ᤖᤥᤔᤡ 16:7-22

⁷ᤀᤡᤱᤃᤠ᤹ᤏᤢ ᤛᤠᤰᤐᤠ ᤁᤧᤎᤠ᤺ᤒᤠ ᤕᤜᤢᤍᤡ ᤀᤠᤴᤈᤢᤶ ᤀᤧᤴᤍᤪᤥᤏᤡᤁᤛ ᤏᤢ ᤕᤢᤏᤡᤕᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤂᤧᤱᤜᤠ᤹ᤃ ᤛᤣ᤺ᤰᤕᤢᤰᤔᤡᤒᤠᤜᤠ᤹ᤀᤥ ᤛᤠ᤹ᤖᤡᤰ ᤔᤡᤱᤛᤥ ᤀᤡᤱᤎᤠ᤺ᤱ ᤐᤡᤔᤠ ᤗᤠ᤹ᤖᤢᤛᤡ᤹. ᤜᤧᤰᤁᤩᤠᤱ ᤂᤢᤴᤇᤡ᤹ᤃ ᤀᤡᤱᤃᤠ᤹ᤏᤢ᤺ᤸᤗᤧᤀᤠᤱ ᤋᤃᤡ ᤂᤪᤡᤛ᤻ᤋᤧᤴ ᤏᤛᤠ᤺ᤴ ᤆᤠᤃᤧᤳᤇᤢᤀᤠᤱ ᤘᤕᤧᤳᤇᤡᤖᤥ॥

⁸ᤍᤠᤱᤒᤠᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠ ᤀᤠᤔᤡ᤺ᤶ ᤀᤠᤴᤈᤢᤶ ᤀᤧᤶᤐᤗᤡᤀᤧᤋᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹॥

⁹ᤀᤠᤏᤡᤃᤧᤏᤢ ᤛᤥᤖᤡᤰ ᤂᤪᤡᤛ᤻ᤋᤖᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤐᤠ ᤀᤢᤷᤒᤠᤏᤛ ᤏᤢ ᤀᤠᤔᤡ᤺ᤶ ᤀᤠᤴᤈᤢᤶ ᤀᤡᤛ᤻ᤋᤠᤂᤢᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

¹⁰ᤂᤪᤡᤛ᤻ᤋᤀᤥ ᤆᤥᤃᤢᤒᤠ ᤁᤢᤏᤛᤠ᤺ᤴᤏᤡᤴ ᤔᤧᤛᤠ᤹ᤖᤢᤸᤗᤧ ᤏᤢ᤺ᤒᤠ ᤁᤧᤎᤠ᤺ᤵᤐᤠ ᤀᤵᤐᤧᤸᤗᤧᤛᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹॥ ᤀᤖᤡᤛ᤻ᤋᤥᤒᤢᤗᤛ ᤏᤢ ᤁᤢᤜᤡᤶᤔᤥ ᤁᤧᤘᤠ᤹ᤒᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

¹¹ᤀᤡᤱᤃᤠ᤹ ᤕᤜᤢᤍᤡ ᤀᤠᤴᤈᤢᤶ ᤜᤧᤖᤥᤍᤡᤕᤏᤧᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹ᤀᤥ॥ ᤏᤠᤷᤁᤡᤁᤛᤖᤧ ᤁᤢᤜᤡᤶᤔᤥ ᤁᤧᤘᤠ᤹ᤒᤠ ᤍᤠᤱᤒᤠᤴ ᤏᤛᤠ᤺ᤴ ᤁᤧᤈᤥ᤺ᤰᤐᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

¹²ᤋᤪᤡᤑᤣᤏᤠ ᤏᤢ ᤋᤪᤡᤑᤥᤛᤠ᤺ᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤁᤴ ᤔᤧᤴᤇᤢᤔᤠᤜᤠ᤹ᤖᤧᤃ ᤕᤠᤶᤒᤢᤎᤡᤰᤁᤠᤱ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰ ᤆᤥᤃᤧᤳᤇᤢᤖᤥ॥ ᤛᤠ᤹ᤖᤡᤰ ᤕᤠᤶᤒᤢᤎᤡᤰᤁᤠᤱ ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰ ᤁᤧᤈᤥ᤺ᤰᤔᤠ ᤀᤠᤔᤡ᤺ᤶ ᤀᤠᤴᤈᤢᤶ ᤐᤷᤛᤡᤛ᤻ᤛᤧᤴᤏᤠᤱ ᤀᤠᤛᤣᤘᤠᤖᤥ ᤔᤧᤳᤋᤧᤶᤔᤧ᤹॥

¹³ᤍᤠᤱᤒᤠᤸᤗᤧ ᤁᤢᤕᤠ᤺ᤶᤒᤰ ᤆᤥ᤺ᤰᤛᤧ ᤛᤣᤃᤢᤒᤠ ᤖᤢᤑᤛ ᤏᤢ ᤁᤢᤶᤔᤠ᤺ᤴ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥ ᤁᤢᤶᤔᤠᤖᤧᤃ ᤀᤡᤱᤃᤠ᤹ ᤀᤠᤒᤠᤅᤣ ᤁᤢᤛ᤻ᤛᤠ᤺ ᤁᤢᤀᤡᤛᤡ᤺ᤰ ᤀᤡ᤺ᤳᤋᤠᤱᤅᤠᤱ ᤘᤕᤧᤖᤥ॥

¹⁴ᤀᤠᤛᤡᤴᤁᤪᤡᤋᤛ. ᤑ᤻ᤗᤧᤃᤏ. ᤜᤷᤔᤠᤛ. ᤐᤠᤋᤪᤥᤒᤠᤛ. ᤜᤷᤔᤣᤛ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤁᤧᤘᤠ᤹ᤒᤠ ᤁᤠᤰ ᤏᤛᤠᤏᤡᤒᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

¹⁵ᤑᤡᤗᤥᤗᤥᤃᤛ. ᤕᤢᤗᤡᤕᤠ. ᤏᤧᤖᤡᤀᤛ ᤏᤢ ᤁᤢᤴᤛᤠ᤹ ᤔᤧᤴᤇᤢᤔᤠ᤹. ᤏᤢ ᤀᤥᤗᤡᤶᤐᤠᤛ ᤜᤧᤰᤁᤩᤠᤱ ᤂᤧᤱᤜᤠ᤹ᤏᤢ ᤁᤧᤘᤠ᤹ᤒᤠ ᤁᤠᤰ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤛᤣᤛᤣ ᤁᤢᤔᤏᤠᤜᤠ᤹ ᤀᤠᤛᤣᤘᤠᤖᤥ ᤔᤧᤳᤋᤧᤶᤛᤡᤶᤔᤧ᤹ᤀᤥ॥

¹⁶ᤂᤡᤏᤡ᤹ᤃ ᤛᤣᤛᤣ ᤔᤡ᤺ᤶᤈᤡ᤺ᤸᤗᤧ ᤛᤣᤘᤠ ᤔᤧᤳᤋᤠᤛᤡᤶᤔᤧ᤹ᤀᤥ॥ ᤜᤧᤰᤁᤩᤠᤱ ᤁᤵᤔᤥᤒᤠ ᤁᤠᤰ ᤛᤣᤛᤣᤜᤢᤵᤗᤰᤜᤠ᤹ᤖᤧ ᤛᤣᤘᤠ ᤁᤧᤶᤜᤠᤰᤋᤡ᤹ᤖᤥ॥

¹⁷ᤀᤠᤔᤡ᤺ᤶ ᤑᤢ᤹ᤏᤢᤛᤠ᤹ ᤏᤢ ᤏᤧ᤹ᤏᤢᤛᤠ᤹ᤛᤣ. ᤕᤧᤔᤧᤴᤍᤱ ᤁᤧᤍᤠ᤺ᤵᤐᤠᤜᤠ᤹ ᤔᤡᤰᤆᤥ ᤔᤧᤳᤋᤧᤶᤛᤡᤶᤔᤧ᤹ ᤑᤠ᤹ᤀᤠᤱ ᤐᤣᤗᤡ ᤑᤠᤰᤏᤡᤱᤗᤥ॥ ᤂᤧᤱᤜᤠ᤹ᤖᤧᤃ ᤂᤡᤏᤡ᤹ ᤁᤧᤜᤢ᤹ᤀᤠᤛᤡᤒᤠ ᤛᤧᤰᤂᤠ ᤐᤠ᤺ᤴᤏᤡᤸᤗᤧ ᤁᤢᤍᤰᤗᤧᤱᤘᤠᤀᤥ ᤀᤡᤱᤗᤧᤰᤐᤠ ᤐᤠ᤺ᤴᤏᤡᤴ ᤔᤧᤜᤢ᤹ᤖᤢᤛᤡᤀᤠᤱ ᤔᤏᤠᤜᤠ᤹ ᤂᤢᤏᤡ᤹ ᤏᤛᤠ᤺ᤴᤏᤥ ᤔᤧᤄ᤺ᤛᤢᤛᤡᤖᤥ॥ ᤀᤰᤋᤱᤒᤠ ᤔᤏᤠᤜᤠ᤹ᤏᤢ ᤔᤠ᤺ᤱᤄᤠᤀᤣ ᤘᤕᤧᤶᤔᤧ᤹.

¹⁸ᤌᤣᤀᤠᤱᤓᤧᤸᤗᤧ ᤁᤱᤜᤠ᤹ᤖᤧᤃ ᤍᤠᤱᤒᤠ ᤂᤪᤡᤛ᤻ᤋᤖᤧ ᤁᤢᤛᤣᤘᤠ ᤔᤧᤴᤈᤥᤃᤢᤴ. ᤁᤖ ᤀᤠᤒᤠᤅᤣ ᤂᤢᤏᤡ᤹ ᤛᤠᤵᤐᤥ᤺ᤰᤁᤡᤸᤗᤧ ᤗᤠᤃᤡᤖᤰ ᤛᤣᤘᤠ ᤔᤧᤈᤥᤃᤢ᤹ᤖᤥ॥ ᤂᤧᤱᤜᤠ᤹ᤖᤧ ᤔᤏᤠ ᤁᤧᤈᤶᤒᤠ ᤏᤢ ᤔᤢᤷᤗᤧ᤺ᤶᤒᤠ ᤐᤠ᤺ᤴᤜᤠ᤹ᤖᤧ ᤁᤢᤍᤥ᤺ᤵᤔᤠ ᤔᤏᤠᤜᤠ᤹ ᤀᤡᤱᤔᤧᤗᤧᤰᤋᤢᤛᤡ᤹ᤖᤥ॥

¹⁹ᤁᤖ ᤂᤡᤏᤡ᤹ ᤀᤡᤱᤈᤠ᤺ᤱᤃᤧᤶᤒᤠ ᤁᤧᤈᤥᤃᤡᤒᤠ ᤐᤠ᤺ᤴᤏᤡᤱᤃ ᤁᤧᤖᤧᤰ ᤐᤡᤛᤠᤱ ᤔᤏᤠᤜᤠ᤹ᤖᤧ ᤔᤧᤄᤧᤵᤛᤢᤀᤠᤱ ᤔᤧᤘᤠ᤹. ᤜᤧᤰᤁᤣ᤺ᤸᤗᤧ ᤂᤡᤏᤡ᤹ ᤁᤧᤈᤥᤃᤢᤶᤔᤡᤸᤗᤧ ᤀᤡᤱᤃᤠ᤹ᤃ ᤛᤠ᤹ᤖᤡᤰ ᤛ᤺ᤳᤋᤠᤖᤥ॥ ᤂᤡᤏᤡ᤹ᤃ ᤏᤢ᤺ᤒᤠ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤛᤡᤰᤁᤢᤶᤛᤠᤒᤠ ᤐᤥ᤺ᤰᤂᤧᤶᤔᤧ᤹ ᤜᤧᤰᤁᤩᤠᤱ ᤑᤧᤴ ᤐᤠ᤺ᤴᤏᤡᤸᤗᤧ ᤁᤢᤕᤠ᤺ᤶᤒᤣᤀᤥ ᤑᤥᤋᤩᤠ ᤔᤧ᤺ᤴᤏᤣᤒᤠ ᤐᤥ᤺ᤰᤂᤧᤶᤔᤧ᤹ ᤁᤧᤗ᤹ᤒᤠ ᤏᤡᤱᤘᤠ᤹ ᤁᤳᤋᤢᤱᤗᤥ॥

²⁰ᤛᤏᤠᤖᤢᤱ ᤕᤠᤵᤔᤡ ᤁᤧᤒᤡᤒᤠ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤜᤠᤖᤠᤀᤣ ᤔᤠᤑᤧᤴᤛᤠᤶᤔᤡᤴ ᤂᤡᤏᤡ᤹ ᤗᤠᤱᤓᤥ ᤛᤡᤃᤠᤱ ᤌᤠ᤺ᤛᤢᤀᤠᤱ ᤋᤥ᤹ᤖᤢ᤹ᤖᤥ॥ ᤀᤠᤸᤗ ᤀᤠᤏᤡ᤹ ᤍᤠᤱᤒᤠ ᤕᤧᤛᤢ ᤂᤪᤡᤛ᤻ᤋᤖᤧ ᤁᤢᤗᤢᤱᤃᤢᤶᤔᤡᤴ ᤂᤡᤏᤡ᤹ᤏᤢ ᤘᤠ᤹ᤖ॥

²¹ᤀᤡᤱᤃᤠ᤹ᤏᤢ ᤛᤥᤖᤡᤰ ᤔᤠᤱᤛᤣᤘᤠ ᤁᤧᤈᤥ᤺ᤰᤐᤠ ᤋᤡᤔᤥᤌᤡ᤺ᤸᤗᤧ ᤜᤧᤰᤁᤩᤠᤱ ᤕᤜᤢᤍᤡ ᤀᤠᤴᤈᤢᤶ ᤗᤢᤛᤡᤕᤛ. ᤕᤧᤛᤥᤏ ᤏᤢ ᤛᤥᤛᤡᤐᤠᤋᤪᤥᤛᤖᤧᤀᤠᤱ ᤛᤣᤘᤠ ᤁᤧᤶᤜᤠᤰᤋᤡᤀᤠᤱ ᤘᤠ᤹ᤖᤥ॥

²²ᤐᤠᤘᤗᤖᤧ ᤁᤢᤗᤠᤃᤡ ᤁᤴ ᤛᤰᤀᤡᤱᤄᤱᤅᤡᤴ ᤁᤧᤛᤠᤵᤐᤠ ᤀᤡᤱᤃᤠ᤹ ᤋᤷᤋᤡᤕᤛᤖᤧᤀᤠᤱ ᤍᤠᤱᤒᤠᤸᤗᤧ ᤁᤢᤔᤡᤱᤅᤥ ᤛᤣᤘᤠ ᤜᤠᤰᤏᤡᤱᤗᤥ॥