ᤛᤣ᤺ᤰᤕᤢᤰᤔᤡᤒᤠᤜᤠ᤹ 25:19-24

¹⁹ᤁᤖ ᤁᤢᤀᤠᤵᤋᤡᤰᤁᤡᤱᤃ ᤀᤠᤒᤠᤅᤣ ᤂᤢᤏᤡ᤹ ᤛᤠᤶᤕᤥᤌᤡᤶᤔᤡᤸᤗᤧ ᤏᤡᤱᤘᤠ᤹ ᤔᤧᤴᤍᤱ ᤐᤠ᤺ᤴᤎᤱᤜᤠ᤹ ᤏᤢ ᤁᤧᤛᤡ᤺ᤒᤠᤀᤠᤱ ᤁᤧᤒᤣ᤺ᤰᤐᤠ ᤕᤧᤛᤢ ᤔᤧᤵᤔᤏᤠᤒᤠ ᤔᤏᤠ᤺ᤸᤗᤧ ᤁᤢᤕᤠ᤺ᤶᤒᤣᤀᤥᤖᤰ ᤘᤕᤧᤖᤥ॥ ᤂᤧᤴ ᤀᤠᤸᤗᤥᤀᤠᤱ ᤁᤢᤜᤡᤱᤘᤧᤳ ᤘᤠ᤹ ᤗ᤹ᤖᤡᤰ ᤐᤠᤘᤗᤧᤴ ᤆᤰᤔᤧᤸᤗ᤹ᤀᤣ ᤜᤠᤍᤡᤱ ᤌᤰᤋᤧᤖᤥ॥

²⁰ᤜᤧᤰᤁᤩᤠᤱ ᤁᤴ ᤐᤠ᤺ᤴᤏᤡᤴ ᤀᤰᤂᤣᤗ᤹ᤖᤡᤰ ᤁᤥ᤺ᤶᤓᤥ ᤆᤥ᤺ᤰᤔᤠ ᤀᤡᤱᤃᤠ᤹ ᤌᤣᤀᤠᤱ ᤁᤢᤛᤡᤱ ᤔᤧᤴᤏᤡ᤺ᤳᤋᤣ ᤘᤕᤠᤱ॥ ᤜᤧᤰᤁᤣ᤺ᤸᤗᤧ ᤐᤠᤘᤗᤧᤴ ᤌᤥ ᤕᤖᤢᤛᤗᤧᤶᤔᤥ ᤁᤧᤍᤢ᤺ᤴᤍᤣ᤹ᤖᤧ ᤂᤠᤛᤧᤴ ᤗᤥ᤺ᤶᤔᤠ ᤁᤧᤛᤡᤖᤠ᤹ ᤌᤠᤱᤒᤡ᥅ ᤑᤠ᤹ᤀᤠᤱ ᤛᤣ᤺ᤴᤍᤥᤛᤢᤱᤗᤥ॥

²¹ᤁᤖ ᤐᤠᤘᤗᤖᤧ ᤂᤢᤏᤧ᤹ ᤁᤢᤍᤢ᤺ᤴᤍᤣ᤹ᤗᤧᤴ ᤂᤠᤛᤧᤴᤏᤡᤴ ᤖᤥᤔᤡ ᤜᤠᤱᤕᤢᤰᤐᤠᤸᤗᤧ ᤆᤥᤃᤢᤏᤡ ᤗ᤹ᤖᤡᤰ ᤕᤧᤰᤐᤣᤗᤡ ᤆᤥᤃᤢᤒᤠᤸᤗᤧ ᤀᤡᤱᤃᤠ᤹ᤀᤠᤱ ᤂᤢᤏᤧ᤹ ᤐᤕᤶ ᤜᤠᤱ ᤛᤡᤈᤖᤧᤸᤗᤥᤀᤣ ᤐᤠᤱᤔᤠᤍᤣ᤺ᤔᤠ ᤏᤡᤱᤘᤠ᤹ ᤆᤥᤃᤢᤱᤅᤠᤱ ᤂᤢᤏᤧ᤹ ᤔᤧᤶᤒᤠᤱᤅᤣ ᤌᤠᤖᤡᤰ ᤋᤡᤗᤡᤱᤃᤠᤜᤠ᤹ ᤁᤥᤔᤠᤀᤠᤱ ᤁᤵᤔᤠ ᤀᤡᤱᤈᤠ᤺ᤱ ᤐᤡᤖᤢᤱᤛᤡᤱᤗᤥ॥”

²²ᤜᤧᤰᤁᤣ᤺ᤸᤗᤧ ᤀᤃᤪᤡᤐᤠ ᤜᤠᤱᤅᤡᤸᤗᤧ ᤑᤧᤛ᤻ᤋᤛᤧᤴ ᤔᤧᤳᤋᤢ. “ᤁᤴ ᤔᤏᤠ᤺ᤸᤗᤧ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤀᤡᤱᤃᤠ᤹ ᤀᤠᤒᤠᤅᤣᤀᤠᤱ ᤂᤧᤶᤔᤠ ᤏᤡᤱᤘᤠ᤹ ᤆᤥᤃᤢᤱᤗᤥ॥” ᤑᤧᤛ᤻ᤋᤛᤖᤧ ᤏᤥᤃᤵ ᤐᤡᤖᤢ. “ᤐᤥ᤺ᤱ ᤀᤠᤍᤠᤱᤒᤣ. ᤂᤧᤏᤧ᤹ ᤋᤠ᤺ᤴᤍᤡᤰ ᤂᤧᤵᤛᤧ᤹ᤀᤥ॥”

²³ᤜᤧᤰᤁᤩᤠᤱ ᤁᤢᤍᤠ᤺ᤴᤍᤡᤰᤔᤠ ᤀᤃᤪᤡᤐᤠ ᤜᤠᤱ ᤏᤢ ᤒᤷᤏᤡᤛᤧᤴ ᤀᤠᤳᤋᤠᤳᤋᤠᤴᤏᤣ ᤔᤡᤱᤛᤥ ᤀᤡᤱᤎᤠ᤺ᤱᤏᤢ ᤋᤩᤧᤳᤇᤡᤀᤠᤱ ᤆᤢᤶᤗᤢᤱᤜᤡᤶᤔᤥ ᤌᤰᤋᤢᤶᤒᤠᤜᤠ᤹ ᤏᤢ ᤕᤧᤰᤕᤰᤁᤥᤒᤠ ᤔᤡᤱᤛᤥᤍᤠᤱᤒᤠᤜᤠ᤹ᤏᤢ ᤗᤠ᤺ᤛᤧᤳᤇᤡ॥ ᤜᤧᤰᤁᤩᤠᤱ ᤑᤧᤛ᤻ᤋᤛᤖᤧ ᤐᤠᤘᤗᤧᤴ ᤋᤠ᤺ᤵᤔᤠ ᤀᤡᤱᤈᤠ᤺ᤱ ᤐᤡᤖᤢᤛᤡᤀᤠᤱ ᤂᤢᤏᤧ᤹ ᤂᤧᤵᤔᤥ ᤔᤧᤍᤠᤖᤢ॥

²⁴ᤜᤧᤰᤁᤩᤠᤱ ᤛᤢᤜᤠᤱᤃᤧᤶᤒᤠ ᤑᤧᤛ᤻ᤋᤛᤖᤧ ᤐᤠ᤺ᤳᤋᤢ. “ᤀᤠᤍᤠᤱᤒᤠ ᤀᤃᤪᤡᤐᤠ ᤜᤠᤱ ᤏᤢ ᤁᤵᤔᤥ ᤁᤧᤍᤠ᤺ᤒᤠ ᤋᤢᤳᤋᤢᤃᤧᤴ ᤋᤢᤶᤔᤩᤠᤱᤜᤠᤱᤛᤣ. ᤂᤡᤏᤡ᤹ ᤁᤧᤖᤧᤰᤗᤧ ᤁᤴ ᤔᤏᤠ᤺ᤴ ᤁᤧᤏᤡ᤺ᤛᤢᤶ॥ ᤁᤸᤗᤧ ᤁᤢᤕᤠ᤺ᤶᤒᤣᤀᤥ ᤕᤖᤢᤛᤗᤧᤔ ᤏᤢ ᤁᤵᤔᤥᤒᤠ ᤁᤢᤓᤠ ᤕᤜᤢᤍᤡᤜᤠ᤹ᤖᤧ ᤁᤸᤗᤧ ᤀᤠᤸᤗ ᤜᤡᤱᤔᤠ ᤔᤧᤄᤥ᤺ᤛᤢᤴᤏᤡ. ᤂᤧᤴ ᤛᤡ᤺ᤔᤠᤀᤣ ᤐᤥ᤺ᤱ ᤗ᤹ᤖᤡᤰ ᤔᤧᤀ᤺ᤰᤋᤧᤖ ᤀᤡᤱᤃᤠ᤹ᤀᤥ ᤐᤣᤗᤡ ᤔᤧᤍᤥ᤺ᤴᤍᤢᤀᤠᤱ ᤔᤧᤘᤠ᤹ᤖᤥ॥