Roma 16:7-22

⁷Indani niyo heman si Andronico aw si Junias te eg-aneng-aneng a kandan. Sikandan se doma ko Judiyo kineleboso doma kanak. Ontò dan nedengeg sogounun i Cristo, aw migpesakop dan diyà ki Cristo te wedà a pa pegpesakop.

⁸Indani niyo se sigalak ko diyà te Pengolo tadon si Ampliato te eg-aneng-aneng a kandin.

⁹Iling heman kenyan se iindan niyo diyà ki Urbano, so egtelaban sikandin kenami te pegtoladà day tepad ki Cristo, aw si Estakis nedekelan ko heman te pedowan.

¹⁰Indani niyo si Apeles te eg-aneng-aneng a kandin. Egkeseligan sikandin te pegtaking din ki Cristo. Indani niyo heman se pamilya i Aristobulo te eg-aneng-aneng a kandan.

¹¹Indani niyo se doma ko Judiyo si Herodion te eg-aneng-aneng a kandin. Eg-aneng-aneng a heman te menge otaw diyà te pamilya i Narciso timaking te Pengolo tadon.

¹²Eg-aneng-aneng a ki Trifena aw si Trifosa. Measeb dan egtolò te Pengolo tadon. Eg-aneng-aneng a heman ki Persida. Dakel se nebatog din te pegtolò din te Pengolo tadon.

¹³Eg-aneng-aneng a heman ki Rufo. Nedengeg sikandin egtaking te Pengolo tadon, aw inay din egkeido kanak iling te ontò inay ko.

¹⁴Eg-aneng-aneng a heman ki Asincrito, si Flegonte, si Hermes, si Patrobas, si Hermas, aw menge doma dan egpemenal.

¹⁵Eg-aneng-aneng a heman ki Filologo, si Julia, si Nereo aw etebay din, aw si Olimpas aw kedita te doma dan menge sakop te Timanem.

¹⁶Pegpeliyagay kaw se kedita niyo egpemenal ki Cristo, so yan se pengilala te egpedekelay kidon te pedowan. Ibeg te kedita te otaw egsimba dini, megpetaga-taga dan kenyo te eg-aneng-aneng dan kenyo.

¹⁷Menge kedowa ko, peg-ahà kaw te menge otaw egbaet te pegsebad te pedowan niyo aw egbaet te pegsalig niyo diyà ki Cristo, so kenà iling kenyan se kebenalan intoladà day kenyo. Ikà niyo egtaking kandan.

¹⁸Kenà dan egtolò te Pengolo tadon si Cristo, meneng egtaking dan te ibeg te kandan pedowan. Pineokit te mèpiya kagi dan, eg-akal dan te menge otaw wedà ketaga-taga te kebenalan.

¹⁹Nedengeg kaw den so egtolò kaw te kebenalan pig-ilingan niyo, aw ontò a neluba kenyan. Ibeg ko ontò kaw megkebiyasa meg-inang te mèpiya, aw wedad toig niyo meg-inang te medaet.

²⁰Timanem se egpemegay te kelinaw te pedowan, aw sikandin se mekedaeg ki Satanas te eked kenamay amon wedad mebatog din inangen diyà kenyo. Ibeg ko, tebangan kaw te Pengolo tadon si Jesu Cristo.

²¹Si Timoteo doma ko egtoladà, ibeg din metaga-taga kaw te eg-aneng-aneng sikandin kenyo. Iling heman kenyan se ibeg te menge doma ko Judiyo, si Lucio, aw si Jason, aw si Sosipatro.

²²Siaken heman, si Tercio, impesolat i Pablo te solat seini, eg-aneng-aneng a heman kenyo tandà te pegpesakop tadon diyà te Pengolo tadon.