ዮሓኒሴ 19:12-25

¹²ዬያ ዬሱሴ ጌስቴ ባኮ ጲላፆሴ ዋይዛዖ ቡሊ'' ዒዛ ሃሻ''ኒ ኮዓዛ፥ ዓይሁዶ ዓሳ ጋዓንቴ፦ «ሓያ ዓሢ ኔ ቡሌ''ቶ ኔኤኒ ሮሜ ዓጮ'' ካኣቲኮ ላጌቱዋሴ፤ ዓይጎሮ ጌዔቴ ፔና ካኣቲ ማሃሢ ቢያ ሮሜ ካኣቲኮ ሞርኬ ማዓያኬ» ጌይ ጌይ ዒላቴኔ።

¹³ጲላፆሴ ዬያ ዋይዛዖ ዬሱሴ ካሮ'' ባንሢ ኬሲ''፦ «ዳልጎ ፓልዒንቴ ሹጫሢ» ጌይንታ ቤዞይዳ ዓኣ፥ ዎጎ ዎጎ ዖይታ ዴዔኔ፤ ዬና ቤዜላ ዔብሬ ዓሶ ሙኡጮና «ጋባታ» ጌይንታኔ።

¹⁴ዬና ኬሌ''ላ ዑሣ ዓኣዺፆ ቦንቾኮ ጊኢጊንቶ ኬሊ'' ማዓዛ፥ ዬማና ዓባ'' ሳዛ ጫርጋያኬ፤ ዒማ''ና ጲላፆሴ ዓይሁዶ ዓሶ ኮራ፦ «ሓይሾ፥ ዒንሢኮ ካኣቲ!» ጌዔኔ።

¹⁵ዔያታ ጋዓንቴ፦ «ባይዜ! ባባይዜ! ሱፄ!» ጌዒ ጌዒ ዒላታዛ፥ ጲላፆሴ ማሃዖ፦ «ዒንሢኮ ካኣቲ ታ ሱፆንዶ?» ዔያቶ ኮራ ጌዔኔ፤ ቄኤሶኮ ሱኡጋ ዒማ''ና፦ «ሮሜ ዓጮ'' ካኣቲዳፓ ዓታዛ ሜሌ'' ካኣቲ ኑኡኮ ባኣሴ» ጌይ ዒዛም ማሄኔ።

¹⁶ዬማ''ና ዬሱሴ ሱፂንታንዳጉዲ ጲላፆሴ ዓኣሢ ዔያቶም ዒንጋዛ፥ ፖኦሊሳ ዬሱሴ ዔኪ ዴንዴኔ።

¹⁷ዬካፓ ዬሱሴ ዒ ሱፂንታንዳ፥ ፑርቲሴ ዓሶ ሱፆ ሚፆ ኬዲ «ቶኦኪ ሜጌሢ ማላ ቤሲ» ጌይንታ ቤዞ ኬስኬኔ፤ ዬና ቤዜላ ዔብሬ ዓሶ ሙኡጮና «ጎልጎታ» ጌይንታኔ።

¹⁸ዬኖ ቤዞይዳ ዔያታ ዒዛና ዎላ'' ላምዖ ዓሲ፤ ፔቴ''ሢ ሻውሎ'' ዛላ'' ፔቴ''ሢ ሚዛቆ ዛላ'' ማሂ ዬሱሴ ባኣካ'' ሱፄኔ።

¹⁹ጲላፆሴ ዒማ''ና፦ «ዓይሁዶ ካኣታ''ሢ፥ ናዚሬቶ ዓጮ'' ዓሢ፥ ዬሱሴ» ጋዓያ ፃኣፒ ፑርቲሴ ዓሶ ሱፆ ሚፆ ዑፃ ጌሤኔ።

²⁰ዬሱሴ ሱፂንቴ ቤዛ ካታሞኮ ዑኬ ማዔሢሮ ሚርጌ ዓይሁዶ ዓሳ ዬኖ ፃኣፒ ጌሦናዞ ናባቤኔ፤ ዬና ፃኣፒንቴሢ ዔብሬ ዓሶ ሙኡጮና ላኣቲኔ ሙኡቺና ሃሣ ጊንሣ ጊሪኬ ሙኡቺናኬ።

²¹ዓይሁዶ ዓሶኮ ቄኤሶ ሱኡጋ ጲላፆሴ ኮራ፦ «ኔኤኒ ‹ዓይሁዴ ካኣቲኬ› ጌይ ፃኣፒፖ፤ ‹ሓይ ዓሢ ታኣኒ ዓይሁዴ ካኣቲኬ ጋዓኔ› ጌይ ፃኣፔ» ጌዔኔ።

²²ጲላፆሴ ጋዓንቴ፦ «ታኣኒ ፃኣፔሢ ማይ ፃኣፒ ሃሼ''ኔ» ጌይ ማሄኔ።

²³ፖኦሊሶንሢ ዬሱሴ ሱፄስካፓ ዖዶዞ ቦንቾ ማኣዓሢ ሌሊ ዓታዛ ዒዛኮ ሃንጎ ዓፒሎ ዔኪ ፔቴ'' ፔቴ'' ፖኦሊሶም ሄላ''ንዳጉዲ ዖይዶ ቤሲ ፓቄኔ፤ ጋዓንቴ ዬና ቦንቾ ዓፒሌላ ጊኢጊሺ ሲኪንቲባኣያ ሎፓ ሉ ሄላ''ንዳኣና ፔቴ'' ማዒ ኮሺ''ንቴ ዓፒላኬ፤

²⁴ዬያሮ ፖኦሊሶንሢ፦ «ዬና ዓፒሌላ ዖኦም ሄላ''ንዳቴያ ዒፃ ኑ ዓጋንዳኔ፤ ኑ ዳዳርዚንዱዋሴ» ዎሊ ኮይላ'' ጌዔኔ። ዬይ ያዺ ማዔሢ፦ «ታኣኮ ዓፒሎ ዔያታ ጊሽቴኔ፤ ታኣኮ ፔቴ'' ማሂ ሲኮና ዓፒሎይዳ ዱማሲ ዔሮ ባኮ ዔያታ ዓጌኔ» ጌይንቴ ማፃኣፖ ቃኣላ'' ኩማንዳጉዲ ፖኦሊሳ ዬኖ ዓጎ ባኮ ዓጌኔ።

²⁵ዬሱሴ ሱፂንቴ፥ ፑርቲሴ ዓሶ ሱፆ ሚፆ ኮይሎ''ይዳ ዒዛኮ ዒንዶና ዒንዶ ጌሮና ቄሌዮጳ ጎዖሢ ማቾ ማይራሞና ሜግዴላ ዓጮ'' ማይራማኣ ዔቂ ዓኣኔ፤