ᤕᤢᤜᤢᤴᤏᤠ 20:20-27

²⁰ᤜᤧᤰᤁᤣ ᤐᤠ᤺ᤳᤋᤢ ᤛᤢᤖᤢᤀᤠᤱ ᤂᤢᤏᤧ᤹ ᤁᤢᤜᤢᤰᤜᤠ᤹ ᤏᤢ ᤁᤢᤗᤧᤶᤓᤣ᤺ᤵᤔᤠᤴ ᤀᤥᤛᤣ᤺ᤴᤎᤠᤰᤋᤢᤛᤡ॥ ᤍᤠᤱᤒᤠᤴ ᤔᤧᤏᤡ᤺ᤛᤢᤒᤠᤸᤗᤧ ᤜᤢ᤹ᤛᤠᤶᤒᤠᤜᤠ᤹ ᤛᤠ᤹ᤖᤡᤰ ᤔᤧᤛ᤺ᤳᤋᤧᤖᤥ॥

²¹ᤕᤧᤛᤢᤖᤧ ᤂᤧᤱᤜᤠ᤹ ᤕᤠᤶᤔᤥ ᤔᤧᤳᤋᤢᤛᤡ. “ᤛᤏᤠᤖᤢᤱ ᤁᤧᤄᤥ᤺ᤛᤢᤶᤗᤖᤥ᥄ ᤐᤠᤏᤢᤍᤡᤱ ᤐᤠ᤺ᤸᤗᤧ ᤀᤡᤱᤃᤠ᤹ ᤐᤠᤱᤄᤠᤱᤒᤠ ᤁᤢᤀᤡᤛᤡ᤺ᤰ ᤂᤡᤏᤡ᤹ᤀᤠᤱ ᤀᤡᤱᤃᤠ᤹ ᤐᤠᤱᤏᤡᤱᤗ ᤐᤳᤋᤠᤖᤥ॥”

²²ᤜᤧᤰᤁᤩᤠᤱ ᤕᤧᤛᤢᤖᤧ ᤂᤧᤱᤜᤠ᤹ᤀᤥ ᤛᤠᤱᤃᤢᤃᤧᤴ ᤛᤰᤔᤠ᤺ᤸᤗᤧ ᤔᤢ᤺ᤳᤋᤢᤛᤡᤖ ᤀᤰᤂᤣ ᤔᤧᤳᤋᤢᤛᤡ. “ᤛᤣᤛᤣᤔᤠᤱᤅᤡᤴ ᤋᤠ᤺ᤰᤋᤧᤶᤔᤧ᤹ᤀᤥ॥

²³ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤁᤧᤒᤡᤖᤢᤶᤛᤡᤶᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤐᤥ᤺ᤱᤗᤥ. ᤁᤖ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤁᤧᤶᤒᤡᤖᤢᤶᤛᤡᤶᤔᤡᤴᤏᤧ ᤑᤠ᤹ᤃᤪ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤕᤥ᤺ᤴ ᤗᤧᤵᤔᤡ ᤔᤧᤒᤥ᤺ᤱᤏᤧᤸᤗᤥ॥”

²⁴ᤀᤠᤸᤗ ᤕᤧᤛᤢ᤺ᤴ ᤂᤢᤏᤡ᤹ ᤗᤢᤶᤔᤥ ᤋᤩᤧ᤺ᤸᤗᤧ ᤌᤡᤰ-ᤏᤧᤳ ᤜᤢ᤹ᤛᤠᤶᤒᤠᤜᤠ᤹ᤀᤥ ᤌᤡᤰ ᤍᤡᤍᤡᤔᤛ ᤔᤧᤵᤔᤏᤠᤒᤠ ᤌᤥᤔᤠ᤺ᤴ ᤂᤧᤵᤔᤥ ᤜᤥ᤺ᤵᤋᤧᤖᤥ॥

²⁵ᤜᤧᤰᤁᤣ᤺ᤸᤗᤧ ᤘᤣ᤹ ᤜᤢ᤹ᤛᤠᤶᤒᤠᤜᤠ᤹ᤖᤧ ᤌᤥᤔᤠ᤺ᤴ ᤀᤰᤂᤣ ᤔᤧᤔᤧᤳᤋᤢ. “ᤀᤠᤏᤡᤃᤧᤃ ᤍᤠᤱᤒᤠᤴ ᤏᤡ᤺ᤛᤢᤶᤒᤧᤖᤥ᥄” ᤁᤖ ᤌᤥᤔᤠ᤺ᤸᤗᤧ ᤂᤧᤱᤜᤠ᤹ ᤔᤧᤳᤋᤢᤛᤡ. “ᤀᤡᤱᤃᤠ᤹ ᤁᤢᤜᤢᤰᤁᤥ ᤔᤧᤎᤧᤵᤋᤢᤒᤠ ᤑᤧᤴᤋᤡᤱᤅᤡᤸᤗᤧ ᤁᤢᤕᤥ᤺ᤰᤁᤡᤴ ᤔᤧᤴᤏᤡᤀᤣ ᤏᤢ ᤂᤧᤵᤔᤥ ᤀᤠᤜᤢᤰᤆᤥ᤺ᤴ ᤔᤧᤱᤃᤣ᤺ᤳᤋᤣ ᤜᤧᤰᤁᤩᤠᤱ ᤁᤢᤗᤧᤶᤓᤣ᤺ᤵᤔᤥ ᤗᤠ᤺ᤰᤁᤡᤸᤗᤧ ᤔᤧᤎᤢᤒᤢᤒᤠᤀᤥ ᤀᤠᤜᤢᤰᤁᤡᤴ ᤔᤧᤱᤃᤣ᤺ᤳᤋᤣᤃ ᤏᤛᤠ᤺ᤴ ᤔᤧᤈᤥ᤺ᤰᤁᤠᤴᤗᤥ॥”

²⁶ᤕᤧᤳᤇᤡ ᤕᤧᤴ ᤀᤣᤃᤠᤱ ᤜᤢ᤹ᤛᤠᤶᤒᤠᤜᤠ᤹ ᤕᤠᤶᤔᤥ ᤜᤡᤶ ᤛᤡᤃᤠᤱ ᤔᤧᤈᤢᤵᤛᤧᤀᤠᤱ ᤔᤧᤕᤢᤅᤧ॥ ᤁᤴ ᤕᤧᤶᤔᤥ ᤌᤥᤔᤠ᤺ᤴᤏᤠᤱ ᤘᤕᤧ. ᤗᤠᤶᤎᤣ᤺ᤵᤐᤧᤴ ᤛᤡᤃᤠᤱᤗᤠᤶ ᤔᤧᤛᤢᤒᤢᤀᤠᤱ ᤐᤳᤇᤧᤛᤠᤱ ᤂᤢᤏᤡ᤹ ᤗᤢᤶᤔᤥᤀᤣ ᤕᤧᤛᤢ᤺ᤴ ᤌᤠ᤺ᤶᤛᤡᤱᤗ. “ᤛᤏᤠᤖᤢᤱ ᤁᤧᤄᤥ᤺ᤛᤢᤶᤗᤖᤥ” ᤔᤧᤳᤋᤢᤛᤡ॥

²⁷ᤜᤧᤰᤁᤩᤠᤱ ᤌᤥᤔᤠ᤺ᤴ ᤔᤧᤳᤋᤢ. “ᤌᤥᤔᤠᤀᤣ. ᤁᤧᤜᤢᤰᤆᤥ᤺ᤴ ᤁ᤹ᤕᤥ ᤕᤠᤰᤋᤧ᤹. ᤀᤠᤜᤢᤰᤜᤠ᤹ ᤀᤥᤔᤧᤳᤋᤧ᤹॥ ᤂᤧᤏᤧ᤹ ᤁᤧᤜᤢᤰᤁᤡᤴ ᤀᤠᤗᤧᤶᤓᤣ᤺ᤵᤔᤥ ᤗᤠ᤺ᤰᤁᤡᤸᤗᤧ ᤔᤧᤎᤢᤒᤢᤒᤠ ᤁᤢᤕᤥ᤺ᤰᤁᤥ ᤁᤣ᤺ᤳᤋᤧ᤹ᤀᤥ॥ ᤂᤧᤏᤧ᤹ ᤆᤵᤆᤡ ᤔᤧᤈᤥᤃᤧᤴᤏᤧ᤹. ᤁᤖ ᤏᤛᤠ᤺ᤴ ᤆᤥᤃᤧ᤹ᤀᤥ॥”