ፒሊጲሲዮሴ 4

1

2

3

4

¹ታ ኢንቴና ዶሲዛይቶ! ታ ኢንቴና ላሞቲዛይቶ! ታስ ኡፋይሲኔ ኦሶ ዛዉዴ ጊዲዳ ታ ኢሻቶ! ጎዳን ሚኒ ኤቂቴ።

²ኢንቴ ቆፋይ ጎዳን ኢሲኖ ጊዳና ማላ ኤዎዲያኔ ሲንፄኬይ ባ ጋርሳን ሲቄታና ማላ ታ ኢስታ ዎሳይስ።

³ኤሮ! ኔኖ! ታናራ ኢሲፌ ኣማኔቲዳ ኦሳንቻዞ፥ ሚሺራቾ ቃላ ዮቶስ ታናራኔ ቃላሜንፆሳራ ቃሴካ ኢስታ ሱንꬃይ ዴዖ ማፃፌን ፃፌቲዳ ሃንኮ ታናራ ኦሶ ላጌታራ ኢሲፌ ዋዪዳይታ ሄ ማጫሳታ ኔ ማዳና ማላ ታ ኔና ዎሳይስ።

⁴ኣይ ዎዴካ ጎዳን ኡፋዬቲቴ። ቃሴካ ታ ኢንቴና ኡፋዬቲቴ ጋይስ።

⁵ኢንቴ ኪያቴꬂ ኣሳ ኡባ ኣቻን ኤሬቶ። ጎዳይ ያና ማቲዴስ።

⁶ሃኒዛ ዮዖን ኡባን ጋላታን፥ ዎሳኒኔ ጋናቴꬃን ፆሳ ሲንꬂ ሺቂቴ ኣቲን ኣይ ሚሻንካ ሂርጎፍቴ።

⁷ኣሳ ቆፋፔ ቦላራ ዲዛ ፆሳ ሳሮቴꬂ ኢንቴ ዎዝናኔ ኢንቴ ቆፋ ዉርሲ ዬሱስ ኪርስቶሳን ናጌስ።

⁸ዉርሴꬃ ቦላ ታ ኢሻቶ! ቱሙ ጊዲዳ ዮዖ ዉርሲ፥ ቦንቾ ጊዲዳ ዮዖ ዉርሲ፥ ኣዳ ጊዲዳ ዮዖ ዉርሲ፥ ጌሺ ጊዲዳ ዮዖ ዉርሲ፥ ዶሴቲዳ ሚሺ ዉርሲ፥ ሎዖ ጊዲዳ ዮዖ ዉርሲ፥ ሎዔቴꬂ ጊዲንካ ጋላታካ ሃይታንታ ሚሳቲዛዝ ዉርሲ ቆፒቴ።

⁹ኢንቴ ታፔ ታማሪዳይሳ ዎይኮ ኢንቴ ታፔ ኤኪዳይሳኔ ሲዪዳይሳ ዎይኮ ቤይዳይሳ ኣይ ጊዲኮካ ዉርሲ ኦꬂቴ። ጎዳይ ኢንቴናራ ጊዳና።

¹⁰ዳሮ ዎዴፔ ጉዬ ኦራꬃ ቆፋራ ኢንቴ ታ ጊሽ ቆፎ ኦይኪዴታ። ሄሲካ ጎዳ ባጋራ ታና ኬሂ ኡፋይሴስ። ቱሙካ ኢንቴ ታስ ቆፎ ኣጊቤይኬታሺን ኢንቴ ቆፒዳ ማላ ኦꬃናስ ኢንቴስ ሃኖ ኢፂዴስ።

¹¹ታኒ ሄሳ ጊዛይ ታና ሜቲዳ ጊሽ ጊዴና። ጋሶይካ ታ ኣይ ሃኒኮካ “ዲዛይሲ ታስ ጊዳና” ጉስ ታማራዲስ።

¹²ፓጬካ ታ ኤራይስ፤ ዴማዳካ ኤራይስ፤ ታ ጋፋዳካ፥ ካላዳካ ኤራይስ፤ ዲንካ ꬋዪንካ ኤራይስ፤ ኣይ ጊዲኮካ ታስ ዲዛይ ታስ ጊዳና ጉሳ ፁራ ታ ሎዔꬃ ኤራይስ።

¹³ታስ ዎልቃ ኢሚዛ ኪርስቶሳን ታኒ ኡባ ሚሼ ኦꬃናስ ዳንዳያይስ።

¹⁴ጊዲኮካ ኢንቴ ታና ታ ዋዬን ማዲዳ ጊሽ ሎዖ ኦꬂዴታ።

¹⁵ኢንቴ ፒሊጲሲዮሴ ኣሳቲ ሄሳፌ ቦላራ ኢንቴ ኤሪዛይ ኮይሮ ሚሺራቾ ቃላ ኢንቴ ኤኪዳ ዎዴ ታኒ ማቂዶኒያፔ ዴንዳሼ ኢንቴፌ ኣቲን ጌዴ ኢሚዲካ ሃ ኤኪዲካ ማዴቲዲኔ ማዲዲ ጊዛ ዎሳ ኬꬂ ታስ ዴና።

¹⁶ሃራይ ኣቶ ሺን ታ ካሴ ታሶሎንቄን ዲዛ ዎዴካ ታኒ ሜቶቲን ኢንቴ ዛሪ ዛሪ ታስ ማዶ ዬዲዴታ።

¹⁷ታ ሄሳ ጊዛይ ኢሚዳ ጊሽ ኢንቴስ ኣንጆይ ዳራና ማላ ጋዳ ኣቲን ታ ኢንቴፌ ማዶ ኤካናስ ኣሞታዳ ጊዴና።

¹⁸ታስ ኮሺዛይሳኔ ታና ኮሺዛይሳፌካ ቦላራ ኤካዲስ። ኢንቴ ታስ ዬዲዳ ማዶ ሚሻ ኣፍሮዲፆ ኩሼፔ ኤኪን ታ ፓጬይ ኩሚዴስ። ሃይሲ ዳሮፔ ፆሳ ኣቻን ኤኬቲዳ ዳሮ ሎዖ ሳዊዛ ያርሾ ማላ።

¹⁹ፆሲ ባ ዱሬቴꬃ ጊና ኢንቴና ኮሺዛይሳ ጎዳ ዬሱስ ኪርስቶሳ ባጋራ ኢንቴስ ኩንꬃና።

²⁰ኑ ኣዋሲኔ ኑ ፆሳስ ሜርናፔ ሜርናስ ቦንቾይ ጊዶ። ኣሚን።

²¹ኣማኒዛ ኣሳ ኡባ ዬሱስ ኪርስቶሳ ሱንꬃን ሳሮ ጊቴ። ታናራ ዲዛ ኢሻቲ ዉሪካ ኢንቴና ሳሮ ጌቴስ።

²²ኣማኒዛይቲ ዉሪ ሃራፔካ ቄሳሬሶ ኣሳፔ ኣማኒዛይቲ ዉሪካ ኢንቴና ሳሮ ጌቴስ።

²³ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ጊዶ። ኣሚን።