JUAN 5:2-14

²Ro guiedz Jerusalén, gax zaatne quia puert ne rded mëcwxiil, ga niaa tib pil nis rnee zho Betesd. Igo ro pil co niaa tib nsaap, rap nsaap co gaay arcw.

³Lo nsaap co, ga ndxie nzian meṉ rzacnë, no zho roḻd lo, no zho në ni, no zho ib gacd griaḻ grëse zho laa zho ndxie ga quiambëz zho gni lo nis ne no leṉ pil co,

⁴sac nac diidz poc poc riet tib xanjl Dios riesini lo nis co, dzigo zha ne znuse sëëb lo nis co, teḻ pe guieḻguiidztaa rzac zho, riac zho.

⁵Ga nix tib mgui, gocle gaḻptsiipxon iz rzacnë me.

⁶Laa zeeṉe goṉ Jesús me, ni bin Jesús scataale nroob dze rzacnë me, rëbchaa Jesús lo me: ―¿Pe racladz luu guiaac luu?

⁷―Racladz naa ―rëb me―, per guieṉd cho csëëb naa leṉ pil qui zeeṉe laa lo nis rni. Zeeṉe racladz naa sëëb naa, zhaale stib zha ne glo rzëëb.

⁸Dzigo rëbchaa Jesús lo me: ―¡Nasca zeeṉa guche i! ¡Bzoli, bi yag ne bzhoob luu i, zeeṉa bzë!

⁹Zigne sca rëb Jesús, laa meṉ co biac. Horcogazh blis me yag co, nzëni me laa me briee ga. Ni ne dze co nac tib dze nda lo zha Israel,

¹⁰zeeṉe goṉ zho ney me yag ne bzhoob me, rëbchaa zho lo me: ―¡Pe rieṉd luu nda nadze! ¡Lëda i goṉ squi yquianlaṉ luu ncuaaṉ qui dze rii!

¹¹Pquiab me rëb me: ―Meṉ ne beeṉguiac naa, mezhal në lo naa, güey naaw.

¹²―¿Cho meṉ sca në lo luu? ―rëb zho.

¹³Niicle me rieṉdaque dieṉ chow, sac ndaldox miech ne ndxie ga; hor co laa Jesús bzëëble lad grë miech co.

¹⁴Haxta leṉ yadooraa bdzieel Jesús me, dzigo rëbchaa Jesús lo me: ―Nana goṉ ne squi laa luu biacle, bieṉ guṉctaldraa luu xtoḻ luu. Sac teḻne gond luu diidz, nend dzigole glaan luu tib guieḻguidz ne mazdraa ntseeb.