Rom 6:3-17

³Pepetlai, ka mot tasmani lena, dat rop ra di baptaiso dat un o Karisito Iesu, dat mat tomo nami una baptais ra?

⁴Lenra, ra di baptaiso dat, dat mat tomo nami ma di por tomo dat kai nami. O God a Tamandat i ukatutur pas o Karisito gusun a minat nama minamarino, lenkutkai ra dat in laun nama matok na nilaun.

⁵Ra dat mat tomo nam o Iesu una nun a minat, i lingmulus dat in katutur tomo nami kai una nun a katkatutur melet gusun a minat.

⁶Uni dat tasmani lena, a turai na nilaun anundat i sa mat tomo nam o Karisito unin nanai kutus, sur a sakino petutna una pinindat katu dekdekino. Ma ka dat in tene ititula melet mo anun a sakino petutna.

⁷Uni osi ra i mat tomo nam o Karisito, i sa langolango gusun a sakino petutna.

⁸Ra dat mat tomo nam o Karisito, dat nurnur lena dat in laun utkai tomo nami.

⁹Uni dat sa tasmani lena, ra o Karisito i katutur melet gusun a minat, ken mat melet mo, uni a minat katu dekdekino mo sur in pam ukai i.

¹⁰I mat ara dino kut, sur in rakon rop ru a dekdekin a sakino petutna, ma ken mat melet mo. Ra i laun melet, i laun sur in mur a nemnem anun o God.

¹¹Lenkutkai ra, mot in nuk pas mot lena mot sa mat gusun anumot a kum sakino petutna, ma mot, ra tagun o Karisito Iesu, mot laun sur mot in mur a nemnem anun o God.

¹²I mo ra gong melet mo mot pitar a pinimot, ra i ser mat, sur in kis utuntudu ina dekdekin a sakino petutna, sur mot in mur a kum sakino nemnem ina pinimot.

¹³Gong melet mo mot pitar tar tu du pinimot sur in elar nama utna na pinapam sur a pam sakino. Mot in pitar tar mot torom o God, uni mot sa laun melet gusun a minat. Ma mot in pitar tar a kum du pinimot rop torom o God, sur in elar nama kum utna na pinapam sur a tokodos na pinapam.

¹⁴Ka mot in kis melet mo utuntudu ina dekdekin a sakino petutna, uni ka mot kis mo utuntudu ina kum Warkurai. Uniri mot sa kis utuntudu ina marmaris anun o God.

¹⁵Ka dat kis mo utuntudu ina kum Warkurai, dat kis utuntudu ina marmaris anun o God. Pepetlai, dat in pam melet a sakino petutna? Awu ut!

¹⁶Pepetlai, ka mot tasmani lena, ra mot pitar tar mot torom taio sur mot in longoro i, mot a kum tene ititula anunu? Ra mot a kum tene ititula anun a sakino petutna, in pitar a minat torom mot. Ikut, ra mot a kum tene ititula anun o God ma mot ser longoro i, mot tokodos umatano.

¹⁷A watung wakak torom o God, uni numugu mot a kum tene ititula anun a sakino petutna, ikut uniri mot mur a kum etowo nama balamot rop. A kum etowo ra di pitar tari tamot.