Rom 6:3-17

³Ositomli pogos nap̃a akee ita vena teve taaga temio Kristo Yesu. E poglis nene, ya nap̃a m̃alivin ita naga torokin ke ya nap̃a m̃alivin naga nanua rui. Sane nanua sumo naga mare wo kieta mlamulen viowa, ana nagane, pogos nap̃a akee ita, kieta malena marua na mlamulena viowa m̃ena lala monar mare.

⁴Sumo, amligan tasnena m̃ene lele na marena, ana nagane, pogos nap̃a akee ita, monar teligan kieta p̃elaga na mlamulena, top̃isin ruru nena ga. A nanua m̃ena sumo, Ntewa kila yum̃aena na iilanena nene, nap̃a kila Kristo sum̃alu mal sina, a nanagane, pogos nap̃a akee ita, tesum̃al sina temialoro e malena viu tai.

⁵Sanene, tepe taaga temio Kristo rui komin naga mligan kiena malena mare e yomarava nini, ana ita m̃ena ga monar teligan kieta malena marua. Ana tekiliar ruru sane yoko teve taaga si temio ke na wa, komin nap̃a naga p̃ar si kiena malena viu tai, a yoko ita m̃ena ga towar kieta malena viu.

⁶A monar tesitom̃al silaga, sane p̃elaga na kilaen mlamulen viowa nap̃a tepaeme temio, naga sa nap̃a asuar sike e lak torovia amio Kristo. Sanene, kila nap̃a ve tekila re si mlamulena viowa la nap̃a tasneta la sinelan kilaena, a mlamulena viowa tap̃atete kilia ve sup̃en kieta malena sape tepe kiena yar nayum̃aena ga.

⁷Popon top̃isin mlamulen piowa, nagane m̃areraena na sinenanen kilaena mlamulena viowa monar p̃isin ita, komin ita na sane yar mare nap̃a sitomena viowa na mlamulen viowa tap̃atete kila sur tai van ita.

⁸Lelaga kemua, nanua sumo, sa nap̃a temare temio Kristo rui, ana nagane, kieta lelagaena m̃arera sape yoko temal lue temio naga narui.

⁹Tekilia tesape Ntewa kila Kristo mal si petan marena, kila sane yoko Kristo mal m̃a vano-o yoko tap̃atete si mare pog tai, nam̃areraena na marena tap̃atete si kilia tol naga pogos tai.

¹⁰Kiena marena nanua ne, naga pe marena tai na war plan makeen nakoaena na mlamulen viowa, a kiena malena nagane, naga pe malena tai na visirluaen kia kiena ne Ntewa,

¹¹a yoko monar ve sa ga nene van ita. Monar tesitom̃alia tevisave ita m̃ena ga popon top̃isin ruru p̃elaga na mlamulen piowa, a silaga monar tevisirlua kia kiena ne Ntewa e malena viu nap̃a tesike ea temio Kristo Yesu.

¹²Sanene, kiau visena urmi e lele nene sanini, sane ve atam̃an re kiamiu sitomena la nakilaen mlamulena viowa imi ve sa nap̃a nam̃areraena m̃arera tai nap̃a sum̃a ve sup̃en amiu. Visae peraga, tasnemiu lala, nap̃a ape na yomarava ga nini, yoko asum̃a alogear ga nasinenanena viowa la na p̃elaga nap̃a ita yeririna la tepaeme temio.

¹³Ana sanene pe po re poli, komin lepas nen tasneta lala, pe pon re aim sane sur na yum̃aena nap̃a napiowaena miyum̃ae amio vena kilaen kiena p̃elaga viowa ne lala. Sumo, ita sane yar mare lala, nap̃a malena na Ninuna pe su re nena e ita, ana nagane Ntewa kila ita si temali, ana monar teyawawo kieta malena viu nene va si vania vena naga lavia vena kilaen kiena yum̃aena. Sanene, yoko lepas nen tasneta lala apim sane sur na yum̃aena nap̃a Ntewa miyum̃ae amio, vena kilaen kiena p̃elaga mesmesu lala.

¹⁴Sumo, tesike vatanon navisaluaena nap̃a Ntewa mla pa Mosis, amio kana nakoaena nena lala, ana ita top̃ion logearen pano-o, ana peraga, pe tetorokin re natolen kana natamaliaena poli. Sanene, Ntewa sinen miye ita a nagane sum̃a miila ita vena nasinenanena na kilaen mlamulen viowa tap̃atete nena uarar ita.

¹⁵Nepisa ke ga yam tai p̃isi ne nesape pe tesu re si vatanon navisaluaena nap̃a Ntewa mla pa Mosis poli, ana nemarau nesape pona yar lap̃asa amla kiau visena nene pa piowa yo. Pona asitom asape, “Ke, Pol pisape ita na pe tesu re vatanon navisaluaena poli, a nagane ita tekilia tekila ya nap̃a piowa nap̃a sinetania, tekila naga pogaga, ana yoko Ntewa sinen ye ita, viewo ita.” Ana peraga, pe nepisa re nena poli p̃isa.

¹⁶Monar asitom̃al sane pogos nap̃a yar tai sike vatanon sup̃e tai, monar logear sup̃e nena a monar imi sa nap̃a yar na yum̃ae kienaena tai. A ve sa m̃ena nene e kieta malena. Visae nasinenanena viowa sum̃a ve sup̃en kiom̃a malena, yoko monar okila mlamulena viowa la nap̃a naga sinenan sape okila. Ana visae kiom̃a sup̃e naga Ntewa, yoko osum̃a okila kiena yum̃aena wo lala. Mrapa lua nene, tai yoko kila ko omio Ntewa amlua aviap̃a lue, ana tap̃ena yoko kila ko omesmesu omio naga.

¹⁷Nanua sumo, amiu m̃ena yar na yum̃aena vatanon m̃areraena na kiamiu nasinenanena viowa ga lala, ana potena pap̃isi pa Ntewa nap̃a nepian amiu, ana amligan ruru sike e losinemiu lala, ataveve ruru e kiamiu malena lala.