ቆላሲያሴ 2

1

2

3

4

¹ኢንቴ ጊሺኔ ሎዶቂያን ዲዛይታኔ ሄሳꬆካ ታና ባ ኣይፌራ ቤዪ ኤሮንታ ኣሳ ኡባስ ታ ኣይ ማላ ባፄቲኮኔ ኢንቴ ኤራና ማላ ታ ኮያይስ።

²ቃሴካ ኢስታ ዎዝናይ ሚናና ማላኔ ኢስቲ ሲቆቴꬃን ኢሶይ ኢሳራ ኦይኬታና ማላ ኩሜꬅ ጊዲዳይሳ ዩሺ ቆፒ ኤሮ ዱሬቴꬅ ዴሚዲ ፆሳ ፁራ ጊዲዳ ኪርስቶሳ ኢስቲ ኤራና ማላ ታ ዳፌታይስ።

³ቆታን ዲዛ ጪንጫቴꬂኔ ኤራቴꬃ ሃሮይ ዉሪካ ቤቲዛይ ኪርስቶሳ ኣቻና።

⁴ኦኒካ ኢንቴና ዱና ማልዔꬆን ባሌꬆንታ ማላ ታ ኢንቴስ ዮታይስ።

⁵ታ ኢንቴፌ ኣሾ ኣይፌን ሃካ ዲኮካ ኣያናን ኢንቴናራ ኢሲፌ ዳይስ። ኢንቴ ዎጋራ ዲዛይሳኔ ኢንቴ ኪርስቶሳ ሎዔꬅ ኣማኒዛይሳ ቤያዳ ታ ዳሮ ኡፋዬታይስ።

⁶ሄሳ ጊሽ ኢንቴ ጎዳ ዬሱስ ኪርስቶሳ ኣማኒዳ ማላ ኢዛን ዴዒቴ።

⁷ኢንቴ ኢዛን ቶኬቲዲኔ ኬፄቲዲ ኢንቴ ታማሪዳ ማላ ኣማኖን ሚኒ ዳሮ ቲርፓ ጋላታ ኢዛስ ሺሺሼ ዲቴ።

⁸ኪርስቶሳን ፃጲዳዝ ጊዶንታ ኣሳ ዎጋኒኔ ጎዓይ ባይንዳ ሃ ኣላሜዛ ላፋ ዎጋን ኤቂዳ ኣሳ ኤራቴꬃኒኔ ጮ ሜላ ባሌꬆ ሃሳያን ኢንቴና ኦኒካ ዲዖንታ ማላ ናጌቲቴ።

⁹ጋሶይካ ኩሜꬃ ፆሳቴꬅ ኢዛ ኣሳቴꬃን ዴስ።

¹⁰ኢንቴካ ሃሪዛይታሲኔ ጎዳታ ኡባስ ሁዔ ጊዲዳ ኪርስቶሳን ኩሜꬅ ጊዲቴ።

¹¹ኢንቴ ኢዛን ቃፃሬቲዴታ። ሄሲ ሄ ቃፃራዚካ ናጋራ ጊዲዳ ኣሾ ቆፋ ዲጋናስ ኪርስቶሳን ሃኒዳይሳ ኣቲን ኣሳ ኩሼን ሃኒቤና።

¹²ፂንቃታን ኢዛራ ኢሲፌ ሞጌቲዴታ። ኢዛ ሃይቆፔ ዴንꬂዳ ፆሳ ዎልቃን ኣማኒዲ ቃሴካ ኢዛራ ኢሲፌ ዴንዲዴታ።

¹³ኢንቴ ካሴ ኢንቴ ሞሮኒኔ ኢንቴ ኣሾ ናጋራ ሃኖቴꬃ ኢንቴፌ ዲጎንታ ኣጊዳ ጊሽ ሃይቂዳይታኮ ሺን ፆሲ ኢንቴና ኪርስቶሳ ባጋራ ፓꬂዴስ፤ ኢንቴ ናጋራካ ኡባ ኣቶ ጊዴስ።

¹⁴ካሴ ኑና ሞቲሼኔ ኑናራ ኤቄቲሼ ዲዛ ሙሴ ዎጋን ኣጮ ሞቶስ ፃፌቲዳይሳ ቁጪ ዲጊዴስ። ማስቃሌ ቦላ ቶርጊዲ ኑ ቦላፌ ዲጊዴስ።

¹⁵ሃላቃታኔ ጎዳቲዛይታ ጎዳቴꬅ ኢስታፌ ዎꬂ ኤኪዲኔ ማስቃሌ ቦላ ሃይቂዲ ፆኒ ዴንዲዲ ዲዔቲዳይታ ቆንጬን ዩሺ ቤሲዴስ።

¹⁶ሄሳ ጊሽ ሙሳን ዎይኮ ኡሻን፥ ኢሲፌ ቦንቾን ዎይኮ ኣጊና ፄሮኒኔ ሳምባታ ጋላስ ቦንቾ ጊሽ ኢንቴ ቦላ ኦኒካ ፒርዶፎ።

¹⁷ሄይቲ ዉሪካ ቡሮ ያና ሃኖታስ ኤሾታ ጊዲሺን ዋና ኣሳቴꬃይ ጊዲኮ ኪርስቶሳ።

¹⁸ቤሶንታ ኣሽኬቴꬂኔ ኪታንቻታስ ጎይኖ ዶሲዛ ኣሲ ኦኒካ ኢንቴና ꬉጲዲ ሜላ ኣሾንታ ማላ ናጌቲቴ። ሄሳ ማላ ኣሲ ባ ቤዪዳ ኣጉሞስ ዎጋይ ባይንዳ ባና ናሺሼ ሃዳ ኣሾ ቆፋን ኩሚዲ ኦቶሬቴስ።

¹⁹ሄሳ ማላ ኣሳስ ሁዔ ጊዲዳ ኪርስቶሳራ ኣይኮ ጋይቶቴꬂካ ዴና። ኩሜꬃ ኣሳቴꬅ ሻያኒኔ ኮልꬔ ጋꬂ ኦይꬄꬂ ዲቺዛ ሁዔይ ኪርስቶሳ። ፆሲ ኪርስቶሳ ኣሳቴꬅ ኩሜꬅ ዲቺዛይ ሄሳ ማላና።

²⁰ሃይሳ ሃ ኣላሜዛ ዎጋስ ኢንቴ ኪርስቶሳራ ሃይቂዳይታ ጊዲኮ ሂስቲን ሃዒ ኣዛስ ሄ ዎጋስ ሃሬቴቲ?

²¹ኦይኮፋ፥ ላጫ ቤዮፓ፤ ቦቾፋ ጊዛይታ ማላ።

²²ሃይቲ ዉሪ ኣሳ ኣዛዞኒኔ ኣሳ ቲሚርቴን ዎꬊዳ ዎጋታ ጊዲዳ ጊሽ ኦꬄቲዳፔ ጉዬ ጮ ꬋያናስ ዴቴስ።

²³ሃ ኣዛዞቲ ባርካ ባፔ ሜꬊ ኤኪዳ ጎይኖ ቆፋይ ጮ ቤሶንታ ኣሽኬቴꬂኔ ባ ኣሳቴꬅ ናቂ ኦይꬃን ኢስታስ ቱሙ ኣꬎ ኤራቴꬅ ዲዛይታ ሚሳቴቴስ። ጊዶ ኣቲን ኣሾ ኣሞቴꬅ ሺሺ ኦይኪዛ ዎልቃይ ኢስታስ ባዋ።