1 ፂምቶሳ 1

1

2

3

4

5

6

¹ኑና ኣሺዳ ፆሳን፥ ኑስ ሂዶታ ጊዲዳ ዬሱስ ኪርስቶሳ ኣዛዞን ሃዋሬ ጊዲዳ ጳዉሎሳፔ

²ኣማኖን ታስ ቱሙ ና ጊዲዳ ፂምቶሳስ ፆሳ ኑ ኣዋፔ ኑ ጎዳ ዬሱስ ኪርስቶሳፔ ኪያቴꬅ፥ ማሮቴꬂኔ ሳሮይ ኔስ ጊዶ።

³ታኒ ማቂዶኒያ ባሼ ኔና ሃዳራ ጊዳ ማላ ሃይሳፌ ሲንꬃን ኢሲ ኢሲ ኣሳቲ ዎርዶ ቲሚርቴ ታማርሶንታ ማላ ኔ ኣዛዛናስ ኤፌሶኔን ዳሻ።

⁴ቃሴካ ኣሳይ ዮቲን ዉሮንታ ቤኒ ዎዴ ሃይሲዔን ባ ዎዴ ዉርሶንታ ማላ ኣዛዛ። ሄይታ ማላ ዮዖይ ፓላማ ዴንꬄꬄስ ኣቲን ኣማኖን ኦሴቲዛ ፆሳ ኦሶስ ኣይኮካ ጎዔና።

⁵ሃ ኣዛዞዛስ ዋና ኣይፌ ዮዖይ ጊዲኮ ጌሻ ዎዝናፔ ሎዖ ቆፋራ ሄሳꬆካ ቱሙ ኣማኖፔ ቤቲዛ ሲቆ።

⁶ኢሲ ኢሲ ኣሳይ ሃይታፔ ፖቂ ኤቂዲ ጎዓይ ባይንዳ ዮዖታኮ ሲሚዴስ።

⁷ዎጋ ታማርሲዛይታ ጊዳና ማላ ኮዬቴስ። ጊዲኮካ ኢስቲ ባ ዮቲዛይሳ ዎይኮ ኬሂ ሞቴቲዛ ዮዖዛ ሎዔꬂ ኤሬቴና።

⁸ጊዶ ኣቲን ኣሲ ማራን ጎዔቲዛኮ ዎጋይ ሎዖ ጊዲዳይሳ ኑ ኤሮስ።

⁹ቃሴካ ዎጋይ ኢሜቲዳይ ፂሎ ኣሳስ ጊዶንታ ዎጋ ዬꬊ ኣꬊዛይታስ፥ ኣዛዜቶንታይታስ፥ ፆሳስ ባቦንታይታስ፥ ናጋራንቻታስ፥ ጌሻቴꬂ ባይንዳይታስ፥ ፆሴ ሌቂዛይታስ፥ ባ ኣዮኔ ባ ኣዋ ዎꬊዛይታሲኔ ሼምፖ ዎꬊዛይታስ ጊዲዳይሳ ኑ ኤሮስ።

¹⁰ሄሳꬆካ ላይማቲዛይታስ፥ ኣዴራ ኣቂዛ ኣዴታስ፥ ኣስ ባይዚዛይታሲኔ ሻሚዛይታስ፥ ዎርዳንቻታስ፥ ኣሳስ ዎርዶራ ጫቂዛይታስ፥ ሎዖ ቲሚርቴራ ኤቄቲዛ ኡባታሳ።

¹¹ሄ ሎዖ ቲሚርቴይ ኣንጄቲዳ ፆሲ ታስ ሃዳራ ኢሚዳ ቦንቾ ሚሺራቾ ቃላራ ጋጊዛይሳ።

¹²ታና ባ ኦሶስ ሹሚዲኔ ኣማኔቲዛዴ ኦꬂ ኤኪዲኔ ታስ ሚኖቴꬅ ኢሚዳ ኑ ጎዳ ዬሱስ ኪርስቶሳ ታ ጋላታይስ።

¹³ሃይሳፌ ካሴ ታ ኣይ ማላ ኣስ ጫዪዛዴኔ ጎዴꬂዛዴ፥ ቃሴ ማካላ ኣስ ጊዲኮካ ሄሳ ታ ኤሮንታኔ ኣማኖንታ ዳሼ ኦꬂዳ ጊሽ ፆሲ ታና ማሪዴስ።

¹⁴ዬሱስ ኪርስቶሳፔ ጊዲዳ ኣማኖራኔ ሲቆራ ኑ ጎዳ ኪያቴꬅ ታስ ኬሂ ዳሪዴስ።

¹⁵ዬሱስ ኪርስቶሲ ናጋራንቻታ ኣሻናስ ዱጌ ሃይሳ ሃ ኣላሜ ዪዴስ ጊዛ ቃላይ ቱማኔ ኣሲ ዉሪካ ኤካናስ ቤሲዛይሳ። ናጋራንቻታፔካ ኣꬊዛ ናጋራንቻይ ታና።

¹⁶ጊዶ ኣቲን ታ ማሬቲዳይካ ዬሱስ ኪርስቶሲ ዛዋይ ባይንዳ ባ ዳንዳያ፥ ኡባፌ ኣꬊዳ ናጋራንቻ ጊዲዳ ታ ቦላ ቤሲዳይ ኢዛን ኣማናናይታሲኔ ሜርና ዴዖ ዴማናይታስ ሌሚሶ ጊዳና ማላ።

¹⁷ሄሳ ጊሽ ሜርናስ ሃይቂ ኤሮንታ፥ ኣይፌን ቤቲ ኤሮንታ ባርካ ፃላ ፆሴ ጊዲዳ ካዎስ ሜርናፔ ሜርና ጋካናስ ኢዛስ ቦንቾይኔ ጋላታይ ጊዶ። ኣሚን።

¹⁸ታ ና ፂምቶሳ ኔ ጊሽ ካሴቲዲ ዮቴቲዳ ማላ ሃይሳ ኣዛዞዛ ታ ኔስ ኢማዲስ። ሄሲካ ኔ ሄ ቃላ ካላሼ ሎዖ ባፄ ባፄታናሳ።

¹⁹ኣማኖይኔ ሎዖ ቆፋይ ኔስ ዴዖ። ኢሲ ኢሲ ኣሳቲ ባ ሎዖ ቆፋ ዬꬊ ኣꬊዲ ኣባ ቦላ ሜቶይ ኢዛ ቦላ ጋኪን ዋዬቲዛ ማርካቤ ማላ ባ ኣማኖ ꬋይሲዳ።

²⁰ኢስታ ጊዶን ፆሳ ጫሽ ኣጊዲ ታማራና ማላ ታኒ ፃላዔስ ኣꬃ ኢሚዳይቲ ሄሜኔዎሲኔ ኢስኪንዲሮሲ ዴቴስ።