7थमा पा दिप्बपुकीम जोक्ब तुइक्ब मुर आन कली मूर्ख सेल्नीम। घूसमी मुर आन थुं मरिम्शो सेल्ब।
8गेय पचा गोशो क्येङा थुम्शो रिम्शो दुम्ब। ठेयब लेश्शो थुं पाइश्शो दुम्चा क्येङा फाल्तीक थुं पाइश्शो दुम्चा रिम्शो बाक्ब।
9रीब पा मगाइक्तो। मारदे हना गाइक्तीक मूर्ख आन थुंम बाक्ब। याकूब १:१९
10गेपुकीम “ङोंइती ङा नाक्त, मुल ङा नाक्त क्येङा मारदे रिम्शो बाक्मा?” दे मदेनीन। मारदे हना जोक्ब तुइक्बपुकीम मोदेंशो लोव़ हिल्लो मपाइनीम।
11जोक्तीक तुइक्तीके किकी पिपी आन गेशो शोंप खोदेंशो पा रिम्शो बाक्ब। मिनु मेकोमी ब्रोंइब आन कली रिम्शो पाइब।
12दोपा क्येटीम मुर आन कली वारच पाइबा, मोपा जोक्तीक तुइक्तीकेम यो मुर आन कली वारच पाइब। मिनु जोक्तीक तुइक्तीकेमी मुर आन कली ब्रोंइचा गेब। हितोपदेस ३:१-२
13परमप्रभु आ गेय मिम्तीन। मेको आ रोप्शो थोव़क कली सुमी दिंपाइक्ने चाप्बा ङा? उपदेसक १:१५
14नाक्त रिम्शो दुम्मेनु ग्येरसीन। तन्न नाक्त मरिम्शो दुम्मेनु मिम्तीन। मेको निम्फा परमप्रभुमी सेल्शो बाक्ब। मोपा मुरुमी नोले आंम कली मार दुम्बा, दे मतुइक्नीम।
15गो आं इच्का नाक्त ब्रोंइतीकेमी ठीक पाइब मुर आ ठीक पशोमी खतम दुम्शो नु मरिम्शो मुर आ मरिम्शो पशोमी शुश बर्स ब्रोंइशो ताता। उपदेसक ८:१४; भजन संग्रह ७३:१२-१४
16शुश ठीक पाइब मदुमो। मिनु शुश जोक्ब तुइक्ब यो मदुमो। गे मारदे आंमा खतम सेल्सीनेवे? लूका १८:११-१२
17गे परमप्रभु आ अरेशो मटीब नु शुश मूर्ख यो मदुमो। गे मारदे बेक्ची मजाक्थु बेक्चा दाक्नेवे?
18का कली वोतीन नु अर्को कली यो मप्रोनीन। मारदे हना परमप्रभु कली मान पा हिंब, मेको नेल्ल रे ङोन बाक्नीम।
19जोक्तीक तुइक्तीकेमी जोक्ब तुइक्ब मुर कली सहर ङा १० जना हुकुम पाइब आन क्येङा यो सक्ति पाइश्शो सेल्ब।
20थमा पा रागीमी मारेइ मारेइ ठीक पाइब नु गेनायो पाप मपाइब सुइ मबाक्नीम। भजन संग्रह १४:३
21मुरपुकीमी देंशो लोव़ नेल्ल मनेनो। मो पाप्तीवी हना इ वाइलीमी इ कली सराप पशो नेंनेवे।
22मारदे हना गे गिश खेयप अरु आन कली सराप पवी, मेको इ थुंम बाक्ब।
23गो मारेइ मारेइ जोक्तीक तुइक्तीकेम नाक्शा कोव़ता। मिनु गो “थमा पा जोक्ब तुइक्ब दुम्नुङ” देंती। तन्न रुप्ने मचबु।
24शुश ङोन बाक्ब नु शुश लुक्च लशो थोव़क सुम तुइक्ने चाप्बा ङा?
25मोपतीके गो जोक्तीक तुइक्तीक नु नेल्ल तुइक्चा थुं पाता। मिनु परमप्रभु आ अरेशो मटिचा मूर्ख गेय बाक्ब। मिनु मूर्ख गेयमी निप्स ग्यशो दुम्शो बाक्ब। भजन संग्रह १४:१
26मेको बेक्तीक क्येङा मरिम्शो ब्वारद दाइश्शो खोदेंशो मीश मुर बाक्त। मेको आ थुं थेम्लु नु मेको आ गुइ चहिं पाइक्तीक साङलो बाक्त। सुम परमप्रभु कली ग्येरपाइक्बा, मेको रे ब्रोंइब। तन्न मेकोमी पाप पाइब कली चहिं आ ग्याइलीम रेप्ब। हितोपदेस २:१६-२२
27शेंबमी “गो मार तुइक्तु, मेको नेनीन। गो नेल्ल रिम्शो पा तुइक्चा कली नाक्ताक्ङ।
28गो रिम्शो मुर माल्ना माल्न बाक्ङानु हजार का वोंइश मुर आन दातेमी मुर का ला रिम्शो पाइब थित्ता। तन्न मीश मुर आन दातेमी का यो मथिदु।
29परमप्रभुमी मुर आन कली ठीक पाइब सेल्तु। तन्न मुरपुकीम आन दाक्शो पाइनीम” देंत। उत्पत्ती १:२७