ፒሊጲሲዮሴ 2

1

2

3

4

¹ኢንቴስ ኪርስቶሳ ባጋራ ቤቲዳ ኢሲፌቴꬃ ጋሶን ኢሶይ ኢሳ ሚንꬄꬂዛዝ ሲቆ ጊዲንካ ዎይኮ ኣያና ኢሲፌቴꬅ ዎይኮ ማሮይኔ ኣሳስ ሚሼቴꬅ ኢንቴ ጋርሳን ዲኮ ኢንቴ ኣስ ሲቆን ኢሲ ኣያናኒኔ ኢሲ ቆፋን ጊዲዲ ታ ኡፋይስ ፖሊቴ።

³ኣስ ኡባ ኢንቴፌ ቦላራ ፄሊቴ ኣቲን ኢንቴርካ ኢንቴና ዶሶን ዎይኮ ጎዓይ ባይንዳ ጋላታ ኤካናስ ኢሲ ሚሺካ ኦꬆፍቴ።

⁴ኢንቴፌ ኢሲ ኢሲ ኣሲ ሃራ ኣስ ጎዒዛይሳ ፄሊቴ ኣቲን ኢንቴ ጎዓ ፃላላ ፄሎፍቴ።

⁵ዬሱስ ኪርስቶሳስ ዲዛ ኣሽኬቴꬂ ኢንቴ ኣቻንካ ዶ።

⁶ኢዚ ኤራይስ ፆሳኮሺን ባና ፆሳራ ጊኒሳናስ ኮይቤና።

⁷ጊዶ ኣቲን ኣይሌ ሜꬋ ኤኪዲ ኣስ ሚሳቲዲ ባርካ ባና ኤያ ኣስ ኬሲዴስ።

⁸ኣስ ጊዲ ቆንጪዲካ ባና ኣሳፔ ዚቃ ኦꬂዴስ። ሃይቃና ጋካናስ ሄሲካ ማስቃሌ ቦላ ካቄቲ ሃይቃና ጋካናስ ኣዛዜቲዴስ።

⁹ሄሳ ጊሽ ፆሲ ኢዛ ዳሮ ꬎቁ ሂስቲዴስ። ሱንꬃ ኡባፌ ꬎቁ ጊዳ ሱንꬅ ኢዛስ ኢሚዴስ።

¹⁰ሄሲካ ሳሎንካ ቢታ ቦላን ቢታፌ ጋርሳንካ ዲዛ ሜꬌቴꬂኔ ጉልባቴይ ዉሪ ዬሱሳ ሱንꬃስ ጉልባታና ማላ።

¹¹ኣሳ ኢንፃርሲ ዉሪካ ፆሳ ኣዋ ቦንቾስ ዬሱስ ኪርስቶሲ ጎዳ ጊዲዳይሳ ማርካታናሳ።

¹²ሄሳ ጊሽ ታ ኢሻቶ! ኢንቴ ካሴ ኡባ ዎዴ ኣዛዜቲዛይታ ጊዲዳ ማላ ሃዒካ ታ ማታን ዶንታ ኢንቴፌ ሃሆን ዲኮካ ኢንቴ ኣቴꬃይ ኩሜꬅ ጊዳና ማላ ያሻቴꬃኒኔ ቦንቾን ፖሊቴ።

¹³ፆሲ ኢንቴስ ኣዛዜቴꬅ ኢሚሼ ባ ቆፋ ዉርሴꬅ ጋካናስ ኢንቴ ጊዶን ኦꬄስ።

¹⁴ኣይ ሚሺካ ዙዙንꬂኔ ፓላማይ ባይንዳ ኦꬂቴ።

¹⁵ሄሲካ ኢንቴ ኢታኔ ጌላ ኣሳ ጊዶን ጌሻታኔ ዎሶይ ባይንዳ ፆሳ ናይታ ጊዲዲ ኣላሜ ቦላ ኣዋ ኣርሼ ማላ ዴሬ ኡባስ ፖዓናሳ።

¹⁶ኢንቴ ኤኪዳ ዴዖ ቃላ ሎዔꬂ ኦይኪኮ ኪርስቶሲ ሃ ሲሚ ዪዛ ዎዴ ታ ሜላ ዳቡሮንታይሳ ጊሽ ታ ጬቄታናዚ ታስ ዴስ።

¹⁷ቃሴካ ኢንቴስ ጎዳን ዲዛ ኣማኖይ ኢንቴ ፆሳስ ሺሻዳ ዱማ ያርሾ ማላ ታ ሼምፖይ ኢንቴ ያርሾራ ኢሲፌ ያርሾ ማላ ጉኪዛኮ ኢንቴናራ ታካ ኡፋዬታና።

¹⁸ሄሳꬆካ ኢንቴ ኢንቴስ ኡፋዬቲዲ ታናካ ኡፋይሳናስ ቤሴስ።

¹⁹ጎዳይ ማዲኮ ፂምቶሳ ኢንቴኮ ዬዳዳ ኢንቴ ሎዔቴꬃ ጊሽ ሎዖ ዎሬ ሲያናስ ኮያይስ።

²⁰ኢንቴ ሎዔቴꬃ ጊሽ ቆፒዛ ኣሲ ሃራ ኢዛ ማላይ ኦኒካ ባዋ።

²¹ሃራይ ዉሪካ ዬሱስ ኪርስቶሳይሳ ጊዶንታ ባ ጎዓስ ዎፂዛዴ ፃላላ።

²²ጊዶ ኣቲን ኢንቴ ኤሪዛይሳ ማላ ፂምቶሲ ኢዚ ኣይ ማላ ኣሳኮኔ ባ ጊሽ ማርካሲዴስ። ናይ ባ ኣዋራ ኦꬂዛ ማላ ታናራ ሚሺራቾ ቃላ ዮቲዴስ።

²³ሄሳ ጊሽ ሃይሳፌ ሲንꬃን ታ ዋናናኮኔ ሻካ ኤሪዳፔ ጉዬ ኢዛ ታ ኢንቴኮ ኪታና ቆፓይስ።

²⁴ታካ ኢንቴኮ ማታ ዎዴ ባናይሳ ጎዳን ኣማኔታይስ።

²⁵ሄሳꬆካ ኢንቴ ታና ኮሺዛ ሚሻን ኡባን ማዳና ማላኔ ሎዔꬂ ኦይካና ማላ ዬዲዳ ኣፍሮዲፆ ታ ኢንቴኮ ዛራ ዬዳና ማላ ኮሺዛይሲ ታስ ኤሬቲዴስ።

²⁶ጋሶይካ ኢዚ ኢንቴና ኩሜꬃታ ቤያናስ ላሞቲዳ ጊሺኔ ቃሴካ ኢንቴ ኢዛ ሳኮዛ ሲዪዳይሳስ ቆፒዳ ጊሻሳ።

²⁷ቱማፔካ ሃርጊዲ ሃይቂሼ ኣቲዴስ። ጊዶ ኣቲን ፆሲ ኢዛ ማሪዴስ። ታ ካሴ ሙዞቲዛይሳ ቦላ ሃራ ሙዞይ ጉጄቶንታ ማላ ታናካ ማዲዴስ።

²⁸ሄሳ ጊሽ ኢንቴ ኢዛ ቤይዲ ኡፋዬታና ማላኔ ታካ ሂርጋፌ ሼምፓና ማላ ኣሞታይስ።

²⁹ኢንቴ ኢዛ ኬሂ ኡፋይሳን ሞኪ ኤኪቴ። ኢዛ ማላ ኣሳታካ ቦንቺቴ።

³⁰ኢንቴ ታና ማታን ዲዲ ኦꬂ ማዳናስ ዳንዳዮንታ ጊሽ ኢዚ ባ ሼምፖስ ሚሼቶንታ ታና ኦꬂ ማዲዲ ኪርስቶሳ ኦሶን ሃይቂሼ ኣቲዴስ።