ẔWA 7:11-16

¹¹Gan žak lni na', wdiljgak benne' judío wnná bia' ka' Jesusen', na' wnnágake': —¿Gaẕ zoa bennen'?

¹²Benne' zan bcháḻjgake' da' zanḻe'e kan nak che Jesusen'. Baḻe' wnnágake': —Nake' chawe'. Yebaḻe' wnnágake': —Bi nake' chawe' dan' žon ḻáže'le' benách ka'.

¹³Nitó benne' bi bchaḻje' kwáselo kan nak che Jesusen', dan' benne' zan ka' ẕžébegake' benne' judío wnná bia' ka'.

¹⁴Kate' ba bžin gachje lni na', bḻa' Jesusen' ḻi'a yodo', na' bsedle' benách ka' nníta'gake' ga na'.

¹⁵Bebán ḻáže'gak benne' judío ka', na' wnnágake': —¿Nakx̱ chen', žakḻe'e bennen', na' bi nsedle' che yodo'?

¹⁶Bechebe Jesusen', na' gože' ḻégake': —Da' žsedla' neda', kege chezan', san naken che X̱ažo Dios, Bennen' bseḻe'e neda'.