ᤕᤢᤜᤢᤴᤏᤠ 5:2-14

²ᤀᤠᤸᤗ ᤕᤖᤢᤛᤗᤧᤶᤔᤥ ᤔᤧᤸᤗᤢᤰ ᤗᤠᤶᤎᤣ᤺ᤵᤐᤠᤸᤗᤧ ᤁᤢᤒᤣᤛᤠᤱ ᤅᤠᤛᤡ ᤛᤡᤳᤗᤠᤱᤜᤠ᤹ᤖᤧ ᤁᤒᤪᤡᤱ ᤁᤒᤢᤒᤠ ᤜᤡᤒᤪᤢ ᤐᤠ᤺ᤴᤏᤥ ᤒᤧᤌᤛ᤻ᤍᤠ ᤔᤧᤵᤔᤏᤠᤒᤠ ᤘᤠᤒᤠᤰᤌᤡᤰ ᤏᤧ᤹᤺॥

³ᤂᤧᤵᤔᤥ ᤕᤖᤡᤰ ᤁᤧᤍᤢᤰᤐᤠ ᤔᤏᤠᤜᤠ᤹–ᤔᤡᤰᤑ᤺ᤶᤒᤠ. ᤗᤠᤱᤛᤰᤐᤠ ᤏᤢ ᤗᤱᤗᤧ᤺ᤱᤘᤠ ᤔᤏᤠᤜᤠ᤹ ᤔᤧᤏᤧᤛ᤻ᤛᤧᤖᤥ॥ ((ᤂᤧᤱᤜᤠ᤹ᤖᤧ ᤇᤡᤶᤗᤡᤱ ᤇᤡᤶᤗᤡᤱ ᤗ᤹ᤖᤡᤰ ᤁᤧᤔᤢᤶᤒᤠ ᤆᤫᤠ᤺ᤳᤋᤡᤴ ᤔᤧᤜᤠᤱᤄᤢᤀᤠᤱ ᤔᤧᤏᤧᤛ᤻ᤛᤧᤖᤥ॥

⁴ᤌᤣᤀᤠᤱᤓᤧᤸᤗᤧ ᤍᤠᤱᤒᤠᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤁᤢᤓᤠ ᤕᤧᤴᤏᤥ ᤋᤠᤀᤠᤱ ᤆᤫᤠ᤺ᤳᤋᤡᤴ ᤔᤢᤴᤍᤢᤸᤗᤧ ᤁᤧᤖᤧᤰᤏᤢ᤺ᤸᤗᤧ ᤋᤃᤡ ᤆᤫᤠ᤺ᤳᤋᤥ ᤁᤧᤗᤠ᤺ᤵᤐᤧᤴ ᤀᤠᤰᤋᤱᤒᤠ ᤋᤢᤰᤔᤠ ᤕ᤹ᤔᤠ ᤁᤳᤋᤢᤛᤠᤱ ᤘᤣ᤺ᤳᤋᤧᤖᤥ॥))

⁵ᤂᤧᤵᤔᤥ ᤁᤧᤏᤧᤒᤠ ᤌᤡᤰ ᤁᤧᤍᤢᤰᤐᤠ ᤔᤏᤠ᤺ᤱᤃ ᤛᤢᤶᤕᤧᤳ (᥉᥎) ᤋᤱᤒᤣᤀᤠᤱᤎᤥ ᤏᤧᤛ᤻ᤛᤧᤖᤥ॥

⁶ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤂᤧᤵᤔᤥ ᤏᤧᤛ᤻ᤛᤧᤒᤠ ᤏᤡ᤺ᤛᤢ ᤜᤧᤰᤁᤩᤠᤱ ᤕᤖᤡᤰ ᤋᤱᤒᤣᤀᤠᤱᤎᤥ ᤋᤢᤰᤁᤠᤱ ᤏᤧᤖᤥ ᤁᤧᤗ᤹ᤒᤠ ᤏᤡᤱᤘᤠ᤹ ᤂᤥ᤺ᤛᤢᤀᤠᤱ ᤛᤣ᤺ᤴᤍᤥᤛᤢ. “ᤂᤧᤏᤧ᤹ ᤘᤣ᤺ᤵᤔᤠ ᤁᤧᤛᤡᤖᤠ᤹ ᤌᤠᤱᤒᤡ᥅”

⁷ᤂᤧᤴ ᤁᤧᤍᤢᤰᤐᤠᤸᤗᤧ ᤏᤥᤃᤵ ᤐᤡᤖᤢ. “ᤀᤥᤖᤥ. ᤀᤠᤍᤠᤱᤒᤣ. ᤁᤖ ᤂᤧᤴ ᤘᤠᤒᤠᤰᤁᤥᤒᤠ ᤆᤫᤠ᤺ᤳᤋᤡᤴ ᤇᤡᤶᤗᤡᤱ ᤇᤡᤶᤗᤡᤱ ᤗ᤹ᤖᤡᤰ ᤔᤢᤴᤏᤡᤸᤗᤧ ᤂᤧᤵᤔᤥ ᤕᤠᤵᤔᤡ ᤁᤧᤃᤣ᤺ᤵᤐᤠ ᤜᤠ᤺ᤳᤋᤠᤱ ᤜᤥ᤺ᤵᤗᤥ॥ ᤀᤡᤱᤃᤠ᤹ ᤂᤧᤵᤔᤥ ᤗᤠ᤺ᤵᤔᤠ ᤋᤶᤛᤡᤴ ᤆᤥᤃᤢᤱᤗ ᤐᤳᤋᤠᤸᤗᤧᤛᤠ ᤘᤣ᤹ᤜᤠ᤹ ᤀᤡᤱᤃᤠ᤹ᤏᤢ᤺ᤸᤗᤧ ᤋᤃᤡ ᤔᤧᤗᤠ᤺ᤳ ᤔᤧᤒᤣ᤺ᤰᤗᤥ॥”

⁸ᤕᤧᤛᤢᤖᤧ ᤂᤧᤴ ᤔᤧᤳᤋᤢ. “ᤐᤥᤃᤧ᤹᥄ ᤜᤧᤰᤁᤩᤠᤱ ᤁᤧᤏᤧᤳᤏᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤌᤠᤛᤡᤱᤅᤧ᤹ᤀᤥ॥”

⁹ᤂᤡᤔᤥ ᤂᤧᤴ ᤔᤏᤠ᤺ᤴ ᤘᤣ᤺ᤳᤋᤧᤀᤠᤱ ᤁᤢᤏᤧᤳᤏᤠ᤺ᤴ ᤕᤠᤱᤛᤡᤱᤅᤠᤱ ᤌᤠᤛᤡᤱᤗᤥ॥ ᤀᤠᤸᤗ ᤁᤴ ᤏᤡᤱᤘᤠ᤹ ᤁᤧᤔᤠᤒᤠ ᤐᤠ᤺ᤴᤏᤡᤱᤃ ᤏᤠ᤺ᤶᤛᤡᤱ ᤕᤧᤴᤏᤥ ᤐᤥ᤺ᤰᤂᤧᤀᤠᤱ ᤘᤕᤧᤖᤥ॥

¹⁰ᤂᤧᤸᤗᤧ ᤆᤥᤃᤢᤸᤗᤧ ᤕᤜᤢᤍᤡᤜᤠ᤹ᤖᤧ ᤂᤧᤴ ᤁᤧᤘᤣ᤺ᤵᤐᤠ ᤔᤏᤠ᤺ᤴ “ᤂᤧᤏᤧ᤹ ᤏᤠ᤺ᤶᤛᤡᤱ ᤕᤧᤴᤏᤥ ᤁᤧᤏᤧᤳᤏᤠ᤺ᤴ ᤐᤱᤔᤠ ᤛᤠᤶᤕᤥᤌᤡᤶᤔᤡᤸᤗᤧ ᤁᤧᤶᤒᤡᤏᤧᤴᤗᤥ” ᤔᤧᤔᤧᤳᤋᤢᤖ ᤔᤧᤀᤳᤋᤢ॥

¹¹ᤁᤖ ᤂᤧᤸᤗᤧ ᤏᤥᤃᤵ ᤐᤡᤖᤢᤛᤡ. “ᤀᤡᤱᤃᤠ᤹ ᤕᤠᤵᤔᤡ ᤁᤧᤘᤣ᤺ᤶᤒᤠ ᤔᤏᤠ᤺ᤸᤗᤧᤀᤣ ‘ᤁᤧᤏᤧᤳᤏᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤌᤠᤛᤡᤱᤅᤧ᤹’ ᤔᤧᤳᤋᤠᤱᤒᤠᤖᤥ॥”

¹²ᤂᤧᤸᤗᤧ ᤆᤥᤃᤢᤸᤗᤧ ᤂᤧᤱᤜᤠ᤹ᤖᤧ ᤀᤠᤳᤋᤡᤴ ᤔᤏᤠ᤺ᤸᤗᤧ “ᤂᤧᤏᤧ᤹ ᤁᤧᤏᤧᤳᤏᤠ᤺ᤴ ᤕᤠᤱᤛᤡᤱᤅᤧ᤹ᤀᤠᤱ ᤌᤠᤛᤡᤱᤅᤧ᤹” ᤁᤧᤔᤧᤳᤋᤧ ᤗ᤹ᤖᤡᤰ ᤂᤧᤴ ᤛᤣ᤺ᤴᤔᤧᤍᤥᤛᤢ॥

¹³ᤂᤧᤴ ᤔᤏᤠ᤺ᤸᤗᤧ ᤂᤢᤏᤧ᤹ ᤁᤧᤘᤣ᤺ᤶᤒᤠᤴ ᤁᤢᤛᤡᤱ ᤔᤧᤏᤡ᤺ᤳᤋᤢᤴᤗᤥ. ᤌᤣᤀᤠᤱᤓᤧᤸᤗᤧ ᤂᤧᤵᤔᤥᤒᤠ ᤔᤏᤠᤗᤢᤶᤔᤥ ᤕᤧᤛᤢ᤺ᤴ ᤀᤡ᤺ᤶᤛᤡᤱ ᤐᤣᤀᤠᤱ ᤜᤥ᤺ᤵᤋᤧᤖᤥ॥

¹⁴ᤕᤠᤱᤛᤡ ᤕᤧᤛᤢᤖᤧ ᤂᤧᤴ ᤔᤏᤠ᤺ᤴ ᤔᤠᤱᤜᤡᤶᤔᤥ ᤋᤢᤔᤢᤀᤠᤱ ᤔᤧᤳᤋᤢ. “ᤀᤥᤔᤧᤳᤋᤧ᤹. ᤂᤧᤏᤧ᤹ ᤁᤧᤏᤢᤖᤧᤀᤠᤱ ᤁᤧᤘᤠ᤹ᤖᤥ॥ ᤀᤠᤸᤗᤀᤠᤱᤎᤥ ᤗᤠᤕᤥ ᤔᤧᤈᤥᤃᤧᤴᤏᤧ᤹ᤀᤥ. ᤔᤧ᤺ᤴᤏᤧ ᤑᤠ᤹ᤃᤪ ᤁᤴᤏᤢ᤺ᤸᤗᤧᤀᤠᤱ ᤕᤖᤡᤰ ᤋᤠᤵᤑᤧ᤺ᤶᤒᤠ ᤐᤠ᤺ᤴᤜᤠ᤹ ᤂᤧᤏᤧ᤹ ᤁᤧᤍᤢᤔᤢ᤹ᤖᤥ॥”