12Pilato okitemoliaya kenijki kikajkawas n Jesús, pero n tlayakankeh judíojteh okachi otsatsajtsiah: —¡Tla tikkajkawas non tlakatl, tikixpanawis n César, porke akin motenewa rey, kijtosneki kikokolia n César!
13Ijkuak Pilato okinkak ninteh tlájtolteh, okikixti n Jesús, iwa Pilato omotlali kan tlaixkomaka, itech se lojar non itoka Tlateyotitok non itech tlájtoli hebreo itoka Gábata.
14Non tonati yomotlatlalijtokah para n ilwitl de Paskua, ijkuakó yokatka kemi tlajko tonati, Pilato okinmili n judíojteh: —¡Nikan kajki nomorey!
15Iwa yejwah otsajtsikeh: —¡Xikixti! ¡Mamiki! ¡Xikkrusifikaro! Pilato okinmili: —¿Nonkinekih manikkrusifikaro nomorey? Pero n tiopixkeh non tlayakantokeh otlanankilijkeh: —¡Tejwah mach tikpiah ok se rey, sanwel César!
16Ijkuakó Pilato okinmaktili n Jesús para makikrusifikarokah, iwa yejwah okiwikakeh.
17Ijkuak Jesús okiski de Jerusalén, okimamajtiaya ikrus imilajkayo n lojar non itoka Miketsontekomatl, non itech tlájtoli hebreo omonotsaya Gólgota.
18Ompa okikrusifikarojkeh n Jesús iwa n ok ome tlakah ik inajnakastla.
19Pilato okichijchi se tlajkuíloli iwa otlanawati makitlalilikah ik ikuatsontla. N tlajkuíloli okijtoaya: “Jesús de Nazaret, Rey de judíos.”
20Miakeh judíojteh okiamapoah, porke kan okikrusifikarojkeh n Jesús amo wejka de Jerusalén, iwa oijkuilitoka itech tlájtoli hebreo, latín iwa griego.
21Yika n tiopixkeh non tlayakantokeh okilijkeh n Pilato: —Amo xikijkuilo “Rey de judíojteh”; yej xikijkuilo “Akin motenewa Rey de judíojteh.”
22Pero Pilato okinnankili: —Tlan yonikijkuilo, yonikijkuilo.
23Ijkuak n soldadojteh yokikrusifikarojkeh n Jesús, nawi okinmoxexelilijkeh itlakenwah. Pero kemi imanto oseititoka
24n soldadojteh okimolijkeh: —Amo matiktsomonikah, yej matikawiltikah, san akin kitlanis. Ijkó omochi tlan oijkuilitoka itech itlajkuilol Dios: “Okinmoxexelilijkeh notlakenwah, iwa okimotlatlanilijkeh nomanto.” Iwa ijkó okichijkeh n soldadojteh.
25Iwa inakastla ikrus n Jesús, okatka imamá, iwa iwelti imamá, María isiwa n Cleofas, iwa n María de Magdala.
San Juan 19
San Juan 19:12-25