San Lucas 22:3-53

³Ábati lagáñeiruni Máfia larítagun Júdas Iscarióte, le ában jádaangiñe láni Jesúsu dúusu apóstolugu,

⁴ába lídin adǘga darádu jáma jábutigu jafádiriñegu juríu jáma jábutigu tisúdaarana témpulu lun ledéregeruni Jesúsu joun.

⁵Ába jagúndaaragun, ába jaríñagun lun Júdas luágu jíchuguba lan seínsu lun,

⁶ába lañúurun darádu, ába lagúmeserun áluaja ída lúba lan gayára lan ledéregeruni joun dánme le úa jamá gürígia.

⁷Ába lachǘlürün fédu le ídaanbei teigúa fein magánatu ísi, ñí lubei gíñe ladágarawagüdǘwa mudún le lánina fédu.

⁸Ába laríñagun Jesúsu lun Pédro lúma Juan. —Jeíba aráanserei eígini le lánina fédu.

⁹Ába jálügüdüni. —¿Jalíagi babúseera waráanseruni?

¹⁰Laríñaga joun. —Dánme le jebélurun ubúrugun, jadúnraguba lúma ában wügǘri táu ában dináa láu dúna, jafálareime chülǘ tídoun múna to ñíjin lumúti lebélura.

¹¹Jaríñagame lun tabúreme múna. “Laríñajare Maésturu. ¿Jigóun rúmu to ñí lubei gayára lan neígini eígini le lánina fédu jáu náni disípulugu?”

¹²Ábame larúfudun ában rúmu weíritu jun toúgiñegua múna, aráanseñu tíña, jaráansereime eígini ñi.

¹³Ába joúdin, ába jadáriruni sun cátei quei laríñaguni Jesúsu joun, ába jaráanseruni eígini lánina fédu ñi.

¹⁴Dan le lachǘlürünbei óra, ába lañúurun Jesúsu jáu láni disípulugu luágu dábula,

¹⁵ábati laríñagun joun. —¡Oúnwenbun nabúseerun neígini eígini lánina fédu le júma lubáragiñe noúnwen!

¹⁶Ladǘga naríñajare jun luágu meígindügüya náali lan eígini lánina fédu le daríme lagúnfulirún laníchigu lídan larúeijan Búngiu.

¹⁷Ábati lanǘgün ában wéru táu diweín lújaburugu, ába leteíngiruni Búngiu, laríñaga. —Barǘjumei le, fánreingua jumeí jídaangua,

¹⁸naríñajare jun luágu mátundügüyaadina lan diweín daríme liábin larúeijan Búngiu.

¹⁹Lárigiñe, ába lanǘgünun fein lújaburugu, ába leteíngiruni Búngiu tuágu, ába lagúbachagunun, ába líchugunun joun, aríñageina. —Núgubu le, le lúnbei ledéregerún juágu. Lúmagiñe guetó, adǘga jumeí le, jarítaguagüleme nuágu.

²⁰Ítara meme gíñe, lárigiñe jeígin, ába lanǘgüni wéru táu diweín, ába laríñagun. —Niján níta le lúnbei láwiyurun lídaangiñe núgubu juágu, lun lañúurun iséri darádu.

²¹‘Niján wügǘri le lúnbei ledéregerunina wáma ya luágu dábula,

²²luáguñadina ǘma le lúnbei nanǘgüni, áu le Wügǘri Garaǘwarügüti, áni ¡fugiábutia wügǘri le lúnbei lalúgurunina!

²³Ábati jagúmeserun álügüdagua jádaangua cába lánfuna alúgurei.

²⁴Ába jasígenejan lánigu luágu cába lan jádaangiñe weírigutimá.

²⁵Ába laríñagun Jesúsu joun. —Lídan arúeijani lánina uboú le, agúmadijatiña já buri lurúeitena fulásu, camá jamuga labúreme jagía, já buri lábutigu fulásu, aríñawagúati jawágu luágu wügǘriña jamá ja gadǘgatiña fuleísei joun gürígia.

²⁶Ánjein lídan narúeijan, mítaraanti, lubáragiñe líra, le weírigutimaabei le tímatimaati jídan lúnti lanáangun lúngua quei le ǘnabutimaabei, le agúmadijabei, lúnti ítara lan quei le esériwijabei.

²⁷¿Cági weírigutimaabei, le añúurubei eíga luágu dábula, ódi le esériwijabei? ¿Ma le añúurubei luágu dábula? Áni áu, ítara níña jídan quei le esériwijabei.

²⁸‘Jugúya úarabañája núma lídan noúchawagun,

²⁹ligía níchugunbadün lun jarúeijan quei líchugunina Núguchi lun narúeijan.

³⁰Jeígiba, gurá jugúyame luágu nidábulan yágüta siélu lídan narúeijan, ñurú jugúyame luágu buri lála urúei lun jagúseragüdüniña jadǘgawagun dúusu lirájüñü Israél.

³¹Aríñagati gíñe Wabúreme Jesúsu. —Simón, Simón, amúriajaali Máfia ǘma lúma Búngiu lun gayáraabei lan loúchagunün quei lawánijoún türígu,

³²ibíja lumúti, áni ayúmuraguaadina buágu lun Búngiu lun meféridirun báani bafíñen nuágu lídaanme óra ligía. Áni dánme le bagíribudun nun, rúba dǘgüdaguaü joun bíbirigu.

³³Laríñaga Simón lun. —Nabúreme, aráansetina lun nídin búma furísunrugun, o lun lan noúnwen búma.

³⁴Laríñaga Jesúsu lun. —Pédro, ugúñe méme, beyéedaguba náu ǘrüwa weíyaasu lubáragiñe layúgurujan gáyu, baríñaguba luágu ibídiñe nan bun.

³⁵Ábati laríñagun Jesúsu joun. —Dan le noúnajanbalün maságüteiga, ni láu lágei seínsu, ni geídi, ¿ñíñein funági jemégeirun? Ába jaríñagun. —Uá Maésturu, memégeiruntiwa ni cáta.

³⁶Ábati laríñagun joun. —Ánjeinti guetó, le gaságüteti, barǘloun, barǘ ligíame lágei seínsu, le mefeínteti, alúguraloún labíte lun lagáñijan lefeínte, ladǘga wuríbati dan le.

³⁷Naríñajare jun luágu lagúnfuliruba lan le taríñagubei Lerérun Búngiu nuágu. “Ába jabájüdüni jádan wuríbatiña.” Sun le bürǘwañubei nuágu lagúnfuliruña guetó.

³⁸Ábati jaríñagun. —Wabúreme, nuján bián efeín ya. Ába laríñagun joun. —Buíti.

³⁹Ábati láfuridun Jesúsu, ába lídin luágun wǘbü le Olívos quei ligáburiñaja, ába joúdin láni disípulugu lúma.

⁴⁰Dan le jachǘlürün lídan fulásu ligía, ába laríñagun joun. —Jayúmuragua, meféridirun jumámugei jafíñen nuágu.

⁴¹Ába ladísedun Jesúsu jaweí murúsunraü, ába lájuduragun ayúmuragua lun Búngiu,

⁴²laríñaga. —Núguchi, ánjabu busén, séfu bána lueí oúnwenbun asúfuriruni le lúnbei nasúfurirun, madügǘwalá le nabúseerubei, le la babúseerubei adügǘwa.

⁴³Ábati liábin ában ánjeli siélugiñe lun líchugun érei lun.

⁴⁴Dan létima laweíridun ligárigu, ligíatima layúmuragun láu érei, lédedejati lísüga lueí camá jamuga oúnwenbun lédedejan jítaü, múarugun.

⁴⁵Dan le lásaarun lídaangiñe layúmuragun, ába ladáriruniña disípulugu arúmuga, larúmagüdün íruni.

⁴⁶Ábati laríñagun joun. —¿Ca uágu jarúmuga? Sarájuma, jayúmuragua, meféridirun jumámugei jafíñen nuágu.

⁴⁷Ñígili Jesúsu adímureja, ligía jayábin sarágu gürígia, Júdas, le ában jádaangiñe dúusu disípulugu, jabá jabá. Aba layárafadun lun Jesúsu lun lachúuruni.

⁴⁸Ábati laríñagun Jesúsu lun. —Júdas, ¿láu ában chúuti balúgurana, áu le Wügǘri Garaǘwarügüti?

⁴⁹Játi lúmabaña Jesúsu, dan le jaríjinbalin cába lan asúsereda, ába jaríñagun lun. —Wabúreme, ¿ageíndagua wamáña táu efeín?

⁵⁰Ába lánchuguni ában jádaangiñe lánigu Jesúsu larígei lumúsun fádiri íñutimaati, le loúnwenren.

⁵¹Ába laríñagun Jesúsu. —Ígira jumáña, buídurügaali. Ábati lagúruruni Jesúsu larígei músu ligía, ába lareídagun.

⁵²Ába laríñagun joun jábutigu fádirigu, joun wügǘriña weírigutiña lídan jafíñen juríu, lúma joun jábutigu tisúdaarana témpulu, ja ñǘbinbaña anǘgei. —¿Jiábin nuágu táu efeín lúma wéwe camá jamuga jíwerutina?

⁵³Dan lé meja júma nan témpulurugu ságü wéyu, magúrugubeitün nuágu, wel, niján jidáani lun jadǘgüni jugúndan náu, óraali lun lagúmadijan le labúremebei lubúriga.