ቆላሲያሴ 3

1

2

3

4

¹ሂስቲኮ ኢንቴ ኪርስቶሳራ ኢሲፌ ዴንዲዳይታ ጊዲኮ ኪርስቶሲ ፆሳ ኣቻን ኡቲዳሶን ፑዴን ዲዛ ሃኖቴꬃ ኮዪቴ።

²ኢንቴ ቆፋይ ፑዴ ቦላን ዲዛ ሚሻ ቦላ ጊዶ ኣቲን ሃ ቢታ ዮዖ ቦላ ጊዶፖ።

³ጋሶይካ ኢንቴ ሃይቂዴታኔ ኢንቴ ዴዖይካ ኪርስቶሳራ ፆሳ ኣቻን ቆቴቲዴስ።

⁴ኢንቴስ ዴዖ ጊዲዳ ኪርስቶሲ ቆንጪዛ ጋላስ ኢንቴካ ሄ ዎዴ ኢዛራ ኢሲፌ ቦንቾራ ቆንጫና።

⁵ሄሳ ጊሽ ኢንቴስ ቢታ ቦላ ዲዛ ኣሞቴꬅ ዲጊቴ። ሄይቲካ ላይማ፥ ቱናቴꬅ፥ ኣሾ ኣሞ፥ ኢታ ኣሞቴꬂኔ ኤቃስ ጎይኖ ማላ ጊዲዳ ጋጲጋጶ።

⁶ሄይታንታ ጋሶን ፆሳ ሃንቆይ ፆሳስ ኣዛዜቶንታይታ ቦላ ያና።

⁷ኢንቴካ ካሴ ዲዛ ዱሳን ሄ ሚሻታ ኦꬂዴታ።

⁸ሃዒ ጊዲኮ ሃንቆ፥ ዪሎ፥ ጫሼ፥ ዚጊርሲኔ ዬላሲዛ ሃሳያ ሄይታንታ ሚሳቲዛይታ ዉርሲ ዲጊቴ።

⁹ካሴ ጬጋ ኣሳቴꬅ ኢዛ ኦሶራ ጋꬂ ኢንቴፌ ቃሪ ዬጊዳ ጊሽ ኢንቴ ኢንቴ ጋርሳን ኢሶይ ኢሳራ ዎርዶ ሃሳዮፒቴ።

¹⁰ባና ሜꬊዳይሳ ሚሳታና ማላ ኤራን ኦራፂዳ ኦራꬃ ኣሳቴꬅ ማይዒዴታ።

¹¹ሄን ጊሪኬ ኣስ ጊዲን ዎይኮ ዩሁዳ ኣስ ዎይኮ ቃፃሬቲዳይታ ዎይኮ ቃፃሬቶንታይታ ዎይኮ ታማሪዳይታኔ ታማሮንታይታ ዎይኮ ማሬቶንታይታ ዎይኮ ኣይሌ ዎይኮ ጎቃ ጌቴቲዛ ዱማቴꬂ ዴና። ኪርስቶሲ ሄይታንታ ኡባሳ። ቃሴ ኡባንካ ዴስ።

¹²ሄሳ ጊሽ ዱማ ጊዲዲ ዶሴቲዳይቶ፥ ኢንቴ ፆሳስ ዶሬቲዳይታ ጊዲዳ ማላ ሚሼቴꬂኔ ኪያቴꬅ፥ ኣሽኬቴꬅ፥ ቦንቾኔ ዳንዳያ ማይዒቴ።

¹³ኢንቴ ኢሶይ ኢሳ ዳንዳዪቴ፥ ኢንቴፌ ኢሳዴይ ኢሳዴ ቦላ ሚሼቲኮ ዮዖይካ ኢዛ ቦላ ዲኮ ኢሶይ ኢሳስ ኣቶ ኣቶ ጌቴቲቴ። ጎዳይካ ኢንቴስ ኣቶ ጊዳ ማላ ኢንቴካ ሃራ ኣሳስ ኣቶ ጊቴ።

¹⁴ሄሳ ኡባ ቦላ ኡባ ኩሜꬃ ኢሲፌቴꬃን ሺሺ ቃቺዛ ሲቆ ማይዒቴ።

¹⁵ኢንቴ ዉሪካ ኢሲ ኣሾ ጊዲዲ ሳሮቴꬃስ ፄይጌቲዳ ኪርስቶሳ ሳሮቴꬂ ኢንቴ ዎዝናን ካዎቶ። ኢንቴ ጋላቲዛይታ ጊዲቴ።

¹⁶ኪርስቶሳ ቃላይ ኢንቴናን ኩሜꬅ ጊዶ። ኢንቴ ኢንቴ ጋርሳን ኣꬎ ኤራቴꬃን ታማሪቴኔ ዞሬቲቴ፤ ማዛሙሬኒኔ ሳባን ኣያና ዬꬃን ጋላታራ ጋꬂ ኢንቴ ዎዝናራ ፆሳስ ዬፂቴ።

¹⁷ኢዛ ባጋራ ፆሳ ኣዋስ ጋላታ ሺሺሼ ቃላን ጊዲን ዎይኮ ኦሶን ኢንቴ ኦꬂዛይሳ ዉርሲ ጎዳ ዬሱሳ ሱንꬃን ኦꬂቴ።

¹⁸ማቼቶ! ጎዳ ኣቻን ኢንቴስ ቤሲዛ ሚሽ ጊዲዳ ጊሽ ኢንቴ ኣዚናታስ ኣዛዜቲቴ።

¹⁹ኣዚናቶ! ኢንቴ ኢንቴ ማቼታ ሲቂቴኔ ኢስታስ ሜንፄ ኢቶፒቴ።

²⁰ናይቶ! ኢንቴ ጎዳ ኡፋይሳና ማላ ኢንቴ ኢንቴና ዬሊዳይታስ ኡባ ሚሻን ኣዛዜቲቴ።

²¹ኣዋቶ! ናይቲ ሂዶታ ቃንፆንታ ማላ ኢንቴ ናይታ ሃንቄꬆፍቴ።

²²ኣይሌቶ! ኣስ ኡፋይሳሲኔ ጮ ኣይፌሶን ቤታናስ ጊዶንታ ሱሬ ዎዝናፔ ኢንቴ ጎዳስ ባቢቴ። ሃይሳ ቢታን ሃሪዛ ጎዳታስካ ሃኖ ኡባን ኣዛዜቲቴ።

²³ኢንቴ ኦꬂዛ ሚሽ ዉርሲ ኣሳስ ጊዶንታ ጎዳስ ኦꬂዛ ማላ ታይቢዲ ኩሜꬃ ዎዝናፔ ኦꬂቴ።

²⁴ኢንቴ ጎዳ ኣቻፌ ኢንቴ ኦሶ ማላ ኤካናስ ላታይ ዲዛይሳ ኢንቴ ኤሬታ። ኢንቴ ኦꬂዛይ ጎዳ ዬሱስ ኪርስቶሳሳ።

²⁵ቆሆ ኦꬂዳዴይ ባ ኦꬂዳሪ ኩሼ ኤካና። ኢዛ ኣቻን ዱማ ማዶይ ዴና።