ሉቃሴ 22:3-53

³ዬማና ታጶ ላምዖንሢዳፓ ፔቴ''ሢ ማዔ፥ ዓስቆሮንቶ ዓጮ'' ዓሢ፥ ዪሁዳይዳ ፃላሄ ጌሌኔ።

⁴ዬያሮ ዪሁዳ ቄኤሶኮ ሱኡጎና ጌኤዦ ማኣሮ ካፓ ዓሶ ዓይሣዞንሢ ኮይላ'' ዴንዲ ዬሱሴ ዎዲ'' ዓኣሢ ዔያቶም ዒንጋንዳቴ ዔያቶና ዎላ'' ጌስቴኔ።

⁵ዔያታ ዒ ኬኤዜ ባኮና ዎዛዺ ሚኢሼ ዒዛም ዒንጋኒ ዎላ'' ጌስቲ ጊኢጌኔ።

⁶ዔያታ ጌስቲ ጊኢጌስካፓ፥ ዴራ'' ዔሩዋንቴ ዒዚ ዬሱሴ ዓኣሢ ዒንጋኒ ጊኢጋ ዎዴ ኮዓኔ።

⁷ዬካፓ ዑሣ ዓኣዺፆ ቦንቾሮ ማራቶ ሹኪ፥ ላኣዶዋ ሙዒ ቦንቾ ኬላ'' ሄሌ''ኔ።

⁸ዬሱሴ፦ «ዑሣ ዓኣዺፆ ቦንቾ ኬሎ'' ካዋሢ ኑ ሙዓንዳጉዲ ዴንዲ ኑም ጊኢጊሹዋቴ» ጌዒ ጴፂሮሴና ዮሓኒሴና ቤርታ ዳኬኔ።

⁹ዔያታ ማሃዖ፦ «ዑሣ ዓኣዺፆ ቦንቾ ኬሎ'' ካዎ ዎካ ኑ ጊኢጊሻንዳጉዲ ኔ ኮዓይ?» ጌይ ዒዛ ዖኦጬኔ።

¹⁰ዒዚያ ዔያቶም፦ «ዴንዲ ካታሞ ዒንሢ ጌላኣና ዒኢካ ዋኣሢ ጉሲ ኬዴ ዓሲ ዒንሢና ካኣማንዳኔ፤ ዒዛ ጊንፆ ዓኣዺ፥ ዒ ጌላ ማኣሮ ጌሉዋቴ።

¹¹ማኣሮ ዓዶ ኮራ ኑና ዔርዛሢ ‹ታኣኮ ጊንፆ ሃንታዞንሢና ዎላ'' ዑሣ ዓኣዺፆ ቦንቾ ኬሎ'' ካዎ ታ ዴዒ ሙዓንዳ ቤዛ ዎካዳይ? ኔና ጋዓኔ› ጎውዋቴ።

¹²ዒዚያ ኩቦ ጋራ ዓኣ ሂኢሢንቲ ጊኢጌ፥ ዳልጎ ቤዞ ዒንሢ ዻውዋንዳኔ፤ ዒኢካ ጊኢጊሹዋቴ» ጌዔኔ።

¹³ላምዖ ዒዛኮ ጊንፆ ሃንታዞንሢ ዴንዲ ቢያ ባካ ዬሱሴ ዔያቶም ጌዔሢጉዲ ማዔም ዴንቃዖ ዑሣ ዓኣዺፆ ቦንቾ ኬሎ'' ካዎ ዒኢካ ጊኢጊሼኔ።

¹⁴ዒማ''ና ካዎ ሙዖ ዎዳ'' ሄላ''ዛ ዬሱሴ ዳኪንቴዞንሢና ዎላ'' ሙዓኒ ዴዓዖ፦

¹⁵«ታኣኒ ሜታሢ ዔካንዳሢኮ ቤርታ ዒንሢና ዎላ'' ሃያ ዑሣ ዓኣዺፆ ቦንቾ ኬሎ'' ካዋሢ ሙዓኒ ሚርጌና ኮዔኔ፤

¹⁶ሃያ ባኮኮ ዓኣሺንቴ ጎኑማ ፆኦሲ ካኣቱሞይዳ ጌኤሽኪ ዔርታንዳያ ሄላ''ንዳኣና ሃይካፓ ሴካ ሃኖ' ዑሣ ዓኣዺፆ ቦንቾ ኬሎ'' ካዎ ፔቴ''ታዖ ታ ሙዒንዱዋያታሢ ዒንሢም ታ ኬኤዛኔ» ዔያቶም ጌዔኔ።

¹⁷ዬካፓ ዬሱሴ ዑሽኮ ባኮ ዔኪ ጋላታ ሺኢጲሢ ሺኢቃዖ፦ «ሃቦቴ፥ ሃያ ዎሊ ሄሊ''ሱዋቴ፤

¹⁸ጎኔ ታ ዒንሢም ጋዓኔ፤ ሃይማፓ ዓርቃዖ ፆኦሲ ካኣቱማ ሙካንዳያ ሄላ''ንዳኣና ሃያ ዎይኖ ዓኣፖ ዑዣፓ ታ ዑሽካዓኬ» ጌዔኔ።

¹⁹ሄሊ''ሳዖ ዬሱሴ ካሦ ዔኪ ጋላታ ሺኢጲሢ ሺኢቂ፥ ቡንፃዖ ጊንፆ ሃንታዞንሢም፦ «ሃቦቴ፥ ሃይ ዒንሢም ዒንጊንታሢ ታናኬ፤ ሃያ ዒንሢ ታና ማሊ ጶቂሣ ባኣዚ'' ማሁዋቴ» ጌዒ ዔያቶም ዒንጌኔ።

²⁰ዬያጉዲ ካሦ ሙዔስካፓ ዑሽኮ ባኮ ዔኪ ዒንጋዖ፦ «ሃይ ዑሽኮ ባካ ዒንሢም ላኣሊንታንዳ፥ ታ ሱጎፆና ኩማንዳ ዓኮ ጫኣቃሢኬ።

²¹«ጋዓንቴ ታና ዓኣሢ ዒንጋሢ ሃሢ ታኣና ዎላ'' ጎንጋፓ ካሦ ዔኪ ሙዓኔ።

²²ዓሲኮ ናዓሢ ዒዛ ዛሎ'' ቤርታዺ ማሊንቴ ጎይፆና ሃይቁዋዖ ዓታዓኬ፤ ጋዓንቴ ዓሲኮ ናዓሢ ዓኣሢ ዒንጋ ዬያ ዓሢም ባዴዔ!» ጌዔኔ።

²³ዒዛኮ ጊንፆ ሃንታ ናኣታ''፦ «ኑ ባኣካ''ፓ ዬያ ማዻንዳሢ ዖናዳይ?» ጌይሢና ዎሊ ሴካና ሃንጋና ዖኦጬኔ።

²⁴ሄሊ''ሳዖ ዔያታ፦ «ኑጊዳፓ ቢያ ባሼሢ ዖናዳይ?» ጌዒ ዎላ'' ማርሞ ዓርቄኔ።

²⁵ዬሱሴ ጋዓንቴ፦ «ሃያ ዓጮ'' ካኣቶ''ኮ ዴሮ'' ዑፃ ቢታንቶ ዓኣኔ፤ ሃሣ ዎይሣ ዓሳኣ ዴሮ''ም ኮዦ ማዻ ዓሶ ጌይንታኔ፤

²⁶ዒንሢ ጋዓንቴ ዔያቶጉዲ ማዓንዳያ ኮይሱዋሴ፤ ዬያይዳፓ ዒንሢ ባኣካ'' ቶይዲ ማዓሢ ጌኤዚ''ጉዲ ማዖንጎ፤ ዓይሢ ማዺሻያ ማዔሢያ ማዻሢጉዲ ማዖንጎ።

²⁷ሙዖ ዴዒ ሙዓሢና ዔቂ ሙኡዛሢናይዳፓ ዎያዳይ ዼኤፓሢ? ዼኤፒ ጌይንታሢ ዴይ ሙዓሢቱዋዓዳ? ታኣኒ ጋዓንቴ ዒንሢኮ ባኣካ'' ዓይሢንቲ ማዻሢ ጉዴያኬ።

²⁸«ዒንሢ ታኣኮ ሜታሢ ዎዶ''ና ቢያ ታኣና ዎላ'' ዶዲ ዴዔኔ።

²⁹ዬያሮ ታ ዓዴ ታ ማዾ''ም ቢታንቶ ታኣም ዒንጌሢጉዲ ታኣኒያ ዒንሢም ቢታንቶ ዒንጋንዳኔ።

³⁰ታኣና ዎላ'' ታ ካኣቱሞይዳ ሙዖ ቤዛ ዒንሢ ዴዒ ሙይ ዑሽካንዳኔ፤ ዎጎ ዎጎ ቤዞይዳኣ ዴዒ፥ ታጶ ላምዖ ዒስራዔኤሌኮ ፃጶ ዑፃ ቢታንቶ ዔኪ ዒንሢ ዎጋንዳኔ» ጌዔኔ።

³¹ሄሊ''ሳዖ ዬሱሴ፦ «ሲሞኦኔ! ሃኣዛጌ፤ ጎሽካ ዓሢ ዛርጋሢ ዓኣፖ ዲልባፓ ሶኦሪ፥ ጌኤሺ ዱማሳሢጉዲ ፃላሄ ዒንሢ ሶኦሪ ዛጋኒ ዒናፓ ሱኡካዺ ማሌኔ።

³²ጋዓንቴ ኔኤኮ ጉሙርቂፃ ባይቁዋጉዲ ታ ዓዶ ታ ሺኢቄኔ፤ ኔኤኒያ ኔ ዻቢንቶ ዔሪ ታ ባንሢ ማዔ ዎዶ''ና ኔ ዒሾንሢ ዶዲሼ» ጌዔኔ።

³³ጴፂሮሴ ማሃዖ፦ «ጎዳሢዮ! ቱኡሲም ማዔቶዋ ሃሣ ሃይቢም ታኣኒ ኔኤና ዎላ'' ዓኣዻኒ ጊኢጊንቴያኬ!» ጌዔኔ።

³⁴ዬሱሴ ጋዓንቴ ዒዛም፦ «ጴፂሮሴ፥ ሃኖ'' ኮይዳ ቂኢቁዋንቴ ሃይሢ ማይንቲ ‹ታ ዒዛ ዔሩዋሴ› ኔ ጋዓንዳኔ፤ ታ ኔኤም ጋዓኣኬ» ጌዔኔ።

³⁵ዬካፓ ዬሱሴ ፔኤኮ ጊንፆ ሃንታ ናኣቶ'' ኮራ፦ «ሚኢሼ ዓርቆ ቡራሻ፥ ጋላ ዔኮ ሉካ''፥ ዱርሲያ ዒንሢ ዔኩዋንቴ ታ ዒንሢ ዳኬ ዎዶ''ና ዒንሢም ፓጬ ባኣዚ'' ዓኣ?» ጌዔኔ። ዔያታኣ ማሃዖ፦ «ዓይጌያ ፓጬ ባኣዚ'' ኑም ባኣሴ» ጌዔኔ።

³⁶ዬሱሴ ዔያቶም፦ «ሃሢ ዓካሪ ሚኢሼ ዓርቆ ቡራሻ ማዔቴያ፥ ጋላ ዓርቆ ሉካ'' ዓኣሢ ዬያ ፔኤኮ ዔኮንጎ፤ ጬንቻ ዓፓሮ ባኣሢያ ማኣዓሢ ፔኤኮ ሻንቺ ጬንቻ ዓፓሮ ሻንቆንጎ።

³⁷‹ፑርቶ ዓሶና ዎላ'' ፓይዲንቴኔ!› ጋዓ ማፃኣፖ ቃኣላ'' ታ ጊዳ'' ኩማንዳያ ኮይሳኔ፤ ታ ዒንሢም ጋዓኣኬ፤ ዓይጎሮ ጌዔቶ ታ ዛሎ'' ቤርታዺ ፃኣፒንቴሢ ቢያ ኩማኒ ኮይሳሢሮኬ» ጌዔኔ።

³⁸ዒዛኮ ጊንፆ ሃንታ ናኣታ''፦ «ጎዳሢዮ! ሃይሾ ሃይካ ላምዖ ጬንቻ ዓፓሮ ዓኣኔ!» ዒዛም ጋዓዛ፥ ዒዚ «ጊዳንዳኔ» ዔያቶም ጌዔኔ።

³⁹ዬሱሴ ካታሞይዳፓ ኬስኪ ቤርታ ማዻሢጉዲ ዛይቶ ሪሚቶ ዹኮ'' ዴንዴኔ፤ ዒዛኮ ጊንፆ ሃንታ ናኣታ''ኣ ዒዛና ዎላ'' ዓኣዼኔ።

⁴⁰ዒኢካ ዔያታ ሄላ''ዛ ዬሱሴ፦ «ዻቢሻ ጌሺሢዳ ዒንሢ ጌሉዋጉዲ ሺኢቁዋቴ» ጌዔኔ።

⁴¹ዬካፓ ሹቺ ዹዔም ሄላ''ንዳጉዴ ቤሲዳ ዔያቶይዳፓ ሃኪ ዴንዳዖ ጉምዓቲ፦

⁴²«ዓዳሢዮ! ኔ ማሊሢ ማዔቶ ሃያ ሜታሢ ታ ጊዳ''ፓ ሃኪሴ፤ ጋዓንቴ ታ ማሊፆጉዲቱዋንቴ ኔ ማሊፃ ኩሞንጎ» ጌዒ ሺኢቄኔ።

⁴³ዒማ''ና ዒዛ ዶዲሻ ኪኢታንቻሢ ጫሪንጮይዳፓ ሙኪ ዒዛም ጴዼኔ።

⁴⁴ዒና'' ዒዛኮ ሚርጌና ሜታዼም፥ ኮሺ'' ዶዲ ሺኢጲሢ ዒ ሺኢቃኔ፤ ዬማና ጮጋጫ ዒዛኮ ሱጉሢ ማሊ ሳዓ ፆዻኔ።

⁴⁵ሺኢጲፆይዳፓ ዒ ዔቂ ጊንፆ ሃንታዞንሢ ባንሢ ሙካንቴ ዔያታ ሚርጌና ዖዪፆይዳፓ ዔቄያና ላቢ'' ጊንዒ ዓኣንቴ ዛጋዖ፦

⁴⁶«ዓይጎሮ ዒንሢ ጊንዓይ? ዬያይዳፓ ዻቢሻ ጌሺሢዳ ዒንሢ ጌሉዋጉዲ ዔቂ ሺሺኢቁዋቴ» ዔያቶም ጌዔኔ።

⁴⁷ዬሱሴ ዬያ ኬኤዛ ጎይሣ ዓኣንቴ ዒማ''ና ሚርጌ ዓሲ ሙኬኔ፤ ዬያ ዓሶ ዔኪ ሙኬሢ ታጶ ላምዖንሢዳፓ ፔቴ''ሢ ማዔ፥ ዪሁዳኬ፤ ዒዚያ ዬሱሴ ሄርቃኒ ዬሱሴ ባንሢ ዶጬኔ።

⁴⁸ዬሱሴ ጋዓንቴ፦ «ዔዞ፥ ዪሁዳ! ዓሲኮ ናዓሢ ሄርቂሢና ዓኣሢ ኔ ዒንጋ?» ጌዔኔ።

⁴⁹ዬሱሴና ዎላ'' ዓኣ ጊንፆ ሃንታዞንሢ ዬያ ዛጋዖ፦ «ጎዳ! ዓፓሮና ኑ ዔያቶ ቆፆ''ንዶ?» ጌዔኔ።

⁵⁰ዔያቶይዳፓ ፔቴ''ስኬይ ቄኤሶ ቢያኮ ሱኡጋሢም ዓይሢንቲ ማዻሢኮ ሚዛቆ ዋዮ ዓፓሮና ቆፂ'' ቲቄኔ።

⁵¹ዬሱሴ ጋዓንቴ፦ «ማይ ጊዴኔ! ሃሼ''!» ጋዓዖ፥ ዓሢኮ ዋዮ ኩቻ ዓርቂ ካንሢ ፓሤኔ።

⁵²ዬካፓ ዬሱሴ ዒዛ ዓርቃኒ ሙኬዞንሢና ቄኤሶኮ ሱኡጎና ሓሣ ጌኤዦ ማኣሮኮ ዓይሣዞንሢና ዴሮ''ኮ ጪሞና ኮራ፦ «ታና ዒንሢ ሱላጉዲ ዓርቃኒ ጬንቻ ዓፓሮና ኮኦሎ''ና ዔኪ ሙኪያ?

⁵³ቢያ ኬሊ'' ጌኤዦ ማኣሮይዳ ዒንሢና ዎላ'' ታ ዓኣንቴ ዒንሢ ታና ዓርቂባኣሴ፤ ሃሢ ጋዓንቴ ዒንሢና ዹማሢናኮ ቢታንቶ ዎዶ''ኬ» ጌዔኔ።