ሉቃሳ 22:3-53

³ፃላሄይ ታማኔ ናምዓታፔ ኢሱዋ ጊዲዳ ኣስቆሮታ ዪሁዳ ጌቴቴይሳ ጊዶ ጌሊስ።

⁴ዪሁዲ ካሂኔ ሃላቃታኮኔ ፆሳ ኬꬃ ናጌይሳታ ሃላቃታኮ ቢዲ ዬሱሳ ዋቲ ኣꬂ ኢማኔኮ ኤንታራ ማቄቲስ።

⁵ኤንቲካ ሄሳን ኡፋይቲዲ ሚሼ ኢማናው ኢያራ ዞሬቲዶሶና።

⁶ኢካ ዞሬቴꬃን ጊጊስ። ኣꬂ ኤንታው ኢማናው ኣሲ ባይና ኢንጄ ዎዴ ናጊሼ ዴዔስ።

⁷ሄሳፌ ጉዬ፥ ፋሲካ ዶርሳይ ሹኬቲያ ኡይꬃ ባሌይ ጋኪስ።

⁸ዬሱሲ፥ «ፋሲካ ካሁዋ ማና ሜላ ቢዲ ኑስ ጊጊሲቴ» ያጊዲ ጴፂሮሳኔ ዮሃኒሳ ኪቲስ።

⁹ኤንቲ፥ «ኑ ኣዉን ጊጊሳና ሜላ ኔ ኮያይ» ያጊዲ ኦይቺዶሶና።

¹⁰ኢ ኤንታኮ፥ «ሄኮ ሂንቴ ካታማ ጌሊሺን ሃꬃ ኦቶ ቶኪዳ ኣዴይ ሂንቴራ ጋሄታና። ኢ ቢዲ ጌሊያ ኬꬃ ኢያ ካሊዲ ጌሊቴ።

¹¹ኬꬃዋኮ ኣስታማሬይ፥ ‹ታ ታ ታማሬታራ ዎላ ፋሲካ ካሁዋ ማናው ኢማꬃ ኬꬂ ኣዉኔ? ያጊስ› ጊቴ።

¹²ኢ ፖቂያ ቦላ ሂፄቲዲ ጊጊዲ ዴዒያ ዳልጋ ኪፊሌ ሂንቴና ቤሳና፥ ያን ጊጊሲቴ» ያጊስ።

¹³ኤንቲ ቢዲ ዬሱሲ ጊዳይሳዳ ሃኒን ዴሚዶሶና። ፋሲካ ባሌ ካሁዋ ያን ጊጊሲዶሶና።

¹⁴ሳቴይካ ጋኪዳ ዎዴ ዬሱሲ ሃዋሬታራ ዎላ ካሁዋ ቦላ ኡቲስ።

¹⁵ኢ ኤንታኮ፥ «ታ ዋዬ ኤካናፔ ሲንꬄ ሃ ካሁዋ ሂንቴራ ማናው ዳሮ ኣሞታስ።

¹⁶ሂዛ፥ ሲዒቴ! ፆሳ ካዎቴꬃን ሃይሳስ ቢርሼꬃይ ፖሌታና ጋካናው ሃ ካሁዋ ዛራዳ ሚኬ» ያጊስ።

¹⁷ኡሻ ኤኪዲ ጋላቲ ሲሚዲ፥ «ሄዒቴ ሃይሳ ሂንቴ ጊዶን ሻኬቲቴ።

¹⁸ሲዒቴ! ፆሳ ካዎቴꬃይ ያና ጋካናው ሃቺፌ ዶማዳ ሃ ዎይኔ ኡሻፌ ዛራዳ ኡዪኬ» ያጊስ።

¹⁹ኡይꬃ ኤኪዲ፥ ጋላቲ ሲሚዲ፥ «ሃይሲ ሂንቴው ኢሜቲያ ታ ኣሹዋ። ሃይሳ ኦꬂሼ ታና ቆፒቴ» ያጊዲ ሜንꬂዲ ኤንታው ኢሚስ።

²⁰ሄሳዳካ፥ ካሁዋፔ ጉዬ ኡሻ ኤኪዲ፥ «ሃ ኡሻይ ሂንቴው ጉኪዳ ታ ሱꬃን ጊዲያ ኦራꬃ ጫቁዋ።

²¹ጊዶሺን፥ ታና ኣꬂ ኢማና ኡራ ኩሼይ ታራ ኢሲፌ ጋይታና።

²²ኣሳ ናዓይ ኢያው ጌቴቶይሳ ሜላ ሃይቃናው ዴዔስ፥ ሺን ኢያ ኣꬂ ኢሚያ ኡራ ኣዬ» ያጊስ።

²³ኤንቲ ባንታ ጊዶን፥ «ሃይሳ ኦኒ ኦꬃኔ» ጊዲ ዎሊ ኦይቺዶሶና።

²⁴ቃሲ ኤንታ ጊዶን ጊታ ጊዳናይ ኦኔ ጊያ ፓላሚ ሜꬌቲስ።

²⁵ዬሱሲ ኤንታኮ፥ «ዴሪያ ካዎቲ ባንታ ኣሳ ዎልቃን ሃሮሶና፤ ባንታ ዴሪያ ቦላ ጎዳቴይሳታስካ ባንታና፥ ‹ሎዖ ኦꬄይሳታ› ያጊዲ ፄጎሶና።

²⁶ሺን ሂንቴ ጊዶን ሄሳ ሜላ ጊዶፖ። ሂንቴ ጊዶን ባይራቴይ ካሎዳ ሃኖ፤ ካሌꬄይሲ ካሌይሳዳ ሃኖ።

²⁷ሃኖሺን፥ ሞኬይሳፌኔ ሞኬቴይሳፌ ኣዉሲ ኣꬊ? ሞኬቴይሳ ጊዴኔዬ? ሺን ታኒ ሂንቴ ጊዶን ሞኬይሳ ሜላ።

²⁸«ሂንቴካ ታ ሜቱዋን ታፔ ሻኬቶና ታራ ሚኒዲ ኤቂዳይሳታ።

²⁹ሂንቴ ታ ጋይታፔ ማና ሜላ፥ ኡያና ሜላኔ ኣራታታ ቦላ ኡቲዲ ታማኔ ናምዑ ኢስራዔሌ ሼሻታ ቦላ ፒርዳና ሜላ ታ ኣዋይ ታና ሹሚዳይሳዳ ታካ ሂንቴና ታ ካዎቴꬃን ሹማና» ያጊስ።

³¹ካሊዲካ ዬሱሲ፥ «ሲሞና፥ ሲሞና፥ ፃላሄይ ሂንቴና ጊስቴዳ ሃርቃናው ዎሲስ።

³²ሺን ታኒ ኔ ኣማኖይ ꬋዮና ሜላ ኔው ጋናታስ። ኔካ ሲሚዳ ዎዴ ኔ ኢሻታ ሚንꬃ» ያጊስ።

³³ሲሞኒ፥ «ጎዳው፥ ታኒ ኔራ ቃሼታናዉኔ ሃይቃናው ጊጌታስ» ያጊስ።

³⁴ዬሱሲ ጴፂሮሳኮ፥ «ታ ኔው ኦዳይስ፤ ሃቺ ኩቶይ ዋሳናፔ ሲንꬄ ኔ ታና ሄꬑ ቶሆ ካዳና» ያጊስ።

³⁵ካሊዲካ፥ ዬሱሲ ኤንታኮ፥ «ታኒ ሂንቴና ኮሮጆይ፥ ካርፂቴይኔ ጫሚ ባይና ኪቲዳ ዎዴ ሂንቴው ፓጪዳባይ ዴዒ?» ያጊዲ ኦይቺስ። ኤንቲ ዛሪዲ፥ «ኣይኮይካ ፓጪቤና» ያጊዶሶና።

³⁶ኢ ኤንታኮ፥ «ሃዒ ኮሮጆይኔ ካርፂቴይ ዴዔይ ኦይኮ፤ ማሺ ባይናይ ባ ኣፊላ ባይዚዲ ማሻ ሻሞ።

³⁷ሃ ሲዒቴ! ‹ጌላታራ ታይቤቲስ› ጌቴቲዲ ፃፌቲዳይሲ ታናን ፖሌታናው ቤሴስ። ኤ፥ ታ ጊሾ ፃፌቲዳባይ ፖሌቴይሲ ቱማቲስ» ያጊስ።

³⁸ኢያ ታማሬቲ፥ «ጎዳው ሃይሳን ናምዑ ማሺ ዴዔስ» ያጊዶሶና። ኢ፥ «ጊዳና» ያጊስ።

³⁹ዬሱሲ ካሴ ሜዜቲዳይሳዳ ዴንዲዲ ሻማሆ ዴሪያ ቦላ ኬዪስ። ኢያ ታማሬቲ ኢያ ካሊዶሶና።

⁴⁰ሄ ቤሳ ጋኪዳ ዎዴ «ፓጬን ጌሎና ሜላ ዎሲቴ» ያጊስ።

⁴¹ኤንታፌ ሹቺ ሆሊን ጋኪያ ሶ ሜላ ሃኪዲ ጉልባቲዲ ዎሲስ።

⁴²«ታ ኣዋው፥ ኔ ሼኔ ጊዲኮ ሃ ሜቱዋ ታፔ ኣꬃ። ሺን ታ ሼኔ ጊዶፖ ኔ ሼኔይ ሃኖ» ያጊዲ ዎሲስ።

⁴³ኪታንቾይ ሳሎፔ ቆንጪዲ ሚንꬂስ።

⁴⁴ዳሮ ኡንዔቲዲ ሚንꬂዲ ዎሴስ። ኢያ ጫዋይካ ሱꬂ ፆኪያዳ ሳዓን ፆኬስ።

⁴⁵ዬሱሲ ዎሳ ዉርሲዲ ባ ታማሬታኮ ዪስ። ኤንቲ፥ ኣዛኒያፔ ዴንዶይሳን ዳቡሪዲ ꬊስኪዳሺን ዴሚዲ፥

⁴⁶«ኣይስ ꬊስኬቲ? ፓጬን ጌሎና ሜላ ዴንዲዲ ዎሲቴ» ያጊስ።

⁴⁷ኢ ቡሮ ኦዳ ቦላ ዴዒሺን ዳሮ ኣሳቲ ዪዶሶና። ታማኔ ናምዓታፔ ኢሶይ ዪሁዳ ጌቴቴይሲ ኤንታና ካሌꬄስ። ኢ ዬሱሳ ዬራናው ማቲ ሺቂስ።

⁴⁸ሺን ዬሱሲ፥ «ዪሁዳ፥ ኣሳ ናዓ ዬራዳ ኣꬃ ኢማኔ?» ያጊስ።

⁴⁹ዬሱሳ ታማሬቲ ሄ ሃኑዋ ቤዒዲ፥ «ጎዳው ማሻን ሾጪኖ?» ያጊዶሶና።

⁵⁰ኤንታ ጊዶፌ ኢሶይ ካሂኔ ሃላቃ ኦሳንቹዋ ሾጪዲ ኡሻቻ ሃይꬃ ቃንፂዲ ዬጊስ።

⁵¹ሺን ዬሱሲ፥ «ኣጋ! ዲጎፊቴ» ያጊስ። ኡራ ሃይꬃ ቦቺዲ ፓꬂስ።

⁵²ሄሳፌ ጉዬ፥ ዬሱሲ ባና ኦይካናው ዪዳ ካሂኔ ሃላቃታኮ፥ ፆሳ ኬꬃ ናጌይሳታ ሹማታኮኔ ጪማታኮ፥ «ፓኖ ኦይኪያ ኣሳዳ ማሼኔ ፃምዓ ኦይኪዲ ዪዴቲ?

⁵³ኡባ ጋላስ ፆሳ ኬꬃን ታ ሂንቴራ ዴዒያ ዎዴ ታ ቦላ ኩሼ ዎꬂቤኬታ። ሺን ሃይሲ ꬉማ ካዎቴꬃይ ሃሪዳ ዎዴኔ ሂንቴ ዎዴ» ያጊስ።