ሮሚያ 6:3-17

³ዎይ ኑኒ ኡባቱ ኪሪስቶሳ ዬሱሳና ኢቲፔ ጊዳናው፥ ፃማቄቴዳ ዎዴ፥ ኣ ሃይቁዋንካ ኣናና ኢቲፔ ጊዳናው ፃማቄቴዳዋ ኤሪኪቴ?

⁴ሄዋ ዲራው፥ ኪሪስቶሲ ባሬ ኣዉዋ ቦንቾ ዎልቃን ሃይቁዋፔ ዴንዶዋዳን፥ ኑኒካ ኦራꬃ ዴዑዋ ዴዓናው፥ ኣ ሃይቁዋ ኣናና ሻካናው ፂንቃታኒ ኣናና ኢቲፔ ሞጌቴዶ።

⁵ኣዪሲ ጎፔ፥ ኑኒ ኢ ሃይቄዳዋዳን ሃይቂዴ፥ ኣናና ኢቱዋ ጊዶፔ፥ ሃዋዳንካ፥ ሃይቁዋፔ ኢ ዴንዶዋዳን ኑኒካ ዴንዲዴ፥ ኣናና ኢቱዋ ጊዳና።

⁶ኑኒ ሃዋፔ ሲንꬃው ናጋራው ኣይሌ ጊዴና ማላ፥ ቃሲ ኑ ናጋራንቻ ኣሳቴꬃ ዎልቃይ ꬋያና ማላ፥ ኑ ኤጫ ኣሳቴꬃ ኪሪስቶሳና ማስቃሊያ ቦላ ሚሲማሪያን ꬊሼቲ ካቄቴዳዋ ኤሬቶ።

⁷ኣዪሲ ጎፔ፥ ኢቲ ኡራይ ሃይቂያ ዎዴ ናጋራ ዎልቃይ ኣ ሞዴና፤ ሺን

⁸ኑኒ ኪሪስቶሳና ሃይቄዳዋ ጊዶፔ፥ ኣናና ቃሲ ዴዓናዋ ኣማኔቶ።

⁹ኣዪሲ ጎፔ፥ ኪሪስቶሲ ሃይቁዋፔ ዴንዴዳዋ፥ ቃሲ ላዔንꬁዋ ኢ ሃይቄናዋኔ ሃይቁ ሲንꬃፔ ኣ ሞዴናዋ ኑኒ ኤሬቶ።

¹⁰ኢ ኢቲ ካላካ ሃይቄዳ፤ ናጋራው ኣ ቦላ ዎልቃይ ባዋ፤ ሺን ኢ ሃ ዴዒያ ዴዑዋ ፆሳው ዴዔ።

¹¹ሃዋዳን ቃሲ ሂንቴ ናጋራ ኦꬄናዳን፥ ሂንቴንታ ሃይቄዳዋዳን ቆፒቴ፤ ሺን ጎዳ ኪሪስቶሳ ዬሱሳ ባጋና ፆሳው ሂንቴ ፓፃ ዴዒያዋዳን፥ ሂንቴንታ ቆፒቴ።

¹²ሄዋ ዲራው፥ ሂንቴ ሂንቴንቱ ኣሳቴꬃ ኣሙዋሲ ኣዛዜታና ማላ፥ ናጋራይ ሃይቂያ ሂንቴ ኣሳቴꬃ ሞዶፖ።

¹³ቃሲ ሂንቴ ኣሳቴꬃፔ ኢቲ ሳኔ ኢታ ኦሱዋ ኦꬃናው ናጋራው ኢሞፒቴ፤ ሺን ሃይቁዋፔ ዴንዴዳ ኣሳዳን ሂንቴንታ ፆሳው ኢሚቴ፤ ቃሲ ሂንቴ ኩሜንꬃ ኣሳቴꬃካ ፂሎ ኦሱዋ ኦꬃናው ፆሳው ኢሚቴ፤

¹⁴ኣዪሲ ጎፔ፥ ናጋራይ ሂንቴንታ ሞዳናው ዳንዳዬና፤ ሂንቴ ፆሳ ኣꬎ ኬካቴꬃ ጋርሳና ዴዒታፔ ኣቲን፥ ሂጊያፔ ጋርሳና ዴዒኪታ።

¹⁵ያቲና፥ ዋናኔ? ፆሳ ኣꬎ ኬካቴꬃ ጋርሳና ዴዒኖፔ ኣቲን፥ ሂጊያፔ ጋርሳና ዴዔና ዲራው፥ ናጋራ ኦꬃኔ? ጊዴና፤

¹⁶ሂንቴ ሂንቴንታ ኢቲ ኡራው ኣዛዜታናው፥ ኣይሊያዳን ኦꬂዴ ኢሚያ ዎዴ፥ ሄ ሂንቴንታ ኣዛዚያዎ ኣይሌቱዋ ጊዲያዋ ኤሪታ፤ ዎይ ሂንቴ ሂንቴንቶ ሃይቁዋ ኣሂያ ናጋራው ኤኖ ጊታ፤ ዎይ ሂንቴ ሂንቴንታ ፂሎ ኦꬂያ ኣዛዞ ኤኖ ጊታ።

¹⁷ሺን ፆሳው ጋላታይ ጊዶ፤ ኣዪሲ ጎፔ፥ ናጋራው ካሴ ሂንቴ ኣይሌ፤ ሺን ጉዬፔ ሂንቴ ኣኬዳ ቲሚርቲያ ጊዶን ዴዒያ ቱማቴꬃው ሂንቴ ኩሜንꬃ ዎዛናፔ ኣዛዜቴዲታ።