1गे नु बाक्ब कामी हेंथे पाप्तु देंशो लोव़ नेंता। मोदेंशो पात्के अर्को रागी ङा मुर आन दातेमी यो मबाक्ब। मुर कामी आ आफ आ मीश वोंइसाक्व, देंशो लोव़ नेंता। लेवी १८:८
2मिनु मुल सम्म ठेयब लेश्शा बाक्नीनी? मोदेंशो पशो तशा, इन थुं मखाइक्नीनी? मोदेंशो पाइब कली तिल्चा माल्नीनी। १कोरिन्थी ४:६-८
3इन दातेम मबाक्ती हना यो, आं थुं गेपुकी नु काथा बाक्शो खोदेंशो पा, मेको मुर कली येसु ख्रीस्त आ नेंमी निसाफ पने थुम्ता। कलस्सी २:५
4गे नेल्ल प्रभु येसु आ नेंम ग्रुम्शो बाक्तीनी हना, आं थुं गे नु बाक्त हना, इं प्रभु येसु ख्रीस्त आ सक्तिम मत्ती १६:१९; मत्ती १८:१८; २कोरिन्थी १३:३०
5मेको मुर कली सैतान आ गुइम गेचा माल्नीनी। मेको आ रां खतम दुम्त हना यो, प्रभु आ निसाफ नाक्तीमी ब्रोंइचा तवल। १तिमोथी १:२०
6इन ठेयब लेश्शो रिम्शो ममाइ। इम्चीली डल्ला का बोरपाइक्ब ओख्तीमी फस नेल्ल ङाम्शा, बोरब दे मतुइक्नीनी? गलाती ५:९
7मेको माइत बोरपाइक्ब ओख्ती ताइक्तीने। गे मारेइ मसुप्शो फस खोदेंशो दुम्शा, नक दुम्शो बाक्नीनी। मारदे हना आंइ पास्सा चाड ङा क्योरशो पाठा ख्रीस्त बाक्ब। प्रस्थान १२:३-२०; प्रस्थान १३:७; यसैया ५३:७; १पत्रुस १:१९
8मोपतीके माइत बोरब ओख्ती मसुप्शो फस खोदेंशो दुम्शा, मरिम्शो थुं पाइश्शो गेय पचा प्रोंइशा, नक मुर दुम्शा, पास्सा मानेय।
9इन कली ङोंइती ब्रेक्शो चिठीमी “पात्के पाइब नु काथा बाक्चा मदुम्ब” दे ब्रेक्ताक्न्नी।
10आं देंशो मार बाक्त देंशा हना, रागी ङा पात्के नु तेल्लेम पाइब, शिंम पाइब, खुइ पा रोइश्शा गाक्ब, मूर्ति कली पूजा पाइब नु काथा बाक्चा मदुम्ब, दे मशेंदन्नी। मोदेंशोपुकी नु काथा बाक्चा मदुम्ब हना दा, रागीमी ते बाक्चा ङा?
11तन्न थमा सुइश्शा प्रभु आ मुर दुम्ती देंब लोक्बम पात्के पा तेल्लेम पा, शिंम दुम्शा, मूर्ति पूजा पा, शुक्शी पा गाक्ब नु शांबु राकसीमी दुक्शा, खुइ पा गाक्ब दुम्तेक्म हना, मेकोपुकी नु काथा बाक्शा जचा यो मदुम्ब। २थिस्सलोनिकी ३:६
12प्रभु आ मुर मदुम्शो आन कली मार निसाफ पाइनुङा ङा? प्रभु आ मुर दुम्शो इन दाते ङा आन कली चहिं गेपुकीमीन नाक्शा, सजाइ गेचा ममाल्नीनी ङा?
13परमप्रभु यावेमी रागी ङा मुर आन कली निसाफ पाइब। गेपुकी नु बाक्शो पात्के पाइब कली ग्रुंइशा सोइक्तीने। ब्यवस्था ११:६; मत्ती १८:१७
