7साप्पा रूशो कोव़जमी खुदो यो मदाक्ब। तन्न शोव़लु बेक्शो मुर कली मब्रोव़शो जचा थोव़क यो ब्रोव़ब।
8खिं रे ङोन लशो मुर ग्योव़ रे ङोन बेरशो चिक्ब खोदेंशो बाक्ब।
9ब्रोव़शो रिना पाइश्शो तेल नु धूपमी मुर आन थुं ग्येरशो सेल्ब। तन्न वारच आ अर्ती मेको क्येङा रिम्शो बाक्ब।
10इ वारच कली नु इ आफ आ वारच कली मप्रोनो। श्येत जवी ना, इ लोक्ब आ खिं मलावो। मारदे हना ङोन बाक्शो लोक्ब क्येङा नेक्था बाक्ब मुर रिम्शो बाक्ब। हितोपदेस १८:२४
11आं तौ, जोक्ब तुइक्ब दुमो। मिनु गो ग्येरनुङ। मोपा गो इ पर्बम लोव़ पा आं कली आइक्च सेल्ब आन कली लोव़ लेन्ने चाप्नुङ।
12निप्स पाइश्शो मुर श्येत जाक्चा चिक्शो तशा, ख्रुंइसीनीम। तन्न मारेइ मजोक्ब मुरुमी मारेइ मतुइक्थु श्येत जाइनीम। हितोपदेस २२:३
13अर्को रागी ङा मुर आन पर्बम जमानी दुम्शो मुर, आ वा रोइश्शा लतीन। मुर आ पर्बम जमानी बाक्शो आ मारेइ मारेइ नेल्ले लतीन। हितोपदेस २०:१६
14सुमी सुनी कना बोक्शा, आ नेक्था ङा मुर कली ठेयब सेंदामी आसीक पाइबा। मेको आसीक ताइबमी “सराप पाइक्ती” देंब।
15गेना हना यो जिचा पोक्ब मीश रेउ यिमेनु तप तप पा याप्ब ब्वाक्कु खोदेंशो बाक्ब। हितोपदेस १९:२३
16मेको कली अरेचा फश गिवार कली नाइक्पाइक्चा खोदेंशो नु ग्युरा गुइमी तेल गुप्चा खोदेंशो बाक्ब।
17फलाममी फलाम कली शेप्शो खोदेंशो पा, मुर कामी अर्को कली शेप्ब।
18सुमी फोव़शी रवा खाल पाइबा, मेकोमी फल जचा ताइब। सुम आ होव़प कली रिम्शो पा कोव़बा, मेको मान पाइक्चा पुंइसीब।
19दोपा ब्वाक्कुम कुल तांइसीबा, मोपा मुर आ थुं दोदेंशो बाक्बा, मेको अर्कोम तुइक्बा।
20बेक्शो मुर आन बाक्तीके नु जाम्शा लतीके गेनायो मरूशो खोदेंशो पा, मुर आ मिक्च यो गेनायो मरूब। उपदेसक १:८
21चांदी यपाइक्चा कली गारचा ङा ग्योंब नु सुन यपाइक्चा कली यो गारचा ङा ग्योंब माल्शो खोदेंशो पा, मुर आ पतीक अर्को मुर आन ठेयब सेल्तीक रे पा तुंइसीब।
22मूर्ख कली अन्न नु चुम्लुम वोइश्शा तूलीमी चुशा हना यो, आ मूर्खे पचा गेनायो मग्रूब।
हितोपदेस 27
हितोपदेस 27:7-22