Roma 6:3-17

³Fama ei ta bubuluk, mae, faik fo ita salani, na ndia dadik tanda, nae ita laꞌo ela ita soda laan, fo dadik neu hataholi beuk, fo nanambaꞌak no Yesus Karistus. Ndia sama leo ita mate noꞌu to Ndia.

⁴Faik Karistus maten, de ala latoin. Boe ma faik ita salani, na, ndia sama leo ita mate so, fo laꞌo ela soda laak, de ala latoi ita. Naa, Manetualain pake Ndia koasan fo ana seli ndia, suek Ana tao nasoda falik Karistus neme Ndia mamaten mai. Amak Manetualain boe, nahiik ita simbok Ndia koasan ndia, suek tasoda fali, fo dadik hataholi beuk.

⁵Huu ndia sama leo, ita mate noꞌu to Yesus. De, ita fo nanambaꞌak to Ndia, neu ko neu faik daebafok babasan ita tasoda fali teme mamates mai, sama leo Ndia nasoda fali.

⁶Makahulun, ita dadik hataholi mana tao salak mata-matak. Tehuu ita soda laan ndia, nakalulutuk basan so, sama leo ala mbaku mate ita nai ai ngganggek sama-sama to Karistus. Hatematak ia, manggalauk manai ita dale nala, ta naena koasa so fo ana heti ita bali. Hatematak ia, ita ta nanambaꞌak sama leo ata, fo ta naena hak fo hele tao hata. Manggalauk nai ita dalen dale ta bisa nakaseti ita tao salak bali.

⁷Mete ma hataholi maten so, na ndia nakamboꞌik so hetu? Ta hambu esa boe, fo bisa nakaseti ndia tao salak bali.

⁸De, huu ndia sama leo ita mate noꞌu to Karistus, na ita tamahele, tae, ita boe neu ko ita tasoda takandondoo henin to Ndia.

⁹Ita bubuluk tae, huu Karistus nasoda fali neme Ndia mamaten mai, de Ana ta mate seluk bali. Te ta hambu hata esa bali naena koasa, fo ana tao nisa Ndia.

¹⁰Makahulun, Ana mate laꞌi esa so, fo Ana koka heni salak koasan. Tehuu hatematak ia, Ana nasoda, fo natudu hada-holomata neu Manetualain.

¹¹Ei musi taok ei ao mala leondiak boe. Nonook leo ei mate so, huu ndia de salak ta naena koasa neu ei bali. De, hatematak ia, ei musi masoda fo matudu hada-holomata neu Manetualain, huu ei bei nanambaꞌak mia Yesus Karistus.

¹²Boso ela manggalauk manai o dalem naena koasa, fo suek ana heti o, de kada o tungga o aom hihii-nanaun, fo tao manggalau kala. Te neu ko o mate.

¹³Ma o boso tao dedeꞌa ta ndoos, te salak ndia. Tehuu kada fee o ao-inam neu Manetualain, fo Ana heti o. Nonook leo o mate so, de o masoda fali. De pake o ao-inam tema-tema, fo tao dedeꞌa ndoos neu Manetualain.

¹⁴Boso ela salak bisa heti ei, sama leo salak dadik neu ei malanggam. Hatematak ia, ei boso masoda tao tungga Musa heti-heun fo ei bisa malole fali mia Manetualain. Te ei masoda no ndoos, huu Manetualain natudu Ndia dale malolen neu ei. De, hatematak ia, Ndia dale malolen heti ei.

¹⁵De, leobee? Fama ei duduꞌa mae, “Huu ita ta nanambaꞌak to Musa Heti-heun bali, de ita tao salak takandoo. Te Manetualain bei nau natudu Ndia dale malolen neu ita!” Ei duduꞌam leondiak hetu? Au afada ei baa! Sala ndia!

¹⁶Au haꞌi natutuduk neme malanggan no atan. Mete ma ei fee ei ao-ina heheli mala fo tao ues fee hataholi esa, na, ei musi mamanene ndia, ma tao ues tungga ndia hihii-nanaun. Huu ndia ndia, ei malanggam. Ma ei ia, ndia ata nala. Leondiak boe, de ei bisa hele fo tungga bee. Tehuu ei bisa hele fo tao salak, boe ma ei dadik salak atan. Tehuu mete ma ei hele leondiak, na ei tao ei aom dook mia Manetualain. Te ei bisa hele fo tao ndoos, ma dadik ata fo tao tungga hata fo Manetualain nadenu ei. Mete ma ei hele leondiak, na, ei bisa malole mia Ndia!

¹⁷Makahulun, na ei ela salak heti ei, tehuu hatematak ia, ei mamanene neu ei dalem dale, fo tao tungga hata fo hataholi salani kala ala lanoli ei. Huu ndia de au oke makasi neu Manetualain.