ᤗᤢᤁᤠ 9:8-44

⁸ᤘᤣ᤹ᤜᤠ᤹ᤖᤧ “ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤴ ᤕᤠᤶᤔᤥ ᤗ᤺ᤴᤍᤧᤀᤠᤱ ᤘᤠ᤹” ᤔᤧᤒᤠ᤺ᤳᤋᤢ. ᤜᤧᤰᤁᤩᤠᤱ ᤀᤠᤸᤗᤛᤠᤱ ᤘᤣ᤹ ᤔᤏᤠᤜᤠ᤹ᤖᤧ “ᤀᤢᤴᤇᤥ᤺ᤴᤒᤠ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤎᤡᤰ ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹” ᤔᤧᤒᤠ᤺ᤳᤋᤢᤖᤥ॥

⁹ᤜᤧᤰᤁᤣ᤺ᤸᤗᤧ ᤜᤧᤖᤥᤍᤖᤧ ᤐᤠ᤺ᤳᤋᤢ. “ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ᤺ᤱᤃ ᤁᤢᤏᤡ᤺ᤱᤔᤠᤴ ᤂᤰ ᤐᤠᤱᤄᤢᤱᤛᤡᤱᤅᤠᤱ ᤘᤕᤧ. ᤁᤖ ᤀᤠᤰᤂᤣᤗ᤹ᤖᤡᤰ ᤕᤠᤶᤔᤥ ᤜᤡᤅᤧᤒᤣ᥅ ᤀᤡᤱᤃᤠ᤹ ᤁᤴ ᤌᤣ᤺ᤴᤏᤧ ᤂᤧᤵᤛᤢᤱᤒᤣ᥅” ᤜᤧᤰᤁᤩᤠᤱ ᤂᤢᤏᤧ᤹ᤀᤣ ᤀᤥᤔᤧᤵᤔᤠ ᤏᤡᤱᤘᤠ᤹ ᤆᤥᤃᤢ॥

¹⁰ᤜᤧᤰᤁᤩᤠᤱ ᤛᤣ᤺ᤰᤕᤢᤰᤔᤡᤒᤠᤜᤠ᤹ ᤔᤧᤏᤢ᤺ᤰᤂᤧ ᤔᤧᤍᤩᤧᤀᤠᤱ ᤂᤧᤱᤜᤠ᤹ᤖᤧ ᤔᤧᤈᤥᤃᤢᤒᤠ ᤕᤠ᤺ᤶᤒᤰᤜᤠ᤹ ᤕᤧᤛᤢ᤺ᤴ ᤔᤧᤈᤧᤰᤋᤢ॥ ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ ᤒᤧᤌᤛᤣᤍᤠ ᤐᤠᤱᤈᤢᤶ ᤗᤧᤵᤔᤠᤱ ᤛᤫᤠ᤺ᤳᤋᤠᤱ ᤋᤣ᤹ᤖᤢᤛᤡᤀᤠᤱ ᤐᤣ.

¹¹ᤁᤖ ᤕᤖᤡᤰ ᤔᤏᤠᤜᤠ᤹ᤖᤧ ᤂᤧᤴ ᤏᤡᤱᤘᤠ᤹ ᤔᤧᤄᤥ᤺ᤛᤢᤀᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤣᤃᤠᤱ ᤀᤣᤃᤠᤱ ᤔᤧᤎᤠᤛᤡᤱ॥ ᤕᤧᤛᤢᤖᤧ ᤂᤧᤱᤜᤠ᤹ ᤁᤧᤖᤧᤰ ᤗᤠᤱᤍᤠ᤺ᤰᤔᤠ ᤐᤡᤖᤢᤛᤡᤀᤠᤱ ᤏᤡᤱᤘᤠ᤹ᤑᤢᤜᤠᤱᤈᤢᤶᤒᤠ ᤐᤠ᤺ᤴᤜᤠ᤹ ᤆᤧᤰᤋᤢᤛᤡ. ᤜᤧᤰᤁᤩᤠᤱ ᤁᤧᤍᤢᤰᤐᤠ ᤁᤧᤕ᤹ᤒᤠᤜᤠ᤹ ᤘᤣ᤺ᤴᤍᤢᤛᤡ॥

¹²ᤜᤧᤰᤁᤩᤠᤱ ᤏᤠᤶᤎᤩᤧᤖ ᤐᤳᤇᤧᤸᤗᤧ ᤌᤡᤰ ᤏᤧᤳ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤍᤩᤧᤀᤠᤱ ᤔᤧᤔᤧᤳᤋᤢ. “ᤀᤠᤍᤠᤱᤒᤠ ᤛᤡᤰᤛᤠᤶᤒᤣ. ᤁᤴ ᤔᤏᤠᤜᤠ᤹ ᤐᤠᤱᤄᤧᤍᤣ᤺ᤛᤧᤛᤧ᤹ᤀᤥ॥ ᤜᤧᤰᤁᤩᤠᤱ ᤂᤧᤴ ᤂᤡᤖᤡᤒᤠ ᤐᤠᤱᤈᤢᤶᤔᤥ ᤔᤧᤒᤣ᤺ᤰᤁᤠᤱ ᤆᤠᤔᤠ ᤌᤢᤱᤔᤠ ᤏᤢ ᤕᤠᤱᤎᤥ᤺ᤰᤔᤠᤖᤧᤴ ᤋᤱᤃᤠᤶ ᤔᤧᤈᤥᤃᤢᤖᤖᤥ. ᤌᤣᤀᤠᤱᤓᤧᤸᤗᤧ ᤀᤠᤏᤡ᤹ᤃ ᤀᤣ᤺ᤰᤛᤠᤍᤧᤴᤏᤥ ᤀᤠᤘᤠ᤹ᤖᤥ॥”

¹³ᤁᤖ ᤕᤧᤛᤢᤖᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤂᤡᤏᤡ᤹ᤀᤣ ᤁᤱᤜᤠ᤹ ᤁᤢᤈᤠ ᤐᤡᤖᤧᤶᤛᤡᤶᤔᤧ᤹ᤀᤥ” ᤁᤖ ᤂᤧᤱᤜᤠ᤹ᤖᤧ ᤔᤧᤒᤠ᤺ᤳᤋᤢ. “ᤀᤠᤏᤡᤃᤧᤃ ᤅᤠᤛᤡ ᤂᤖᤧ᤺ᤱ ᤏᤢ ᤏᤧᤳᤇᤡ ᤅᤠᤖᤰ ᤁᤳᤋᤢᤶᤒᤧᤖᤥ॥ ᤘᤣ᤹ ᤌᤣᤀᤠᤱ ᤜᤥ᤺ᤵ॥ ᤘᤣ᤹ ᤂᤖᤧ᤺ᤱ ᤔᤧᤴᤀᤡᤱᤅᤣ ᤁᤴ ᤔᤏᤠᤜᤠ᤹ ᤀᤠᤰᤂᤣᤗ᤹ᤖᤡᤰ ᤕᤥᤔᤠᤛᤡᤒᤣ᥅”

¹⁴(ᤂᤧᤵᤔᤥ ᤜᤧᤴᤇᤡᤱ ᤅᤠᤛᤡ (᥋᥆᥆᥆) ᤕᤠᤖᤡᤰ ᤕᤧᤶᤒᤡᤳᤇᤠ᤹ᤜᤠ᤹ ᤔᤧᤘᤕᤧᤖᤥ॥) ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ. “ᤂᤧᤱᤜᤠ᤹ ᤅᤠᤃᤡᤵᤖᤧᤴ (᥋᥆) ᤗᤢᤵᤐᤥ ᤌᤧ᤺ᤰᤐᤧᤳᤋᤠᤱ ᤕᤢᤱᤔᤠ ᤐᤠᤱᤄᤧᤶᤛᤡᤶᤔᤧ᤹॥”

¹⁵ᤜᤧᤰᤁᤩᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤒᤠ ᤜᤧᤰᤁᤣᤗ᤹ᤖᤡᤰ ᤁᤧᤖᤧᤰ ᤔᤏᤠᤜᤠ᤹ ᤔᤧᤕᤢᤰᤂᤢᤛᤡ॥

¹⁶ᤕᤧᤛᤢᤖᤧ ᤅᤠᤛᤡ ᤂᤖᤧ᤺ᤱᤜᤠ᤹ ᤏᤢ ᤏᤧᤳᤇᤡ ᤅᤠᤜᤠ᤹ ᤐᤰᤂᤢᤀᤠᤱ ᤌᤥ ᤛᤠᤱᤃᤪᤠᤶᤐᤣᤍᤠᤱ ᤗᤧᤵᤔᤠᤱ ᤀᤥᤔᤕᤧᤖ ᤏᤡᤱᤘ᤹ᤑᤢᤔᤠᤱᤅᤡᤴ ᤏᤥᤃᤧᤴ ᤐᤡᤖᤢᤀᤠᤱ ᤂᤧᤴ ᤂᤖᤧ᤺ᤱᤜᤠ᤹ ᤏᤢ ᤅᤠᤜᤠ᤹ ᤂᤧ᤺ᤰᤂᤢᤀᤠᤱ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤴ ᤔᤏᤠᤜᤠ᤹ ᤔᤧᤜᤠ᤺ᤳᤋᤢᤛᤡᤖ ᤑᤠ᤹ᤀᤠᤱ ᤐᤡᤖᤢᤛᤡ॥

¹⁷ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤠᤄᤠ ᤔᤧᤈᤀᤠᤱ ᤔᤧᤏᤴᤇᤢᤒᤠ ᤁᤢᤈᤡᤜᤠ᤹ ᤔᤧᤛᤢᤵᤛᤢᤸᤗᤧ ᤌᤡᤰ-ᤏᤧᤳ (᥇᥈) ᤏᤀᤡᤔᤠ ᤕᤥᤖᤧᤖᤥ॥

¹⁸ᤌᤡᤰ ᤕᤧᤴ ᤕᤧᤛᤢ᤺ᤴ ᤀᤣ᤺ᤰᤛᤠᤍᤧᤴᤏᤥ ᤋᤢᤘᤠ ᤆᤥ᤺ᤰᤏᤢ ᤘᤕᤧᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤂᤧᤵᤔᤥ ᤔᤧᤍᤩᤧ॥ ᤕᤧᤛᤢᤖᤧ ᤂᤧᤱᤜᤠ᤹ ᤛᤣ᤺ᤴᤍᤥᤛᤢᤛᤡ. “ᤀᤡᤱᤃᤠ᤹ ᤜᤠ᤺ᤳᤀᤠᤒᤣ ᤑᤠ᤹ᤀᤠᤱ ᤔᤏᤠᤜᤠ᤹ᤖᤧ ᤔᤧᤒᤠ᤺ᤳᤋᤢ᤹ᤒᤣ᥅”

¹⁹ᤜᤧᤰᤁᤣ᤺ᤸᤗᤧ ᤁᤢᤜᤢ᤹ᤛᤠᤶᤒᤠᤜᤠ᤹ᤖᤧ ᤏᤥᤃᤵ ᤔᤧᤒᤡᤖᤢ. “ᤁᤢᤓᤠᤖᤧ ᤂᤧᤏᤧ᤹ ᤒᤵᤋᤡᤛ᤻ᤔᤠ ᤁᤧᤒᤡᤒᤠ ᤕᤢᤜᤢᤴᤏᤠ ᤏᤢ ᤘᤣ᤹ᤜᤠ᤹ᤖᤧᤃ ᤀᤣᤗᤡᤕᤠ ᤑᤠ᤹ᤀᤠᤱ ᤁᤧᤶᤔᤧᤳᤗᤥ॥ ᤁᤢᤓᤠᤖᤧᤃ ᤀᤢᤴᤇᤥ᤺ᤴᤒᤠ ᤘᤣ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠᤎᤡᤰ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤅᤧᤀᤠᤱ ᤘᤠ᤹ ᤑᤠ᤹ᤀᤠᤱ ᤁᤧᤶᤔᤧᤳᤗᤥ॥”

²⁰ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤛᤣ᤺ᤴᤍᤥᤛᤢᤛᤡ. “ᤁᤖ ᤂᤡᤏᤡ᤹ᤃ. ᤀᤡᤱᤃᤠ᤹ ᤜᤠ᤺ᤳᤀᤠᤒᤣ ᤑᤠ᤹ᤀᤠᤱ ᤕᤠᤵᤔᤡ ᤁᤧᤔᤧᤳᤋᤡ᤹ᤒᤣ᥅” ᤐᤋᤪᤢᤛᤖᤧ ᤏᤥᤃᤵ ᤐᤡᤖᤢ. “ᤂᤧᤏᤧ᤹ᤃ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣ᤺ᤴᤍᤢᤒᤠ ᤂᤪᤡᤛ᤻ᤋᤏᤧ᤹ᤖᤥ॥”

²¹ᤕᤧᤛᤢᤖᤧ ᤂᤧᤱᤜᤠ᤹ ᤁᤴ ᤐᤠ᤺ᤴᤏᤡᤴ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤔᤧᤳᤋᤧᤶᤛᤡᤶᤔᤧᤴᤏᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢᤛᤡ॥

²²ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤸᤗᤧ ᤕᤖᤡᤰ ᤋᤢᤰᤂᤣᤜᤠ᤹ ᤋᤢᤶᤔᤠ ᤐᤥ᤺ᤱ॥ ᤜᤧᤰᤁᤩᤠᤱ ᤕᤜᤢᤍᤡ ᤋᤢᤶᤗᤠᤶᤗᤥ᤺ᤒᤠᤜᤠ᤹ᤖᤧ. ᤋᤢᤶᤏᤡᤱᤘᤠ᤹ᤑᤢᤛᤠᤶᤒᤠᤜᤠ᤹ᤖᤧ ᤏᤢ ᤛᤠᤶᤕᤥᤌᤡᤶᤛᤠᤶᤒᤠᤜᤠ᤹ᤖᤧ ᤔᤧᤏᤠ᤹ᤀᤠ. ᤜᤧᤰᤁᤩᤠᤱ ᤔᤧᤛᤧᤳᤋᤠᤀᤠᤱ ᤛᤢᤶ ᤕᤧᤴ ᤀᤣᤃᤠᤱ ᤛᤡ᤺ᤔᤧᤴᤗᤠᤶ ᤕᤠᤶᤔᤥ ᤜᤡᤱᤅᤠᤖᤥ॥”

²³ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤀᤠᤳᤋᤡᤸᤗᤧ ᤀᤡᤱᤃᤠ᤹ ᤋᤡᤶᤔᤠ ᤏᤡᤱᤘᤠ᤹ ᤆᤥᤃᤢ᤹. ᤜᤠᤖᤠ᤹ ᤂᤧᤸᤗᤧ ᤀᤡᤱᤃᤠ᤹ᤖᤰ ᤆᤠᤱ ᤌᤢᤅᤢᤱ ᤁᤧᤗ᤹ᤒᤠ ᤁᤢᤏᤡᤱᤘᤠ᤹ᤀᤡᤴ ᤛᤧᤖᤢᤀᤠᤱ ᤌᤡᤰᤕᤠ᤺ᤴᤎᤰ ᤛᤡᤗᤠᤶᤛᤠᤰᤔᤠ ᤁᤢᤛᤡᤱᤅᤡᤴ ᤐᤰᤂᤢᤀᤠᤱ ᤀᤡᤱᤃᤠ᤹ ᤋᤡᤶᤔᤠᤖᤖᤥ॥

²⁴ᤌᤣᤀᤠᤱᤓᤧᤸᤗᤧ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤋᤠᤱᤛᤧ᤺ᤵᤋᤢᤱ ᤗ᤹ᤖᤡᤰ ᤏᤡᤱᤘᤠ᤹ ᤆᤥᤃᤢ᤹. ᤂᤧᤸᤗᤧ ᤂᤧᤴᤏᤠᤱ ᤔᤠᤛᤢ᤹. ᤁᤖ ᤀᤠᤳᤋᤡᤸᤗᤧ ᤁᤢᤜᤡᤱᤔᤴᤏᤡᤴ ᤀᤠᤗᤠᤃᤡ ᤔᤠᤛᤢ᤹. ᤂᤧᤸᤗᤧ ᤔᤧᤴᤏᤢᤵᤔᤏᤠᤒᤠ ᤜᤡᤱᤔᤴ ᤂᤥ᤺ᤛᤢ᤹ᤖᤥ॥

²⁵ᤔᤧᤴᤇᤠᤶ ᤕᤠᤵᤔᤡ᤺ᤸᤗᤧ ᤁᤠᤰ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤠᤴ ᤂᤢᤏᤧ᤹ᤀᤡᤴ ᤆᤥᤃᤢᤛᤠᤱ ᤁᤢᤜᤡᤱᤔᤴᤏᤡᤴ ᤔᤠ᤺ᤛᤢᤏᤧ ᤑᤠ᤹ᤃᤪ ᤏᤢ᤺ᤒᤠ ᤐᤥ᤺ᤱᤒᤡ᥅

²⁶ᤀᤠᤳᤋᤡᤴ ᤔᤏᤠ᤺ᤴ ᤀᤡᤱᤃᤠ᤹ᤏᤢ ᤜᤧᤰᤁᤩᤠᤱ ᤀᤠᤒᤠ᤺ᤴᤈᤠᤰᤁᤡᤴᤏᤢ ᤛᤡᤖᤡᤱ ᤔ᤹᤺. ᤀᤡᤱᤃᤠ᤹ ᤔᤧᤴᤇᤠᤶᤛᤠ᤺ᤴᤏᤠᤱ ᤀᤠᤔᤡᤔᤡᤍᤡᤱᤏᤢ. ᤀᤠᤶᤒᤠᤖᤧ ᤁᤢᤔᤡᤔᤡᤍᤡᤱᤏᤢ ᤜᤧᤰᤁᤩᤠᤱ ᤛᤣᤛᤣ ᤔᤠᤱᤗᤠᤀᤡᤱᤒᤠᤜᤠ᤹ᤖᤧ ᤂᤢᤏᤡ᤹ ᤔᤡᤔᤡᤍᤡᤱᤏᤢ ᤕᤢ᤺ᤀᤠᤸᤗᤧ ᤂᤧᤴᤏᤡᤴ ᤀᤠᤔᤏᤠ ᤐᤠ᤺ᤵᤔᤠ ᤛᤡᤖᤡᤱ ᤔ᤺ᤀᤠᤖᤥ॥

²⁷ᤀᤡᤱᤃᤠ᤹ ᤛᤧᤰᤂᤠᤀᤣ ᤔᤧᤳᤏᤡᤱ. ᤁᤵᤔᤥ ᤁᤧᤕᤧᤵᤐᤠ ᤁᤢᤓᤠ ᤔᤏᤠᤜᤠ᤹ᤖᤧ ᤏᤡᤱᤘᤠ᤹ᤑᤢᤜᤠᤱᤈᤢᤶᤔᤡᤴ ᤕᤢ᤺ᤒᤠ ᤔᤧᤴᤏᤡᤀᤣ ᤌᤠᤖᤡᤰ ᤔᤧᤴᤇᤡ᤺ᤏᤧᤴᤗᤥ॥”

²⁸ᤂᤧᤴ ᤐᤠ᤺ᤴᤏᤡᤴ ᤐᤠ᤺ᤳᤋᤢᤒᤠ ᤕᤧᤳᤇᤡ (᥎) ᤕᤧᤴ ᤀᤣᤃᤠᤱ ᤕᤧᤛᤢᤖᤧ ᤐᤋᤪᤢᤛ. ᤕᤢᤜᤢᤴᤏᤠ ᤏᤢ ᤕᤠᤁᤢᤒᤧᤴ ᤋᤣ᤹ᤖᤢᤛᤡᤀᤠᤱ ᤁᤥ᤺ᤰᤔᤠᤀᤥ ᤌᤥ ᤋᤢᤘᤠ ᤆᤥ᤺ᤰᤛᤧ ᤐᤣ॥

²⁹ᤂᤢᤏᤧ᤹ ᤋᤢᤘᤠ ᤆᤥ᤺ᤰᤏᤢ ᤐᤳᤇᤧᤸᤗᤧ ᤁᤢᤏᤠᤖᤠ᤺ᤴ ᤗᤧᤰᤛᤡᤱᤗ ᤐᤣᤀᤠᤱ ᤂᤢᤏᤧ᤹ ᤁᤢᤍᤣ᤺ᤳᤜᤠ᤹ ᤔᤡᤰ ᤁᤧᤈᤧᤶᤒᤠ ᤑ᤺ᤃᤧᤗ᤹ᤒᤠ ᤐᤥ᤺ᤰᤂᤧᤖ ᤗᤧᤰᤋᤧᤖᤥ॥

³⁰ᤜᤧᤰᤁᤩᤠᤱ ᤂᤧᤵᤔᤥ ᤏᤧᤵᤑᤢ ᤔᤏᤠᤜᤠ᤹ ᤛᤠᤱᤃᤪᤠᤶᤃᤧᤴ ᤀᤥ᤺ᤳᤋᤡᤒᤠ ᤔᤡᤔᤡᤍᤡᤱᤅᤥ ᤌᤠ᤺ᤶᤏᤧᤳᤇᤡᤀᤠᤱ ᤕᤧᤛᤢ᤺ᤴᤏᤢ ᤋᤠ᤹ᤈᤧᤰᤂᤧᤳᤇᤡ॥ ᤂᤧᤱᤜᤠ᤹ ᤔᤠᤱᤏᤡᤱᤘᤠ᤹ᤐᤠ᤺ᤴ ᤁᤧᤒᤠ᤺ᤵᤐᤠ ᤀᤣᤗᤡᤕᤠ᤺ᤴ ᤏᤢ ᤔᤥᤛᤠ᤺ᤴ ᤘᤕᤧᤳᤇᤡᤖᤥ॥ ᤂᤧᤱᤜᤠ᤹ᤖᤧ ᤕᤧᤛᤢᤖᤧ ᤁᤢᤛᤡ᤺ᤔᤧᤴ ᤏᤢ ᤕᤖᤢᤛᤗᤧᤶᤔᤥ ᤆᤥ᤺ᤰᤔᤠ ᤛᤢ᤺ᤵᤔᤠ ᤀᤡ᤺ᤳᤋᤧᤒᤠ ᤕᤠ᤺ᤶᤒᤰᤁᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤋᤠ᤹ᤔᤧᤈᤧᤰᤂᤧ॥

³²ᤐᤋᤪᤢᤛ ᤏᤢ ᤁᤢᤴᤈᤢᤶᤜᤠ᤹ ᤔᤧᤀᤡᤵᤛᤧᤀᤠᤱ ᤔᤧᤏᤧᤛ᤻ᤛᤧ. ᤁᤖ ᤂᤧᤱᤜᤠ᤹ ᤋᤠᤍᤠᤵ ᤗ᤹ᤖᤡᤰ ᤔᤧᤛᤥᤖᤧᤸᤗᤧ ᤕᤧᤛᤢᤖᤧ ᤁᤢᤔᤡᤔᤡᤍᤡᤱᤅᤡᤴ ᤜᤧᤰᤁᤩᤠᤱ ᤂᤧᤴ ᤏᤧᤵᤑᤢ ᤔᤏᤠᤜᤠ᤹ ᤂᤢᤏᤧ᤹ᤏᤢ ᤕᤧᤒᤧᤳᤇᤡᤒᤠ ᤔᤧᤏᤡ᤺ᤛᤢ॥

³³ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤖᤧ ᤕᤧᤛᤢ᤺ᤴ ᤐᤰᤌᤩᤧᤛᤢᤀᤠᤱ ᤐᤣᤛᤡᤖ ᤐᤳᤇᤧᤳᤇᤡᤸᤗᤧ ᤐᤋᤪᤢᤛᤖᤧ ᤕᤧᤛᤢ᤺ᤴ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤠᤏᤡ᤹ᤃ ᤁᤵᤔᤥᤀᤣ ᤀᤠᤘᤠ᤹ᤀᤡᤸᤗᤧ ᤏᤢ᤺ᤒᤠ ᤐᤥ᤺ᤱᤗᤥ॥ ᤀᤠᤏᤡᤃᤧ ᤁᤵᤔᤥ ᤛᤢᤶᤛᤡ ᤕᤠᤰᤛᤠᤜᤠ᤹ ᤆᤥᤃᤢᤶᤒᤧ᤹. ᤌᤡᤰ ᤂᤧᤏᤧ᤹ᤀᤡᤴ ᤜᤧᤰᤁᤩᤠᤱ ᤔᤥᤛᤠ᤺ᤴ ᤏᤢ ᤀᤣᤗᤡᤕᤠᤖᤧ ᤂᤢᤴᤇᤡ᤹ ᤗᤠᤃᤡᤀᤠᤱ ᤌᤡᤰ ᤌᤡᤰ ᤆᤥᤃᤢᤶᤒᤧ᤹ᤖᤥ᥄” (ᤁᤖ ᤂᤢᤏᤧ᤹ ᤌᤣ᤺ᤴ ᤐᤠ᤺ᤳᤋᤢᤱᤒᤣ ᤑᤠ᤹ᤀᤠᤱ ᤌᤣᤀᤠᤱ ᤁᤢᤏᤡᤱᤘᤠ᤹ ᤔᤧᤕᤠᤃᤧᤴ॥)

³⁴ᤂᤢᤏᤧ᤹ ᤐᤠᤖᤧᤖ ᤐᤳᤇᤧᤸᤗᤧᤛᤠ ᤂᤧᤵᤔᤥ ᤂᤠᤵᤔᤡ᤺ᤳᤋᤡᤸᤗᤧ ᤂᤧᤱᤜᤠ᤹ ᤋᤧᤵᤋᤢᤛᤡ. ᤜᤧᤰᤁᤣ᤺ᤸᤗᤧ ᤂᤧᤱᤜᤠ᤹ ᤛᤠ᤹ᤖᤡᤰ ᤔᤧᤃᤡᤛᤧᤖᤥ॥

³⁵ᤂᤠᤵᤔᤡ᤺ᤳᤋᤥᤗᤠᤶ ᤀᤡᤰᤗᤠᤎᤡᤰ ᤋᤩᤧ. “ᤁᤴ ᤀᤠᤛ᤻ᤛᤠ᤺ᤖᤥ. ᤂᤢᤏᤧ᤹ᤀᤣ ᤛᤣᤃᤢᤱᤅᤠᤱ ᤘᤠ᤹ᤀᤠᤖᤥ᥄ ᤂᤢᤏᤧ᤹ ᤐᤠ᤺ᤳᤋᤢᤒᤠ ᤐᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ॥”

³⁶ᤂᤧᤴ ᤀᤡᤰᤗᤠ᤺ᤴ ᤐᤠᤖᤧ ᤆᤢᤖᤧᤀᤠᤱ ᤂᤧᤵᤔᤥ ᤕᤧᤛᤢ᤺ᤴᤗᤰ ᤔᤧᤏᤡ᤺ᤛᤢᤖᤥ॥ ᤜᤢ᤹ᤛᤠᤶᤒᤠᤜᤠ᤹ᤖᤧ ᤁᤴ ᤐᤠ᤺ᤴᤏᤡᤴ ᤂᤢᤏᤡ᤹ ᤏᤡᤱᤘᤠ᤹ ᤛᤡᤃᤠᤱ ᤔᤧᤕᤢᤰᤂᤢᤀᤠᤱ ᤂᤧᤴ ᤕᤧᤶᤔᤥ ᤀᤠᤳᤋᤡᤴᤜᤠ᤹ᤀᤠᤱ ᤔᤧᤶᤔᤧᤳᤋᤢᤴᤇᤡᤴᤗᤥ॥

³⁷ᤁᤢᤍᤠ᤺ᤴᤍᤡᤰᤔᤠ ᤂᤧᤱᤜᤠ᤹ ᤁᤥ᤺ᤰᤔᤠᤀᤥᤏᤢ ᤕᤥ ᤔᤧᤎᤩᤧ. ᤜᤧᤰᤁᤩᤠᤱ ᤕᤖᤡᤰ ᤔᤏᤠᤜᤠ᤹ᤖᤧ ᤔᤧᤍᤢᤔᤢᤛᤡᤖᤥ॥

³⁸ᤂᤧᤴ ᤔᤏᤠᤜᤠ᤹ᤀᤥ ᤌᤡᤰᤗᤧ ᤁᤢᤛ᤻ᤛᤠ᤺ ᤆᤢᤰᤐᤧᤴ ᤑᤧᤳᤋᤢᤀᤠᤱ ᤕᤶᤒᤠ ᤀᤡᤰᤗᤠᤀᤥ ᤀ᤺ᤰᤋᤧᤖ ᤔᤧᤳᤋᤢ. “ᤛᤡᤰᤛᤠᤶᤒᤣ. ᤀᤡᤱᤃᤠ᤹ ᤀᤠᤛ᤻ᤛᤠ᤺ᤴ ᤀᤥᤔᤧᤳᤋᤠᤱ ᤐᤡᤖᤠᤱᤅᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤧ᤹ᤖᤥ॥ ᤁᤴ ᤗᤳᤌᤡᤰᤗᤰ ᤀᤠᤛ᤻ᤛᤠ᤺ᤖᤥ॥

³⁹ᤀᤧᤳᤗᤧᤱ ᤑᤧᤴᤛᤠᤶᤔᤡᤸᤗᤧ ᤑᤳᤋᤢ. ᤋᤢᤰᤂᤣ ᤆᤠ᤺ᤳᤋᤢᤀᤠᤱ ᤂᤠᤶᤔᤥ ᤐᤡᤷᤎᤠᤵ ᤌᤠᤵᤛᤢ. ᤜᤧᤰᤁᤩᤠᤱ ᤛᤸᤗᤡᤰ ᤛᤴᤇᤡᤱᤗᤥ॥ ᤜᤧᤰᤁᤩᤠᤱ ᤁᤢᤔᤢᤖᤠᤀᤥᤗᤠᤶ ᤁᤢᤎᤩᤠ᤺ᤳ ᤗ᤺ᤳᤋᤢᤖᤥ॥ ᤑᤧᤴᤛᤠᤶᤔᤡᤸᤗᤧ ᤛᤵᤑᤠ ᤛᤵᤑᤠᤖᤰ ᤗᤧᤖᤢᤀᤠᤱ ᤂᤢᤏᤧ᤹ᤃ ᤔᤧᤱᤔᤠ ᤀᤡ᤺ᤳᤋᤢᤀᤠᤱ ᤘᤠ᤹ᤖᤥ॥

⁴⁰ᤀᤡᤱᤃᤠ᤹ ᤁᤧᤜᤢ᤹ᤛᤠᤶᤒᤠᤜᤠ᤹ ᤁᤴ ᤑᤧᤴᤛᤠᤶᤔᤡᤴ ᤀᤠᤛ᤻ᤛᤠ᤺ᤸᤗᤥᤗᤠᤶ ᤏᤠ᤺ᤳᤋᤧᤶ ᤀᤠᤒᤡᤖᤧᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤋᤢᤱᤛᤡᤱ. ᤁᤖ ᤔᤧᤴᤇᤢᤰᤋᤢᤴᤗᤥ॥”

⁴¹ᤜᤧᤰᤁᤣ᤺ᤸᤗᤧ ᤕᤧᤛᤢᤖᤧ ᤏᤥᤃᤵ ᤐᤡᤖᤢ. “ᤏᤛᤠ᤺ᤴ ᤁᤧᤜᤥ᤺ᤵᤐᤠ ᤏᤢ ᤋᤠᤰᤁᤧᤓᤧ᤹ᤒᤠ ᤔᤏᤠᤛᤣ. ᤀᤠᤵᤑᤠᤸᤗᤧ ᤌᤠᤖᤡᤰ ᤀᤡᤱᤃᤠ᤹ ᤂᤡᤏᤡ᤹ᤏᤢ ᤘᤠ᤹ᤀᤠᤀᤠᤱ ᤏᤠᤛᤡ ᤌ᤺ᤳᤏᤡᤱᤒᤠᤒᤣ᥅ ᤂᤧᤴ ᤆᤢᤰᤐᤧᤴ ᤁᤳᤏᤠ ᤑᤧᤳᤋᤧᤶᤔᤧ᤹॥”

⁴²ᤜᤧᤰᤁᤩᤠᤱ ᤂᤧᤴ ᤆᤢᤰᤐᤧᤴ ᤕᤧᤛᤢ᤺ᤴ ᤗᤧᤵᤔᤠᤱ ᤐᤣᤖ ᤐᤳᤇᤧᤸᤗᤧ ᤑᤧᤴᤛᤠᤶᤔᤡᤸᤗᤧ ᤑᤳᤋᤢᤀᤠᤱ ᤐᤡᤷᤎᤠᤵ ᤌᤠᤵᤛᤢ. ᤁᤖ ᤕᤧᤛᤢᤖᤧ ᤂᤧᤴ ᤑᤧᤴᤛᤠᤶᤔᤡᤴ ᤂᤧᤴ ᤆᤢᤰᤐᤧᤸᤗᤥᤗᤠᤶ ᤗ᤺ᤴᤍᤧ ᤐᤣᤃᤧ᤹ ᤑᤠ᤹ᤀᤠᤱ ᤀᤡᤱᤈᤠ᤺ᤱ ᤐᤡᤖᤢ ᤜᤧᤰᤁᤩᤠᤱ ᤂᤧᤴ ᤆᤢᤰᤐᤧᤴ ᤘᤣ᤺ᤴᤍᤢᤀᤠᤱ ᤁᤢᤶᤒᤠ ᤐᤡᤖᤢᤖᤥ॥

⁴³ᤜᤧᤰᤁᤩᤠᤱ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤕᤶᤒᤠ ᤁᤢᤔᤢᤰᤛᤠᤶᤔᤡᤴ ᤔᤧᤏᤡ᤺ᤛᤢᤀᤠᤱ ᤁᤧᤖᤧᤰ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧ॥ ᤕᤧᤛᤢᤖᤧ ᤆᤥᤃᤢᤒᤠ ᤁᤧᤖᤧᤰ ᤕᤠ᤺ᤶᤒᤰᤁᤥ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤏᤡᤱᤘᤠ᤹ ᤔᤕᤧᤸᤗᤧ ᤕᤧᤛᤢᤖᤧ ᤁᤢᤜᤢ᤹ᤛᤠᤶᤒᤠᤜᤠ᤹ ᤔᤧᤳᤋᤢᤛᤡ.

⁴⁴“ᤀᤠᤒᤠ᤺ᤴᤏᤡᤴ ᤂᤧᤵᤛᤧᤶᤔᤧ᤹ᤀᤥ-ᤀᤠᤸᤗ ᤔᤧᤴᤇᤠᤶᤛᤠ᤺ᤴ ᤀᤡᤱᤔᤧᤗᤧᤰᤳᤋᤢ᤹ ᤜᤧᤰᤁᤩᤠᤱ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤜᤢᤰᤁᤥ ᤜᤢᤰ ᤔᤧᤛᤢᤵᤋᤢ ᤔᤧᤒᤡᤖᤢ᤹ᤖᤥ॥”