ܡܙܡܘܪ̈ܐ 9:2-20

²ܒܸܬ ܚܵܕܹܝܢ ܘܒܸܬ ܦܵܨܚܹܢ ܒܝܼܘܼܟ݂، ܒܸܬ ܙܵܡܪܹܢ ܫܸܡܘܼܟ݂، ܝܵܐ ܥܸܠܵܝܵܐ.

³ܐܝܼܡܲܢ ܕܕܵܝܪܝܼ ܕܸܫ̃ܡܸܢܝܼ ܠܒܵܬܪܵܐ، ܟܹܐ ܬܲܪܩܸܠܝܼ ܘܛܵܠܩܝܼ ܡ̣ܢ ܩܲܕܡܘܼܟ݂؛

⁴ܣܵܒܵܒ ܥܒ݂ܝܼܕ ܠܘܼܟ݂ ܕܝܼܘܵܢܝܼ ܘܕܝܵܢܬ‌ܝܼ؛ ܝܬܝܼܒ݂ ܠܘܼܟ݂ ܥܲܠܔ ܟܘܼܪܣܝܵܐ ܒܸܕܝܵܢܵܐ ܒܙܲܕܝܼܩܘܼܬܵ‌ܐ.

⁵ܢܓ̰ܝܼܘ ܠܘܼܟ݂ ܒܐܸܡܘܵܬܹ̈‌ܐ، ܛܘܼܠܸܩ ܠܘܼܟ݂ ܠܒܝܼܫܹ̈ܐ، ܫܸܡܵܝܗ‌ܝ ܓܪܝܼܕ ܠܘܼܟ݂ ܠܥܵܠܲܡ ܥܵܠܡܝܼܢ.

⁶ܕܸܫ̃ܡܸܢ ܬܝܼܡ ܠܹܗ ܒܚܪܵܒ݂ܵܐ ܥܵܠܡܝܼܢܵܝܵܐ، ܘܡܕܝܼܢܵܬܵܝ̈ܗ‌ܝ ܥܩܝܼܪܘܼܟ݂، ܛܠܝܼܩ ܠܹܗ ܕܟ݂ܵܪܵܐ ܕܝܼܵܝܗ‌ܝ.

⁷ܐܝܼܢܵܐ ܡܵܪܝܵܐ ܠܥܵܠܲܡ ܝܬܝܼܒ݂ܵܐ ܝܠܹܗ، ܡܘܼܩܘܝܼܵܐ ܝܠܹܗ ܟܘܼܪܣܝܹܗ ܠܕܝܵܢܬܵ‌ܐ.

⁸ܘܗ̇ܘ ܒܸܬ ܕܵܐܹܢ ܠܒܪܝܼܬܵ‌ܐ ܒܙܲܕܝܼܩܘܼܬܵ‌ܐ، ܒܸܬ ܥܵܒܹܕ ܕܝܵܢܬܵ‌ܐ ܠܥܲܡܡܹ̈ܐ ܒܬܪܘܼܨܘܼܬܵ‌ܐ.

⁹ܘܒܸܬ ܗܵܘܹܐ ܡܵܪܝܵܐ ܒܹܝܬ ܓܵܘܣܵܐ ܠܡܘܼܠܝܸܨܹ̈ܐ، ܒܹܝܬ ܓܵܘܣܵܐ ܒܥܕܵܢܵܐ ܕܐܘܼܠܨܵܢܵܐ.

¹⁰ܘܒܸܬ ܣܵܒܪܝܼ ܒܝܼܘܼܟ݂ ܝܵܕܥܵܢܹ̈ܐ ܕܫܸܡܘܼܟ݂، ܒܗ̇ܝ ܕܠܹܐ ܝܘܸܬ ܫܒ݂ܝܼܩܵܐ ܠܛܵܥܝܵܢܹ̈ܐ ܕܐܸܠܘܼܟ݂، ܝܵܐ ܡܵܪܝܵܐ.

¹¹ܙܡܘܿܪܘܼܢ ܠܡܵܪܝܵܐ ܥܵܡܪܵܢܵܐ ܒܨܸܗܝܘܿܢ، ܡܲܕܸܥܡܘܼܢ ܥܒ݂ܵܕܘܼ̈ܗ‌ܝ ܓܵܘ ܥܲܡܡܹ̈ܐ.

¹²ܒܗ̇ܝ ܕܫܵܩܠܵܢܵܐ ܕܬܘܼܥܠܵܐ ܕܕܸܡܵܐ ܟܹܐ ܕܵܟܹܪ ܠܡܘܼܠܝܸܨܹ̈ܐ؛ ܠܹܐ ܡܲܢܫܹܐ ܠܡܲܩܘܲܚܬܵܝܗ‌ܝ.

¹³ܪܲܚܸܡ ܥܲܠܝܼ، ܝܵܐ ܡܵܪܝܵܐ، ܚܙܝܼ ܐܘܼܠܨܵܢܝܼ ܕܡ̣ܢ ܣܵܢܝܵܢܝܼ̈، ܝܵܐ ܡܲܪܡܵܢܝܼ ܡ̣ܢ ܕܲܪ̈ܘܵܙܹܐ ܕܡܵܘܬܵ‌ܐ،

¹⁴ܕܗܲܩܹܝܢ ܟܠܵܝܗ‌ܝ ܬܸܫܒܘܿܚܝܵܬܘܼ̈ܟ݂ ܒܕܲܪ̈ܘܵܙܹܐ ܕܒܪܵܬ ܨܸܗܝܘܿܢ، ܥܵܒ݂ܕܹܢ ܦܨܵܚܵܐ ܒܦܘܼܪܩܵܢܘܼܟ݂.

¹⁵ܛܒܝܼܥ ܠܗܘܿܢ ܐܸܡܘܵܬܹ̈‌ܐ ܒܓܘܼܒܵܐ ܕܚܦܝܼܪܗܘܿܢ، ܒܓܲܪܕܵܐ ܕܛܘܼܡܸܪܗܘܿܢ ܦܝܼܫ ܠܵܗ̇ ܕܒ݂ܝܼܩܬܵ‌ܐ ܐܲܩܠܵܝܗ‌ܝ.

¹⁶ܦܝܼܫܵܐ ܝܠܹܗ ܝܕܝܼܥܵܐ ܡܵܪܝܵܐ ܒܕܝܼܘܵܢ ܕܥܒ݂ܝܼܕ ܠܹܗ، ܪܲܫܝܼܥܵܐ ܒܦܘܼܠܚܵܢܵܐ ܕܐܝܼܕܘܼ̈ܗ‌ܝ ܟܹܐ ܦܵܐܹܫ ܕܒ݂ܝܼܩܵܐ ܒܩܘܼܠܬܵ‌ܐ. ܗܓܵܝܘܿܢ ܣܹܠܵܗ

¹⁷ܒܸܬ ܕܵܝܪܝܼ ܒܝܼܫܹ̈ܐ ܠܫܝܘܿܠܔ، ܟܠܵܝܗ‌ܝ ܐܸܡܘܵܬܹ̈‌ܐ ܢܵܫܝܵܢܹ̈ܐ ܕܐܲܠܵܗܵܐ.

¹⁸ܣܵܒܵܒ ܠܥܵܠܲܡ ܠܹܐ ܦܵܐܹܫ ܡܘܼܢܫܝܼܵܐ ܣܢܝܼܩܵܐ، ܠܹܐ ܛܵܠܹܩ ܣܲܒ݂ܪܵܐ ܕܡܸܣܟܹܢܹ̈ܐ ܠܥܵܠܲܡ.

¹⁹ܩܘܼܡ، ܝܵܐ ܡܵܪܝܵܐ، ܕܠܵܐ ܡܲܫ݇ܟ̰ܸܚ ܙܵܟ݂ܘܼܬܵ‌ܐ ܐܢܵܫܵܐ، ܦܵܝܫܝܼ ܕܝܼܢܹܐ ܐܸܡܘܵܬܹ̈‌ܐ ܩܲܕܡ ܦܵܬܘܼܟ݂.

²⁰ܡܲܬܸܒ݂، ܝܵܐ ܡܵܪܝܵܐ، ܙܕܘܼܥܬܵ‌ܐ ܥܲܠܵܝܗ‌ܝ، ܕܝܵܕܥܝܼ ܐܸܡܘܵܬܹ̈‌ܐ ܕܒܢܲܝ̈ܢܵܫܵܐ ܝܢܵܐ ܐܵܢܝܼ. ܣܹܠܵܗ