Ola Saam 9:2-20

²Gudbinjiwei ai garra sing blanga yu. Main haibalawan God, ai garra preisim yu garram song.

³Wen main enamimob luk langa yu, olabat tenaran en ranawei, en dei jis binij deya igin.

⁴Wen yu jadjim pipul yu feyagowan en trubalawan en yubin dum lagijat na blanga mi.

⁵Yubin jadjim ola nogudbala pipul en yubin binijimap olabat. Nobodi garra sabi blanga olabat enimo.

⁶Blanga wi enamimob olabat binij na fogud. Yubin binijimap blanga olabat ola bigwan taun, en olabat nomo jidan enimo, najing na.

⁷Bat YAWEI im jidan bos olagijawan. Im jidan redibala blanga jadjim pipul na.

⁸Im det trubalawan bos oba langa ola kantri. Im jadjim pipul langa ola kantri en gibit olabat feyago.

⁹Detlot pipul hu abumbat adtaim brom najalot pipul, YAWEI im jidan jis laik det seifwan haus blanga olabat. YAWEI na det brabli strongwan haus weya im lukaftum olabat.

¹⁰Detlot pipul hu sabi yu YAWEI, olabat garra trastim yu. Yu nomo libum en gowei langa enibodi hu kaman langa yu.

¹¹Singim song blanga preisim YAWEI weya im jidan bos langa Saiyan. Dalim ola pipul brom ebri kantri wanim imbin dum.

¹²God im nomo fogedabat detlot pipul hu oldei ardimbat brom ebrijing. Im lisin wen dei jingat langa im. Im panishim detlot hu dum rong ting langa olabat.

¹³YAWEI, yu sori langa mi. Yu luk mi ardimbat brom main enamimob olabat. YAWEI yu seibum mi, bambai mi dai,

¹⁴wulijim ai gin jandap en dalim ola pipul brom Jerusalem blanga ola brabli gudbala ting yubin dum. Ai garra densdensbat en sing song dumaji yubin seibum mi.

¹⁵Detlot najalot pipul bin digim hol blanga trepam olabat enamimob, bat olabat enamimob nomo bin buldan langa det trep. Olabat bin trepam miselp langa olabat ron trep.

¹⁶YAWEI bin shoum miselp wotkain im, dumaji im gibit feyago langa ebribodi. Ola nogudbala pipul faindim miselp langa olabat ronwan trep, wen dei oldei dumbat nogudbala ting.

¹⁷Ol detlot nogudwan pipul garra ol gobek langa greib garram ol detlot najalot pipul hubin fogedabat langa God.

¹⁸Ola powan pipul kaan oldei jidan rabishwan. Dei weidabat blanga God blanga album olabat. God kaan larram olabat blanga jidanbat lagijat enimo.

¹⁹YAWEI, gidap! Nomo larram detlot pipul bosoba langa yu! Bringimap ola pipul hu nomo sabi yu, en jadjim olabat!

²⁰YAWEI, bradinim olabat, en meigim olabat sabi dei jis oni pipul weya dei gin binijap.