ቆላሲያሴ 1

1

2

3

4

¹ፆሳ ሼኔን ዬሱስ ኪርስቶሳን ኪቴቲዳ ጳዉሎሳፔኔ ኑ ኢሻ ፂምቶሳፔ፥

²ቆላሲያሴን ዲዛ ኪርስቶሳን ዱማቲዳይታሲኔ ኣማኔቲዳ ኢሻታስ ኑ ኣዋ ፆሳፌ ሳሮቴꬂኔ ኪያቴꬅ ኢንቴስ ጊዶ።

³ኑ ኢንቴ ጊሽ ዎሲዛ ኡባ ጋላስ ኑ ጎዳ ዬሱስ ኪርስቶሳ ኣዋ ፆሳ ጋላቶስ።

⁴ጋሶይካ ኢንቴስ ዬሱስ ኪርስቶሳን ዲዛ ኣማኖኒኔ ኣማኒዛ ኣሳ ኢንቴ ዉርሲ ሲቂዛይሳ ኑ ሲዪዳ ጊሻሳ።

⁵ሄሲ ዉሪካ ሃኒዳይ ሳሎን ኢንቴስ ጊጌቲዳ ሂዶታፔ ዴንዲዳይሳና። ሄሳ ሄ ሂዶታ ጊሽ ሚሺራቾ ቃላ ኢንቴ ካሴቲዲ ሲዪዴታ።

⁶ሄሲካ ሄ ኢንቴኮ ጋኪዴስ። ሄሳ ሚሺራቾ ቃላ ኢንቴ ሲዮሳፔኔ ፆሳ ኪያቴꬃ ቱማቴꬃ ኢንቴ ኤሮ ጋላሳፌ ሃ ሲሚን ኣላሜ ዩሾን ኢዚ ኦꬂሼ ዲዛይሳ ማላ ኢንቴ ኣቻን ኣይፌ ኣይፊሼኔ ዲጪሼ ዴስ።

⁷ሄሳካ ሃዒ ኑ ጊሽ ጊዲዲ ኪርስቶሳስ ኣማኔቲዳ ኦሳንቻ ጊዲዳይሲኔ ኑናራ ኢሲፌ ኦꬂዛኔ ሲቂዛ ኤጳፒራይ ኢንቴና ታማርሲዴስ።

⁸ቃሴካ ኢዚ ኢንቴናን ዲዛ ኣያና ሲቆቴꬃ ኑስ ዮቲዴስ።

⁹ኑ ቃሴ ሄሳ ሲዮሳፔ ሃ ሲሚን ኢንቴ ፆሳ ሼኔ ኤራቴꬃኒኔ ኣኬካን ኢንቴና ኩንꬃና ማላ ኢንቴ ጊሽ ዎሳ ቃንፂቤኮ።

¹⁰ሄሳꬆካ ጎዳስ ቤሲዛ ዱስ ዳና ማላ ኢንቴ ኢዛ ፖሊ ኡፋይሳና ማላ ሎዖ ኦሶ ኡባን ኣይፌ ኢማና ማላኔ ፆሴ ኤሮን ዲጪ ዲጪ ባና ማላ ኑ ኢንቴስ ዎሶስ።

¹¹ጎዳይ ባ ጊታ ዎልቃን ባ ሚኖቴꬅ ኡባ ኢንቴስ ኢሞ፤ ዉርሲካ ኢንቴ ዳንዳያና ማላኔ ኡፋይሳን ጊጌቲዳይታ ጊዳና ማላ ኢንቴና ኢዚ ማዶ።

¹²ኣማኒዛይቲ ላቲዛሶ ፖዖ ካዎቴꬅ ላቲዛይታ ኑ ጊዳና ማላ ኑና ጋꬂዳ ኑ ኣዋ ኢንቴ ጋላታናሳ።

¹³ኢዚ ኑና ꬉማን ሃሬቴꬃፌ ኣሺዲ ጌዴ ባ ዶሲዛ ናዛ ካዎቴꬃን ኑና ፒንꬂዴስ።

¹⁴ኑ ኢዛን ዎዜቲዲ ናጋራፔ ማሬቲዶስ።

¹⁵ኪርስቶሲ ኣይፌን ቤቶንታ ፆሳስ ቱሙ ሌሚሶ፤ ሜꬌቴꬃ ኡባፌ ጊታኔ ባይራ።

¹⁶ሜꬌቴꬅ ዉሪ ኢዛን ሜꬌቲዴስ። ሳሎኒኔ ሳዓን ዲዛይቲ፥ ኣይፌን ቤቲዛይቲኔ ቤቶንታይታ ጊዲንካ፥ ዎልቃማታ ጊዲንካ፥ ሃሪዛይታ ጊዲንካ ዎይኮ ጎዳቴꬅ ዲዛይቲ ሃኒዳይ ዉሪካ ኢዛን ኢዛስ ሜꬌቲዴስ።

¹⁷ኢዚ ኡባፌ ካሴ ዴስ። ዉሪካ ኢሲ ቦላ ኦይኬቲ ሚኒዳይ ኢዛና።

¹⁸ኢዚ ባ ኣሳቴꬅ ጊዲዳ ዎሳ ኬꬃይስ ሁዔ። ኡባስ ቦላ ጊዳና ማላ ኢዚ ሃይቂዳ ኣሳ ኡባፌ ኮይሮ ዴንዲዴስ።

¹⁹ሄሲካ ሃኒዳይ ኩሜꬃ ፆሳቴꬃይ ኢዛ ናዛን ዴዓና ማላ ፆሳ ኣዋ ሼኔ ጊዲዳ ጊሻሳ።

²⁰ማስቃሌ ቦላ ኢዛፔ ጉኪዳ ሱꬃን ሳሮቴꬅ ሜꬊዲ ቢታ ቦላ ጊዲን ሳሎ ቦላ ዲዛይሳ ዉርሲ ኢዛ ባጋራ ባናራ ማቃዪንꬂዴስ።

²¹ኢንቴ ኢታ ኣማሌ ጋሶን ካሴ ኢንቴ ፆሳፌ ሻኬቲዲ ኢንቴ ኢንቴ ቆፋራ ኢዛስ ሞርኬታኮሺን።

²²ሃዒ ቃሴ ኢንቴ ቦላ ባላይኔ ዎሶይ ባይንዳ ጌሻታ ኦꬂዲ ኢንቴና ባ ሲንꬅ ሺሻናስ ኪርስቶሳ ኣሾ ሃይቆ ባጋራ ፆሲ ኢንቴና ባናራ ማቃዪንꬂዴስ።

²³ሄሲካ ሃናናይ ኢንቴ ኣማኖን ፃጲዲኔ ጊጌቲዲ ኢንቴ ኢንቴ ኣማኖን ኤኪዳ ሚሺራቾ ቃላፔ ቃፆንታ ሚኒ ኤቂኮና። ኢንቴሲኔ ሳሎ ጉፋንꬆን ዲዛ ሜꬌቴꬃስ ሳባኬቲዳ ሚሺራቾ ቃላይ ሄሳ። ታ ጳዉሎሲካ ሃይሳ ሃ ሚሺራቾ ቃላስ ኦሳንቻ ጊዳዲስ።

²⁴ታ ኢንቴ ጊሽ ዋዬ ቤይዳይሲ ሃዒካ ታና ኡፋይሴስ። ኪርስቶሲ ባ ኣሳቴꬅ፤ ሄሲካ ዎሳ ኬꬃ ጊሽ ኢዚ ኤኪዳ ዋዬዛፔ ኤኪሺን ፓጪዳይ ዲኮ ታኒ ታ ኣሾን ኩንꬃና።

²⁵ፆሳ ቃላ ታ ኢንቴስ ፓጬይ ባይንዳ ጋꬃና ማላ ታስ ፆሳፌ ኢሜቲዳ ሃዳራ ማላ ታ ዎሳ ኬꬃ ኦሳንቻ ጊዳዲስ።

²⁶ሃ ቃላይ ቤኒ ዎዴፔኔ ካሴ ዬሌቴꬃፌ ጌሚዲ ፁራ ጊዲ ጋምዒዴስ። ሃዒ ጊዲኮ ኣማኒዛይታስ ኡባስ ቆንጪዴስ።

²⁷ፆሲ ባ ኣሳስ ቆንጪሳናስ ኮይዳ ፁራይ ኢዛ ቦንቾ ዱሬቴꬃይ ኣይዛቤ ጊዲዳ ኢንቴ ጊዶን ኣይ ማላ ጊታኮኔ ቤሳናሳ። ኢዚካ ኢዛ ቦንቾ ሂዶታ ጊዲዳ ኢንቴ ጊዶን ዲዛ ኪርስቶሳ።

²⁸ኑካ ኢሲ ኢሲ ኣስ ኪርስቶሳስ ኩሜꬃ ኣስ ሂስቲ ሺሻናስ ዳንዳያና ማላ ኣስ ዉርሲ ሂላራ ዞሪሼኔ ታማርሲሼ ኪርስቶሳ ጊሽ ሳባኮስ።

²⁹ታካ ታ ጋርሳን ሚንꬃ ኦꬂዛ ኢዛ ዎልቃን ዉርሳ ባፄታሼ ሄ ቆፋ ፖላናስ ዳፌታይስ።