ፒሊጲሲዮሴ 3

1

2

3

4

¹ታ ኢሻቶ! ሃይሳፌ ሃራ ታ ኢንቴና ጊዛይ ጎዳን ኡፋዬቲቴ። ሃዒካ ዛራዳ ኢዞ ታ ኢንቴስ ፃፊኮ ታና ሳሌꬄና። ኢንቴናካ ጎዓና።

²ሄይታ ካና ማላ ሁስካቲዛይታፔ፥ ኢታ ኦꬂዛይታፔኔ ኣሳስ ሜቄꬅ ሜንꬂዛ ኣሳታፔ ናጌቲቴ።

³ቱሙ ቃፃሬቲዳይቲ፥ ፆሴ ዎሲዛይቲ፥ ዬሱስ ኪርስቶሳን ጬቂዛይቲ፥ ኣሾን ጬቄቶንታይቲኔ ኣሾንካ ኣማኔቶንታይቲ ኑና።

⁴ታ ጬቃና ኮይኮ ኣሾ ባጋራ ጬቃና ሚሺ ታስካ ዴስ። ኦናስካ ኣሾን ጬቂዛ ሚሺ ዲዛ ሚሳቲኮ ታ ኢዛፔ ኣꬋይስ።

⁵ታኒ ዬሌቲዳ ኦስፑንꬃ ጋላስ ቃፃሬታዲስ። ታ ኢስራዔሌ ዜሬꬂኔ ቢኒያሜ ኮቻፌ ዬሌታዲስ። ኢብራዌታ ጊዶን ታካ ኣዳ ኢብራዌ። ዎጋ ባጋራ ኦይቺዛዴይ ዲኮ ታ ካሴ ፋርሳዌ።

⁶ሙሴ ዎጋስ ዚልዔቲዛይሳ ጊዲኮ ታኒ ካሴ ዎሳ ኬꬃ ጎዲዛዴ። ዎጋ ናጎን ቤቲዛ ፂሎቴꬂ ጊዲኮ ካሴ ታ ቦላ ኢሲ ዎሶይካ ዴና።

⁷ጊዶ ኣቲን ታስ ጎዓ ጊዲዳይሳ ኡባ ኪርስቶሳ ጊሽ ጋዳ ጎዓይ ባይንዳ ሚሻ ማላ ቆዳዲስ።

⁸ሄሳፌካ ታ ጎዳ ዬሱስ ኪርስቶሳ ኤሮፔ ኣꬊዛይ ሃራይ ኣይኮይካ ባይንዳይሳ ታ ኣማኒዛ ጊሽ ኡባካ ጮ ሜላ ጎዓይ ባይንዳ ሚሻ ማላ ቆዳዲስ። ታኒ ኢዛ ጊሽ ጋዳ ኡባካ ኣጋዲስ። ታ ኪርስቶሳ ዴማና ጋዳ ኡባ ሚሻካ ዎራ ዎꬊዳ ኢታ ሚሻ ማላ ቆዳዲስ።

⁹ታኒ ሄሳꬆ ኦꬂዛ ጋሶይ ካሴ ሙሴ ዎጋን ታስ ዲዛ ፂሎቴꬃ ኣጋዳ ኣማኖን ቤቲዛ ፆሳ ፂሎቴꬅ ኪርስቶሳን ኣማናዳ ዴማናሲኔ ታ ኢዛራ ኢሲፌ ዴዓናሳ።

¹⁰ኪርስቶሳኔ ኢዚ ሃይቂ ዴንዲዳ ዴንꬃ ዎልቃ ታ ኤራና ማላ ኢዛ ዋዬካ ታ ኢዛራ ጊሼታና ማላኔ ሃይቆንካ ታ ኢዛ ሚሳታና ማላ ኣሞታይስ።

¹¹ሄሳꬆካ ታ ሃይቃ ዴንዲዳፔ ጉዬ ሜርናስ ዳናስ ኮያይስ

¹²ታ ሃይሳ ዉርሳ ዴማዲስ ዎይኮ ሃይሳꬆ ሃናዲስ ጉስ ጊዴና። ጊዶ ኣቲን ዬሱስ ኪርስቶሲ ታና ኤራይስ ሂስቲዲ ታስ ጊጊሲዳ ዎይቶ ኤካናስ ሚና ዎꬃ ቦላ ዳይስ።

¹³ታ ኢሻቶ! ታ ሃዒ ታ ኮዪዛይሳካ ኦይኪዳ ማላ ቆዲኬ። ጊዶ ኣቲን ታ ኢሲ ሚሺ ኦꬃና። ታፔ ጉዬራ ዲዛይሳ ኣጋ ኣጋዳ ታፔ ሲንꬃን ዲዛይሳ ኦይካናስ ዛራꬋይስ።

¹⁴ፆሲ ታና ዬሱስ ኪርስቶሳ ባጋራ ፑዴ ፄይጊዳ ጊሽ ዎይቶ ጋካ ኤካናስ ኤሌላይስ።

¹⁵ሄሳ ጊሽ ኑኒ ኣማኖን ሚኒዳይቲ ዉሪካ ሃኒዛ ዮዖ ዉርሲ ሄሳꬆ ፄላናስ ቤሴስ። ኢሲ ኢሲ ዱማ ቆፋይ ኢንቴስ ዲኮ ሄሳካ ፆሲ ኢንቴስ ቆንጪሳና።

¹⁶ጊዲኮካ ኑ ሃዒ ጋኪ ኤሪዳዛን ኣኔ ሲሜሬቶስ።

¹⁷ታ ኢሻቶ! ኣኔ ኢንቴ ታ ሃኒዛ ማላ ታና ካሊቴኔ ሃራታራካ ኢሲፌ ዴዒቴ። ኑ ኑና ኢንቴስ ሌሚሶ ሂስቲ ቤሲዳ ማላ ዲዛ ኣሳታ ዎዝናን ዎꬂቴ።

¹⁸ጋሶይካ ሃይሳፌ ካሴ ታ ኢንቴስ ዛራ ዛራ ዮቲዳ ማላ ሃዒካ ዛራዳ ኣፉንꬃራ ኢንቴስ ዮታይስ። ዳሮቲ ኪርስቶሳ ማስቃሌስ ሞርኬ ጊዲዲ ሲሜሬቴቴስ።

¹⁹ኢስታ ዉርሴꬅ ꬋዮ። ኢስታ ኡሎይ ኢስታ ፆሳ። ኢስታስ ካዉሻቴꬃይ ኢስታስ ቦንቾ። ኢስታ ዎዝናይ ሼምፒዳይ ሃ ቢታ ዱሳና።

²⁰ኑ ዴሬይ ጊዲኮ ሳሎና። ሄፔ ቡሮ ያናይሳ ኑና ኣሺዳ ጎዳ ዬሱስ ኪርስቶሳ ዩሳ ላሞቴꬃን ናጎን ዶስ።

²¹ኢዚካ ዉርሲ ባፔ ጋርሳን ሃሪሳና ዳንዳዪዛ ባ ዎልቃና፥ ዳቡራንቻ ጊዲዳ ኑ ኣሳቴꬅ ቦንቼቲዳ ባ ኣሳቴꬅ ሚሳቲሲዲ ላማና።