8वेॽहाॽरे़ “माङ्निङ्वाॽपाःन् के़बाःप्पा एलियाःन् याम्मो लःन्दे़आङ् वाॽ” मे़बाःत्तु, हे़क्क्याङ् आल्लसाङ् वेॽ मनाहाॽरे़ “उन्छोःन्बा माङ्निङ्वाॽपाःन् के़बाःप्पाधिक्याम्मो हिङे़आङ् वाॽ” मे़बाःत्तुरो॥
9हे़क्केःल्ले़ हे़रोदरे़ पाःत्तु, “बप्तिस्मा के़बिबा युहुन्नाःङ्ग कुनिःङ्मान्खक् पाङ्घुङ्सिङ्ङाङ् वये़, कर आक्खेलॽरिक् याम्मो हिङे़बे? इङ्गाॽ कन् थेःन्ने़ खे़प्सुङ्बे?” हे़क्क्याङ् खुने़ॽए ओमे़प्मा निङ्वाॽ चोगु॥
10हे़क्क्याङ् सेःक्युक्मिबाहाॽ मे़नुःक्खे़ मे़द्ये़आङ् खे़ङ्हाॽरे़ मे़जोगुबा याःम्बक्हाॽ ये़सुःन् मे़जे़क्तु॥ हे़क्क्याङ् ये़सुरे़ खे़ङ्हाॽ बे़थसेदा पाङ्जुम् ले़प्माङ् स्वाःत्ताङ् तेॽरुसिआङ् पे,
11कर यरिक् मनाहाॽरे़ खे़न् निङ्वाॽ मे़घोःसुआङ् खे़ङ्हाॽरे़ खुनिॽ एगाङ् एगाङ् मे़धासिङ्॥ ये़सुरे़ खे़ङ्हाॽ के़रे़क् लाङ्दाःक्मा पिरुसिआङ् निङ्वाॽफुहाङ्जुम्बा पाःन्हाॽ चे़क्तुसि, हे़क्क्याङ् के़दुक्पा के़यॽबाहाॽ वेःन्दुसि॥
12हे़क्क्याङ् नाम्ध्ये़र पत्छे़ल्ले़ थिक् ने़त् कुहुॽसाम्बाहाॽ मे़द्ये़आङ् मे़मे़त्तु, “आदाङ्बा सिक्साम्बे, कन् मनाहाॽ पाङ्घे़देःसे़से़ॽओ॥ हे़क्क्याङ् खे़न् खिरिबा पाङ्जुम्मो मे़बेःक्काङ् चामा थुङ्मा नु याङ्धोःक्मारे़न्तङ्गाम् मे़जोगुररो, थेआङ्भे़ल्ले़ आनिॽग एःक्सादे़न्नो आवाॽरो॥”
13कर ये़सुरे़ खे़ङ्हाॽ मे़त्तुसि, “खिनिॽए कङ्हाॽ कुजा पिरे़म्सिम्मे़ॽओ” कर खे़ङ्हाॽरे़ मे़बाःत्तु, “आनिगे़ग ङासि खरे़ःङ् नु ने़त्छि ङारक् कत्तुम्बे़रो॥ वेॽ थेआङ् होःप्॥ वेॽ खरे़ःङ् मे़न्इङ्ङे कन् मनाहाॽ आक्खेलॽरिक् योमासिबे?”
14(खे़प्मो हे़न्छिङ् ङासि (५०००) यारिक् ये़म्बित्छाॽहाॽ मे़वये़रो॥) ये़सुरे़ कुहुॽसाम्बाहाॽ मे़त्तुसि, “खे़ङ्हाॽ ङागिप्रे़न्(५०) लुप्पो थे़ःक्पे़त्ताङ्युङ्मा पाङ्घे़म्सिम्मे़ॽ॥”
15हे़क्क्याङ् कुहुॽसाम्बाहाॽरे़ बा हे़क्केलॽरिक् के़रे़क् मनाहाॽ मे़युक्खुसि॥
16ये़सुरे़ ङासि खरे़ःङ्हाॽ नु ने़त्छि ङाहाॽ पक्खुआङ् थो साङ्ग्राम्पेदाङ् ले़प्माङ् ओमये़र निङ्वॽफुमाङ्ङिन् नोगे़न् पिरुआङ् खे़न् खरे़ःङ्हाॽ नु ङाहाॽ खे़ःक्खुआङ् कुहुॽसाम्बाहाॽ खे़न् मनाहाॽ मे़हाःत्तुसिर फाॽआङ् पिरुसि॥
17हे़क्क्याङ् खे़ङ्हाॽरे़ खाघा मे़जआङ् मे़नन्छुबा कुजिहाॽ मे़सुप्सुल्ले़ थिक्-ने़त् (१२) नइमा योरे़रो॥
18थिक् ये़न् ये़सुःन् एःक्सादे़न्नो तुवा चोःक्नु वये़ल्ले़ कुहुॽसाम्बाहाॽ खे़प्मो मे़द्ये़॥ ये़सुरे़ खे़ङ्हाॽ सेःन्दोसुसि, “इङ्गाॽ हाःत्आबे फाॽआङ् मनाहाॽरे़ मे़बाःत्तुॽबे?”
19हे़क्केःल्ले़ कुहुॽसाम्बाहाॽरे़ नोगप् मे़बिरु, “कुभारे़ खे़ने़ॽ बप्तिस्मा के़बिबा युहुन्ना नु वेॽहाॽरे़ग एलिया फाॽआङ् के़म्मे़त्लो॥ कुभारे़ग उन्छोःन्बा वेॽ माङ्निङ्वाॽपाःन् के़बाःप्पाधिक्सिःमे़न्लाम् याम्मो हिङे़आङ् वाॽ फाॽआङ् के़म्मे़त्लो॥”
20ये़सुरे़ खे़ङ्हाॽ याम्मो सेःन्दोसुसि, “कर खिनिॽग, इङ्गाॽ हाःत्आबे फाॽआङ् याप्मि के़मे़त्तिॽबे?” पत्रुसरे़ नोगप् पिरु, “खे़ने़ॽग निङ्वाॽफुमाङ्ङिल्ले़ सेःन्दुबा ख्रिस्तने़ॽरो॥”
21ये़सुरे़ खे़ङ्हाॽ कन् पाःन्निन् आत्तिन्हाॽआङ् मे़मे़त्ते़म्सिम्मे़न्ने़ॽ फाॽआङ् इङ्जाःङ् पिरुसि॥
22खे़ङ्हाॽ मे़त्तुसि, “इङ्गाॽ मे़न्छाम्साःल्ले़ यरिक् तुक्खेहाॽ तुम्मा पोःङ्॥ हे़क्क्याङ् यहुदि तुम्लाम्लोःबाहाॽरे़, तुम्निङ्वाॽफुसाम्बाहाॽरे़ नु साम्योथिम्साम्बाहाॽरे़ मे़नाॽआ, हे़क्क्याङ् मे़से़त्ताआङ्सुम् ये़न् एगाङ् सिःमे़न्लाम् याम्मो हिङ्ङारो॥”
23ये़सुरे़ खे़ङ्हाॽ याम्मो मे़त्तुसि, “आत्तिल्ले़ इङ्गाॽ तिम्मा निङ्वाॽ चोगुॽ, हाराॽ खे़ल्ले़ इङ्गाॽरक् चाङ्थुङुङ् के़लॽबा कुनिङ्वाॽइन्से़रुआङ् थिक्याःन्धक् सिलाम्साक्मा कुसिङ्ङिन् पक्खुआङ् इङ्गाॽ तिम्माररो॥
24थेआङ्भे़ल्ले़ आत्तिल्ले़ कुहिङ्मन्निन् ताङ्से़ःप्तुङ् लॽरिक् निङ्वाॽ चोगुॽ, खे़ल्ले़ खे़न्नाङ् मासुॽ, कर आत्तिल्ले़ कुहिङ्मन्निन् आलागि मासुॽ, खे़ल्ले़ मे़न्नुप्मनाबा हिङ्मन् खोःसुॽरो॥
25मे़न्छाम् याप्मिःल्ले़ काक् इक्सादिङ् खाम्बेःक्मान् खुने़ॽइन् चोगुसाङ् कुहिङ्मन्निन् माःसुने़ फाॽग्र नुःबा पोःङ्बि?
26आत्तिन् मनाःन् इङ्गाॽनु हे़क्क्याङ् आबाःन्जाक्किन्नु सिरिङ् मःॽ, इङ्गाॽ मे़न्छाम्साःन्नाङ् आमिमिदिङ्नु, आम्बारे़ कुमिमिदिङ्नु हे़क्क्याङ् सेसे माङ्लाइङ्बाहाॽरे़ खुनिॽ मिमिदिङ्नु युःआल्ले़ खे़न्निन् आमना पाःप्मा सिरिङ् मःआरो॥
27इङ्गाॽ से़क्खाए मे़त्निङ्, कप्मो के़ये़प्पा कुभा मनाहाॽरे़ निङ्वाॽफुहाङ्जुम्मिन् युःबा मे़न्निए थारिक् मे़न्छिःने़न्लो॥”
28खे़न् पाःन्निन् पाःत्तुबा ये़त्छि (८) ये़न् एगाङ् ये़सुरे़ पत्रुस, युहुन्ना नु याकुबे़न् तेॽरुसिआङ् कोःक्माओ थो तुवा चोःक्से़ पे॥
29खुने़ॽ तुवा चोःक्नु पत्छे़ल्ले़ कुनाराःन् ले़क्सिङ्ल पेआङ् खुने़ॽ कुदेःत्हाॽ मिक् के़जे़म्बा फःगे़लॽबा पोःक्खे़र ले़क्ते़रो॥
30हे़क्क्याङ् खे़प्मो ने़प्फु मनाहाॽ साङ्ग्राम्गे़न्ओःत्तिबा मिमिदिङ्ङो थाःम्ने़त्छिआङ् ये़सुःन्नु ताॽजे़क्खे़त्छि॥ खे़ङ्हाॽ माङ्निङ्वाॽपाःन् के़बाःप्पा एलियाःन् नु मोसाःन् वये़त्छिरो॥ खे़ङ्हाॽरे़ ये़सुरे़ कुसिःमे़न् नु यरुसले़म्मो चोःक्मा सुःप्मा इःत्ते़बा याःम्बक्किल्ले़ कुयाःम्बेओ ताॽमे़जे़क्खे़॥
32पत्रुस नु कुन्जुम्हाॽ मे़इप्से़आङ् मे़ने़स्से़, कर खे़ङ्हाॽ तादाप् लॽरिक् मे़सोरे़ल्ले़ ये़सुरे़ कुमिमिदिङ्ङिन् हे़क्क्याङ् खे़न् ने़प्फु मनाहाॽ खुने़ॽनु ये़बे़त्छिबा मे़निःसु॥
33हे़क्क्याङ् खे़न् मनाहाॽरे़ ये़सुःन् पक्थ्ये़सुआङ्पेसिर पत्छे़त्छिल्ले़ पत्रुसरे़ ये़सुःन् मे़त्तु, “सिक्साम्बे, आनिॽग कप्मोए आवाॽइल्ले़ नुःबा पोःङ्लो॥ आनिगे़ कप्मो सुम्सि याक्साहाॽ चोगुम्बे़ॽ, थिक् खे़ने़ॽइन् हे़क्क्याङ् मोसाःन् नु एलियारे़ खुन्छिॽ लागिआङ् थिक् थिक् चोगुम्बे़ॽरो!” (कर खुने़ॽ थेःन् पाःत्तुङ्बे फाॽआङ् थेआङ् कुनिङ्वाॽ मे़यागे़न्॥)
34खुने़ॽ पारे़र पत्छे़ल्ले़सा खे़प्मो खाप्मिःत्तिल्ले़ खे़ङ्हाॽ ते़प्तुसि, हे़क्केःल्ले़ खे़ङ्हाॽ साॽरिक् मे़गिसे़रो॥
35खाप्मिःत्तोलाम् इक्लाधिक् त्ये़, “कन् आस्साःरो, खुने़ॽए सेगुङ्ङाङ् वाॽआरो! खुने़ॽ पाःत्तुबा पाःन्निन् खे़प्से़म्मे़ॽओ॥”
36खे़न् इक्लाःन् पारे़ चुरे़आङ् खे़प्मो ये़सुःन्लक् मे़निःसुरो॥ हुॽसाम्बाहाॽरे़ कन् पाःन्निन् खुनिॽ निङ्वाॽ सिगाङ् मे़युक्खुआङ् खे़न् ये़म्मो आत्तिन्हाॽआङ् मे़म्मे़त्तुन्छिन्लो॥
37कुदाःन्दिक्मा खे़ङ्हाॽ कोःक्माओनु यो मे़ध्ये़, हे़क्क्याङ् यरिक् मनाहाॽरे़ मे़दुमुसिरो॥
38खे़न् मनाहाॽओ थिक्ले़ कुस्साः चुक्पे़न् फे़त्तुआङ् यम्बा इक्लाओ अःक्ते़र मे़त्तु, “सिक्साम्बे, इङ्गाॽ आस्साःन् ओमे़त्ताङ् पिराङ्ङे़ॽ फाॽआङ् पेलि फाक्ने़ॽरो॥ कन् लत्थिक्लक् आस्साःरो॥
39ए़त्ले़ङ् फे़न्साम्मिल्ले़ फत्तु, तुक्खे चाःत्तुआङ् खाम्मो पिर्धाप् थाप्सु, हे़क्क्याङ् सल्लिक् सन्छिङ्लो॥ हे़क्क्याङ् कुमुराओलाम् कुध्याःत् लःत्तुरो॥ फे़न्साम्मिल्ले़ सप्फा सप्फारक् ले़रुआङ् खुने़ॽग मे़ङ्मा इःत्तुआङ् वाॽरो॥
40इङ्गाॽ के़हुॽसाम्बाहाॽ कन् फे़न्साम्मिन् आस्साःल्लोलाम् नाःत्ते़म् आबिरे़म्मे़ॽ फाॽआङ् पेलि फाक्तुङ्सिङ्, कर मे़न्छुक्तुन्लो॥”
41हे़क्केःल्ले़ ये़सुरे़ नोगप् पिरु, “नसाःन् के़होःप्पा नु ताक्के़भे़ॽबा मनासे, आप्फाल्ले़ थारिक् इङ्गाॽ खिनिॽनु वाॽआआङ् नासि थःत्निङ्बाबे? खे़न् चुक्पे़न् कत्ना फे़त्ते़म्मे़ॽ॥”
42हे़क्क्याङ् खे़न् चुक्पे़न् ये़सुःन् ले़प्माङ् पेर पत्छे़ल्ले़ फे़न्साम्मिल्ले़ फत्तुआङ् पिर्धाप् थाप्सु, कर ये़सुरे़ खे़न् फे़न्साम्मिन् खे़न् चुक्पे़ल्लोलाम्लःन्दे़ पेगे़ॽ फाॽआङ् इङ्जाःङ् पिरु हे़क्क्याङ् खे़न् चुक्पे़न् वेःन्दुआङ् कुम्बा पिरुरो॥
43हे़क्क्याङ् निङ्वाॽफुमाङ्ङिल्ले़ यम्बा कुमुक्साम्मिन् मे़निःसुआङ् के़रे़क् मनाहाॽरे़ खुनिॽ निङ्वाॽ मये़॥ ये़सुरे़ चोगुबा के़रे़क् याःम्बक्को मनाहाॽरे़ खुनिॽ निङ्वाॽ मये़ल्ले़ ये़सुरे़ कुहुॽसाम्बाहाॽ मे़त्तुसि,
44“आबाःन्निन् खे़प्से़म्मे़ॽओ-आल्ल मे़न्छाम्साःन् इङ्मे़ले़क्त्तुॽ हे़क्क्याङ् मनाहाॽरे़ खुनिॽ हुक्को हुक् मे़सुप्तु मे़बिरुॽरो॥”