራ ዱና ቃቾፋ” ቃሴካ “ኦሶ ኦꬂዛዴይ ዳሞዛ ኤካና ቤሴስ” ጌስ።

¹⁹ናምዑ ማርካይ ዎይኮ ሄꬑ ማርካይ ማርካቶንታ ዲሺን ጪማ ቦላ ሺቂዛ ሞቶ ኤኮፋ።

²⁰ሃራቲ ቤይዲ ናጌታና ማላ ናጋራ ኦꬂዛይታ ኣሳ ኡባ ሲንꬃን ሃንቃ።

²¹ፆሳኒኔ ዬሱስ ኪርስቶሳን ዶሬቲዳ ኪታንቻታ ሲንꬃን ሃይታ ኣዛዞታ ኦናካ ማዶንታ ኔ ናጋና ማላኔ ኢሲ ሚሺካ ታ ጎሪፔ ዚቂ ꬎቁ ሂስቶንታ ማላ ታ ኔና ሃዳራ ጋይስ።

²²ፆሳ ኦሶስ ዶራናስ፥ ኦና ቦላካ ኔ ኩሼ ዎꬃ ዎሳናስ ኤሶቶፓ። ቃሴ ሃራታራ ናጋራ ኦꬃናስ ዙፔቶፓ። ናጋራፔ ኔና ፂሎቴꬃን ናጋ።

²³ኔና ቃንꬃን ሳኪዛይሳሲኔ ዴንꬃ ሳኮዛ ጊሽ ዎይኔ ጫጄፌ ጉꬅ ጉጃዳ ኡያ ኣቲን ሃይሳፌ ጉዬ ሃꬄ ፃላ ኡዮፓ።

²⁴ኢሲ ኢሲ ኣሳ ናጋራይ ፒርዳይ ያናፔ ካሴቲዲ ቆንጬስ፤ ባጋይታ ናጋራይ ቃስ ፒርዳፌ ጉዬ ቆንጬስ።

²⁵ሎዖ ኦሶይካ ሄሳ ማላ ቆንጬ። ቆንጮንታይ ዲኮካ ቆቴቲ ኣቴና።